"نفسى تهتم بيا".. سماعك لهذه العبارة من شريكك يعنى إنذار خطر بقرب انهيار العلاقة لغياب الأساس الأقوى لكل علاقة عاطفية صحية. فكما تبدأ كل علاقة حب بالاهتمام تنتهى أيضًا بسبب غيابه مهما كانت العلاقة طويلة ومهما بدت قوية.
ورغم أن كل رجل وامرأة على وجه الأرض يعرفان هذه الحقيقة ويعرفان أهمية الاهتمام للعلاقات، إلا أن بين إبداء الاهتمام وإدراك الطرف الآخر له تضيع الكثير من العلاقات، لهذا كان من المهم أن نعرف من الطرفين ما هو الاهتمام المنتظر وما أهمية وجوده؟ وكيف يمكن أن تطلبه المرأة وبماذا تشعر إذا اضطرت لذلك..
"الاهتمام هو كل حاجة من أول الحضن وقت الزعل لحد الاهتمام بالتفاصيل"
يعرف كل رجل على وجه الأرض أن الاهتمام هو أقصى ما تحتاجه الأنثى وتريده، تمامًا مثل الأمان، ولكنهم لا يعرفون على وجه التحديد ما هو الاهتمام؟ يظن الكثير من الرجال أن الأمر معقد وأنهم مهما بذلوا من جهد لن يتمكنوا من إرضاء المرأة. يرى بعضهم أن الاهتمام هو ما يفعله حين يدبر مصروفات بيته ويوفر لها الأمان المالى، ويرى آخرون أن الاهتمام هو متابعته المستمرة لتفاصيل تحركاتها وتنقلاتها خارج المنزل ويعتقد آخرون أن الاهتمام هو هدية.
وفى الجهة المقابلة تشعر المرأة بالإحباط واليأس وأحيانًا بالإهمال، تكاد تصرخ أن "اهتم بيا من فضلك"، أحيانًا تطلب هذا الاهتمام وأحيانًا تشعر أنه أن جاء بعد أن تطلبه فهو تسول وليس اهتمام.
ولتقريب المسافات بين كوكبى "الزهرة" و"المريخ" سألنا عدد من الفتيات والسيدات عن معنى الاهتمام بالنسبة لهن..
"الاهتمام هو أنه يسمعني"
"حسن الاستماع" هو اختصار مفهوم الاهتمام بالنسبة لـ"آلاء عبدالمنعم" التى قالت لـ"انفراد" "الاهتمام بالنسبة لى أنه يحب يسمع منى كلامى حتى لو كلام فاضى أو هرتلة، ويدينى راحتى فى إنى أقول اللى جوايا"، واستطردت "مش مهم التفاصيل الصغيرة ما بقتش تفرق أن كان يفتكر عيد ميلادى أو لا، لكن الأهم عندى لما أبقى محتاجة اتكلم ألاقى اللى يسمعنى".
وتابعت "بالإضافة لأنه يسمعنى، بشوف إننا لو بنحب حد بنتلكك ونفهم أى حاجة بيعملها اهتمام، لو ادانى بونبوناية أو حتى رخم عليا أو شاف الرسالة على الواتساب ورد بسرعة أو حتى شافها ورد بعدها بيوم بنفسر كل دا على أنه اهتمام".
"الاهتمام هو التفاصيل"
على عكس "آلاء" ترى "أسماء جمال" أنه فى التفاصيل يكمن المعنى الحقيقى للاهتمام، وتقول "ماحدش بيقدر قيمة التفاصيل.. كل الناس تسأل إزيك عاملة إيه؟ لكن اللى مهتم فعلاً بيبقى عايز التفاصيل، يومك عامل إزاى؟ مين ضايقك؟ إيه حصل؟ دماغك بتحب إيه وإيه الاهتمامات المشتركة بينكم وممكن تتشاركوها سوا. يهتم بطموحاتك وأحلامك وتفاصيلك الصغيرة العبيطة اللى يبقى عارف إنها هترفع معنوياتك فى السما".
تضيف "أسماء": "منتشر جدًا مفهوم الاهتمام أن حد يسألنى كلتى ؟ شربتي؟ رجعتى البيت؟ دا كلام حلو لكن الاهتمام الحقيقى أكبر وأعمق، اهتمامه وقت ضعفى لما يشوفنى بنهار فيلحقنى ويقوينى ويجبر بخاطرى، أنه يهتم بمشاكلى أو موضوع معين بحكيه بشغف فمستحيل يقاطعنى.. حتى وقت ما الطفلة اللى جوايا تظهر فى تصرفات بسيطة يهتم بيها ويعرفنى أنه مركز معايا.. اهتمامه بأحلامى وطموحاتى ودراستى وحياتى".
