الفنانون على السوشيال ميديا يعلنون الغضب على الداخلية بسبب مريهان حسين.. خالد الصاوى: داخلية ما قبل ٢٥ يناير.. محمد دياب: هنقف جنبها وهنساندها..مى كساب: يا وزير الداخلية نضف الوزارة من المرضى النفسيين

شن عدد من الفنانين هجوما حادا على وزارة الداخلية عبر حساباتهم الرسمية والشخصية على مواقع التواصل الاجتماعى، بعد احتجاز الفنانة مريهان حسين على خلفية التحقيقات معها، فى تهم التعدى على موظف عام أثناء تأدية مهام وظيفته والسب والقذف والقيادة تحت تأثير السكر، واتهامها الموجه لضابط شرطة بالتعدى عليها. خالد الصاوى: شكرا الداخلية الرسالة وصلت هاجم الفنان خالد الصاوى الداخلية بعد واقعة التعدى على الفنانة مريهان حسين، وكتب منشورا على حسابه الرسمى على موقع التواصل الاجتماعى "فيس بوك" قائلا: "عدت الساعات، الوعود بخ، كده أنا أخدت على قفايا، كان نفسى أحس بدولة قانون، وإنى بعمل بمهنة لها وزن ولى دور، شكرًا الداخلية، الرسالة وصلت". وأضاف "وشكرًا يالى فوق ومش داخلية، وعودكم خلابة بس بخ، برافوا أمرا ونبلا وباشوات وبكوات عثمنلى ومماليك، وبقول لشعبى شفتنى وأنا عبيط؟ ما تعملش زيى بقى". وتابع "ونصيحتى لكل حد له حق مسلوب: حقك أن برد فسد، الصح الحساب أول بأول، وخصوصا لو الزبون حسابه أصلا ثقيل من سنين، السفاحين بيتوبوا؟ لو جرالهم إيه؟". وأكمل "الدرس المستفاد: دى داخلية ما قبل ٢٥ يناير بس إحنا بقينا غير، فاصل ونواصل".

واستطرد، "الداخلية عيلة عريقة وعتيقة وأسرة فى بعضيهم وبيتلموا على بعض ويكذبوا العالم ويصدقوا بعض بل والملازم يغلط فينا قدام لواءاته! أى حد منهم يحاسب".

واستكمل، "ضابط قسم الهرم اللى فوقنا بجردل البول اللى رشه على زميلتنا مع وصفه للممثلات بعاهرات وإحنا طبعا قوادين، يلزمه احتفال لم يره أى ضابط فى مصر".

وأردف، "مشكلتنا كفنانين مع أى سلطة شبه أغلب القطاعات إحنا لا بنقمع ولا بنقسم المنابات، أهميتنا بالتفاف الناس حول شغلنا وده بيخلق خصوم مش نزيهة، مشكلة الفنانين مع السلطة تتحل بسيادة القانون، أما مشكلتنا مع الناس المتربصة بالفنانين (رغم حبهم للفن) فلا يحلها إلا سيادة المعالجين النفسيين".

محمد دياب أما المخرج محمد دياب كتب على حسابه الشخصى على موقع التواصل الاجتماعى "فيس بوك"، قائلا "مهتم جدا بقصة مريهان حسين مش كفنان لا كمواطن مصرى، مرعب موضوع أنك بقيت عارف أنك لو اشتبكت مع ضابط فهو ورآه وزارة الداخلية بتأمن على كلامه وبتتبنى وجهة نظره لدرجة أنها تنزل بيانات مضروبة بدون تحقيق أو تحقق هدفها الوحيد كسب الرأى العام".

وتابع، "مريهان دى فنانة وإحنا كفنانين هنقف جنبها بس المواطن العادى اللى ملوش حد يقف ورآه يعمل إيه".

مى كساب: يا وزير الداخلية نضف الوزارة من الضباط المرضى النفسيين وكتبت الفنانة مى كساب على حسابها الرسمى على موقع التواصل الاجتماعى " إنستجرام"، قائلة "شهادة حق أمام الله أنا أعرف مريهان حسين من أيام ما كنا أطفال فى طنطا أخويا وأخوها أصحاب أنتيم وقربنا من بعض فى تصوير مسلسل المطلقات".

وأضافت، بنت محترمة وجدعة وطنطاوية متربية وعمرها ما بتعمل أى حاجه غلط أى كلام بيتقال افتراء وتلفيق يا وزير الداخلية نضف الوزارة من الضباط المرضى النفسيين الداخلية يا ريس الأخلاق يا ريس.

حسن عيد أما الفنان الشاب حسن عيد كتب على حسابه الشخصى على موقع التواصل الاجتماعى "فيس بوك"، قائلا "مريهان فنانة محترمة عمرها ما شربت سيجارة إلا فى الشغل لو مشهد متطلب ده، اشتغلت معاها كتير وعارفها كويس، للأسف سمعت باللى حصل حبيت اطمئن عليها اتصلت برقمها الأول مغلق والرقم التانى بيرد عسكرى بيشتم ولما عرف أنى مسجله احترم نفسه وأنا مسجل المكالمة وهنزلها قريب علشان يتحاسبوا بقى".