بالصور.. "ياما فى البيوت مساكين".. الطفلة "ملك" ابنة طنطا تعانى من ضمور بالمخ.. الأب: نفسى بنتى تعيش وأعيش زى الناس مش لاقى أعالجها.. ووالدتها: منزلنا آيل للسقوط ونستحمل الفقر والجوع بس بنتى تتعالج

ما أصعب الابتلاء حينما يأتى على هيئة عجز، حينما تصبح اليد مغلولة، بينما القلب يتمزق، والعين تبصر ألم فلذة من فلذات الكبد، فلا يستطيع الناظر أن يتمالك دموعه التى تنهمر فى صمت، ولا ذنب له إلا كونه مغلوبا على أمره، لا يملك شيئا، فيقف ممزقا بين لقمة العيش الحلال وبين مرض بحاجة للنفقات التى لا يقوى عليها، وبين غلبة الدين وقهر الرجال.

والد ملك يحكى مأساتها مع المرض "نفسى بنتى تعيش وتتعالج وتخف.. نفسى أعيش زى ما الناس عايشة.. قلبى بيتقطع عليها كل دقيقة وأنا بشوفها عندها تشنجات ومش قادر أعالجها ولا أصرف عليها، إحساس الفقر وحش، والأسوأ إحساس العجز عن علاج بنتى، وأكل عيالى.. بهذه الكلمات بدأ السيد شحاتة من أهالى وسكان قرية صناديد التابعة لدائرة مركز طنطا بمحافظة الغربية حديثه لـ"انفراد" مشيرًا إلى أنه متزوج ويعول 4 من الأبناء، ويقيم فى بيت عبارة عن غرفة واحدة وصالة بالطوب اللبن، وبالسقف العريشة والخشب، ويقيم معهم الحصان الذى يستعين به فى عمله فى نفس المكان.

وأضاف السيد شحاتة " مليش صنعة ولا وظيفة، وعشان أعيش من حلال بلف على الترع والمصارف ومقالب القمامة، ألم الزجاجات والبلاستيكات، وأبيعها بالكيلو لإعادة تدويرها، وبجيب رزقى من حلال وكنت راضى بعيشتى الفقيرة، وحامد ربنا أن لاقى أجيب قوت عيالى يوميا وأروح لهم بقرشين وننام شبعانين، حتى لو هنبات فى زريبة" على حد قوله.

وتابع السيد شحاتة كلامه قائلا "رضيت بالهم والهم مرضيش بيا" كنت راضى بعيشتى وحامد ربنا ألف حمد رغم الفقر والقهر والحاجة، لكن رزقنى الله بابنتى ملك منذ عامين، مصابة بضمور فى المخ، طريحة الفراش لا تتحرك ولا تأكل ولا تشرب وتعتمد على اللبن الصناعى وتحتاج 3 علب فى الشهر، ولا أستطيع توفيرها، كما أنى لا أقوى على مصاريف العلاج الدورى وزيارات الأطباء المستمرة، وبنكتفى بزيارة مستشفى الجامعة يدونا مسكنات ويطردونا فى الشارع.

وأضاف "أنا "عربجى" وأعمل باليومية على باب الله ونفسى أعالج بنتى كل شىء أقدر عليه واستحمل أى أذى إلا أذى بنتى، قلبى بيتقطع وهى عندها التشنجات ومش قادر أجيب لها الحقن والعلاج، ومن حقى أطالب الرئيس السيسى وأقوله "نفسى بنتى تعيش يا ريس". والدة ملك: جرينا كتير والآخر الورق ضاع منهم لله وأخذت والدة ملك طرف الحديث قائلة "جرينا كتير على ولاد الحلال والمسئولين، وروحنا للمحافظ وقرر صرف معاش استثنائى لعلاج بنتى، ولكن الموظفين ضيعوا الورق منهم لله، ودوخونا على مكاتب المسئولين، وفى الآخر طلبوا مننا ورق جديد ومش عارفين ندخل للمحافظ تانى، والفقر منعنا من مرواح طنطا والجرى على المسئولين، اللى بندفعه مواصلات يوميا نجيب به أكل لأخواتها، إحنا بقينا مديونين لطوب الأرض، هنجيب منين يا بيه مواصلات يوميا واليوم اللى بنروح فيه طنطا أبوها بيبطل من الشغل يعنى مفيش دخل، ومفش أكل، ربنا كريم يتولانا برحمته".

كل طلباتى علاج بنتى ورزق حلال ومسكن يلم لحمنا وأكد السيد شحاتة وزوجته أن كل مطالبهم من اللواء أحمد ضيف صقر محافظ الغربية، وجميع السادة المسئولين هو علاج ابنته ملك، وأن تتماثل للشفاء، ويستطيع علاجها والصرف عليها وعلى بيته من الحلال، بينما طالبت والدتها بأى سكن يليق بالإنسان، وقالت "إحنا عايشين مع الحمار فى العشة"، نفسى ألاقى بيتا آمنا يلم لحمنا أنا وعيالى، ومش كثير على ربنا ده، ده احنا غلابة".