"الاهتمام مالوش كتالوج"
من زاوية قريبة قليلاً من "أسماء" ترى "هيام محمد" الاهتمام وتقول "الاهتمام مالوش كتالوج.. بس هو يعنى أدق تفاصيلك" وتوضح "مرة مثلاً أختى راحت السوبر ماركت تجيب طلبات لنفسها وكنا ساعتها مختلفين مع بعض، لكن وهى هناك شافت نوع شاى بحبه فجابتهولى رغم إننا على خلاف وما كانتش بتسعى بالتصرف دا لأنها تصالحنى لكن أنا ضمن اهتمامتها حتى وهى زعلانة منى".
"الاهتمام حاجة بسيطة جدًا من أول انتى كويسة لحد الحضن وقت الزعل"
أما "إنجى على" فتقول باستنكار ممزوج بالتساؤل "الاهتمام عندى حاجة بسيطة ومش معقدة وما بقدرش أفهم ليه الطرف الثانى بيعتبره عبء وضغط نفسى؟" وتضيف "مش بطلب أكثر من أنه يسألنى مثلاً عاملة إيه؟ وإيه أخبار الشغل؟ انتى كويسة؟ دا بالنسبة لى اهتمام.. كلمة تسلم إيدك على أى حاجة بعملها اهتمام.. الحضن وقت الزعل والاحتياج اهتمام".
"الاهتمام أنه يدور على اللى بيفرحنى ويعمله"
ببساطة واختصار عبرت "أمل مجدى" عن معنى الاهتمام بالنسبة لها "إن اللى قدامى يدور على اللى بيفرحنى ويعمله من غير ما أطلب ومن غير مناسبة دا اهتمام.. أنه بس يعمل الحاجة علشان أبقى مبسوطة هو دا بالظبط الاهتمام".
"الاهتمام هو الإحساس بيا ومراعاتي"
بشكل معنوى خالص تحدثت "ضحى جبر" عن معنى الاهتمام بالنسبة لها "الاهتمام له صور كثيرة، الإحساس بتعبى والإحساس باللى ناقصنى وأنه يوفرهولى.. مراعاة حالتى النفسية أيام الحمل أو فى الأيام الخاصة من الشهر.. الاهتمام بالمناسبات الخاصة بيننا".
" ملكة زمانى ومش عايزة حاجة من الدنيا وواثقة فى نفسي".. اللى البنات بتحس بيه لما تهتم بيها
يحب الكثيرون تشبيه المرأة بالزهرة والاهتمام بالماء الذى يمنحها الحياة والحيوية، ولكن كيف يمكن أن تصف المرأة نفسها شعورها بالاهتمام؟ فمثلما يختلف معنى الاهتمام بالنسبة للمرأة وطبيعة الاهتمام الذى تحتاجه يختلف أيضًا الشعور الذى يخلفه الاهتمام لديها.
وبسؤالهن عن شعورهن حين يشعرن باهتمام الشريك أو الاهتمام بشكل عام بهن هكذا جاءت إجابات البنات:
بعفوية وفرحة طفولية ممزوجة ببعض الحسرة قالت "آلاء": "لأن الاهتمام بالنسبة لى هو الإنصات والاستماع بحماس لكلامى، لما حد بيعمل كده بحس بشعور عظيم إنى مهمة عند حد حتى ولو لثوانى، وبحس أن الشخص دا ليا.. بتاعى لوحدى".
أما "لى لى إبراهيم" فقالت عن الاهتمام "بيحسسنى بقيمتى فى عين اللى قدامى وبيوصل لى انا قد ايه أهمه.. بيحسسنى بشغفه بتفاصيلى".
وباستفاضة أكثر تحدثت "أسماء" عن إحساسها بالاهتمام وقالت: "الاهتمام بيحسس أى بنت إنها برنسيسة.. الاهتمام بيسحر البنات، وبيزود ثقتها فى نفسها جدًا، وبيخليها مدركة لقيمة نفسها.. بتحس إنها ملكة ونفسيتها بتبقى فى السما وتعرف إنها مش وحيدة أبدًا، ودا بيساعدها تعدى أى موقف صعب لما تلاقى اللى حواليها مهتمين بيها وبيسندوها عشان تكون أقوى".
وأضافت "أما بقى لو الاهتمام دا من حد بتحبه المشاعر والأحاسيس دى بتتضاعف مليون مرة، بتحس إنها مكتفية بالدنيا وكأنها فراشة".
