بائعة الثلج المسنة "هتضحكك وتبكيك".. تحدت الحياة حتى انحنى ظهرها.. الحاجة فتحية أعطت دروسا فى الرضا بالقدر وأبكت كل من سمعها.. عاشت 70 سنة بلا عائلة..وتبيع الثلج فى الصيف لتدخر جزءا من مكسبها الضئيل ل

70 سنة شقاء وتعب والظهر محني لكنها جبل، إنها واحدة من عظيمات المحروسة تحمل الثلج علي ظهرها لتكسب قوت يومها، فى قلب مدينة المنصوره التابعة بمحافظة الدقهلية، عاشت الحاجة فتحية وحيدة فى الدنيا بلا أب ولا أم ولا زوج أو ابناء يراعونها تصدت لمتاعب الحياة بالعمل والاجتهاد والكفاح المستمر، تخرج مع طلعة كل صباح بالعكاز تجر عربة الثلج لتوزعه على زبائنها الثلج فمهنتها مهنة صيفية تندثر فى الشتاء لذا فهى تبذل كل طاقتها فى الصيف حتى تدخر جزء من مكسبها الضئيل للشتاء، هذا ما قالته وهى مبتسمة راضية بما كتبه الله عليها وعلامات الرضا ترسم وجهها البرئ. وقالت السيدة : "لو ليك نقطة ميه مكتوبالك تشربها هتشربها لو فى آخر الدنيا.. ليك نصيب تاكل رغيف هتاكله".

وتابعت:"أنا عندى 70 سنة اتجوزت وسبت جوزى، ونزلت بعد كده اشتغلت وسعيت ورا لقمة عيشى عشان متحوجش لحد او امد ايدى لحد اللى هيسلفنى النهاردة مش هيسلفنى بكره". وأوضحت: وقفت على الثلاجة وبقيت أوزع التلج على العربية للزبائن بتوعى كل يوم على كده واشترى أكلى وأنا مروحه بقالى فوق الـ40 سنة شغالة على الوضع ده ومبروحش لحد اقوله ادينى ولا ليا معاش يسندنى فى الدنيا وبعد ما اخلص شغلى اشترى الأكلة اللى هاكلها واروح بيتى وكل يوم على هذا الحال".

واستكملت: من ساعة ما عييت من4 سنين وانا واقفة على التلاجة وربنا بيراضينى وحمداه وشكراه.. بتفرج عليا فى الـ 3 او 4 شهور الصيف وبعمل حسابى وبمشى على قد حالى واحوش منهم للشتا لأن الشغلانة ديه صيفية وان بعت لو اتنين فى الشتا يبقى رضا من عند ربنا مبكسبش فيهم حاجة بس عشان زبونى ميروحش منى". واردفت: "عايشة فى حالى هنا فى المنطقة لا ليا دعوة باللى راح ولا اللى جه بحب كل الناس والناس بتحبنى لأن معاملتى حلوة معاهم ماشية على مقولة دع الخلق للخالق".

وقالت: "مفيش مسلم بيخاف من الموت وانا مبخفش من الموت انا كل اللى طالبها من ربنا انى متعذبش الكام سنة اللى فاضلين من عمرى طالبة كفن وافر ومتعذبش بقية أيامى ولقمة نضيفة وعلاج نضيف.. لأن الألم اللى بتالمه وانا نايمة صعب وصعب كمان اعمل عملية هفتح على نفسى أبواب صعبة لأنى وحدانية". واستكملت: "ربنا مرزقنيش بالخلفة وهو سبحانه وتعالى ليه حكمة من كدا وانا مش زعلانة مش جايز يجى عيل وحش ابن حرام يتعبني باقى حياتى هو ربنا اختارى الأحسن وانا راضية وسعيدة بحالى لأن اللى ميرضاش باللى مقسومله هيبقى مغضوب عليه وربنا بيختارلنا الأحسن دايما".