واتفقت معها "هيام" التى قالت "الاهتمام بيخلينى أحس بقيمة نفسى إلا إذا كان اهتمام وراه هدف معين. الاهتمام الصادق بيحسسنى بوجودى وقيمتى كشخص الناس بتسعى لمودته".
وقالت "إنجى" "لما اللى قدامى بيدينى اهتمام بحس إنى مش عايزه حاجه من الدنيا خلاص.. انا كده ملكه زماني"، وأضافت "من غير الاهتمام بحس إنى مطفية ووحيدة ومهملة".
سألناها إمتى ممكن تطلبى الاهتمام؟ وبتحسى بإيه وقتها؟
بشجن تستمع إلى صوت "نانسى عجرم" الحزين يشدو "فى حاجات تتحس وما تتقالش وإن جيت اطلبها انا مقدرش ولو انت عملتها بعد ما انا اطلبها يبقى مينفعش"، وتتذكر كل مرة حاولت فيها أن تلفت انتباهه لحاجتها إلى الاهتمام، ثم تجيب سؤالنا الصعب: ممكن تطلبى من الراجل يهتم بيكي؟".
بشكل قاطع أجابت "أمل": "لأ.. أنا مستحيل أطلب حاجة من حد خصوصا الاهتمام. لكن ما أنكرش أن فى أول علاقتنا وضحت له (زوجها) إنى بحب اللى يهتم بيا وأنه ممكن يعتبرها أنانية.. لكن الحقيقة إنى بحب أحس أن اللى قدامى مهتم بيا مش بدافع الفضول أو السيطرة لكن علشان مهتم وبيحبنى".
أما "لى لى إبراهيم" فقالت ببساطة "أيوة ممكن أطلبه بهزار أو بعتاب، علشان شكل أى علاقة بيتغير لو مافيش اهتمام متبادل. والشخص اللى بيعنى لى لازم أشده ليا وأقول له فوق وخد بالك منى.. لو أنا ما عملتش كده أبقى مش باقية عليه أو هو ما كانش بالنسبة لى حاجة من الأول. ودا بعتبره جزء من الاهتمام اللى أنا بقدمه له". وعن إحساسها حين تضطر لطلب الاهتمام قالت "إحساسى بيختلف حسب رد فعله، لو قدر وخد باله واهتم بيا هبقى فى نظر نفسى ذكية وواعية وتصرفى صح، ولو العكس قلبى بيزعل وما بيرجعش للى زعله تانى أبدًا بس بيكون جوايا قناعة أنه هو الخسران مش أنا".
وبضيق اعترفت "إنجى": "أنا على طول بطلب الاهتمام لما أحس إنى وحيدة أو مهملة أو مافيش تقدير ليا من الطرف الثانى. وعندى أكثر من طريقة فى إنى أطلبه، الأول أتكلم بهدوء ولكن بعد كده بتقلب بخناق لما يتهمنى إنى بضغط عليه بجانب ضغوط الحياة". وعن إحساسها حين تضطر لذلك تقول بأسف "طبعًا بحس إنى رخيصة أوى عشان بطلب شوية اهتمام بالأسلوب ده.. أعتقد إنى لو طلبت فلوس كانت هتبقى أحسن من إنى أطلب منه يسأل عليا أو يهتم بيا".
فيما نفت "سمر على" تمامًا أن تفكر فى طلب الاهتمام وقالت "الاهتمام مش حاجة بتتطلب، لأنه لو اتطلب هيكون مفتعل وغير صادق وبدون معنى"، ثم استدركت "يمكن بطلب الاهتمام بإنى أهتم أكتر.. بحيث أخلى وجودى فى حياة الشخص دا شىء أساسي".
أما "ضحى" فقالت "فى بداية الزواج كنت بقول يمكن لسة ما اتعودتش وبطلب منه الاهتمام، كنت ببقى حاسة طبعًا أن من حقى يهتم بيا من غير ما أطلب زى ما بهتم بس كنت بقول أهو أدينى بحاول، لحد ما حصلت خناقة كبيرة وقررت بعدها إنى ما اهتمش، وشوية وبدأ هو يهتم بس الحقيقة أنا ما انبسطتش.. الحاجة لما تتعمل بعد ما تعملى كل المحاولات وتفقدى الأمل مش بتفرح زيادة بالعكس.. بتحسى ببرود وتحسى إنك وقت ما كنتى بتعملى كنتى محتاجة يقابلك بنفس الاهتمام.. مش عارفة الوضع بعد كده ممكن يتغير ولا لأ.. بس خلاص اهتمامه من عدمه مش هيفرق".