سائق التاكسى المعتدى عليه على يد ضابط شرطة لـ"النيابة": الضابط والأمناء علقونى على حرف الباب..وقعدوا يضربونى عشان اعترف بحاجة معملتهاش"..والنيابة تؤكد: مصاب فى العين و الظهر (مستند)

ينشر "انفراد" نص تحقيقات النيابة العامة فى واقعة تعدى ضابط شرطة و 4 أمناء على سائق تاكسى داخل قسم شرطة المقطم لإجباره على الإعتراف بواقعة سرقة .

واستمعت النيابة لأقوال المجنى عليه، حيث أشارت التحقيقات الى أنه برؤية المجنى عليه عمرو حسن غريب حسن داخل غرفة التحقيق تبين اصابته بكدمة فى العين اليمنى، فضلاَ عن اصابات فى الجانب الأيمن الخلفى من الظهر .
وفيما يلى نص التحقيقات:

س/ما أسمك ؟

ج/ عمرو حسن غريب حسن.

س/السن ؟

ج/30 عاما

س/ ما تفصيلات حدوث اصابتك؟

ج/ اللى حصل أن كنت فى الجراج اللى فيه العربية اللى شغال عليها وجه الضابط مصطفى منصور ومعاه ثلاث أو أربع أمناء شرطة ومسكونى جوه الجراج وسألونى على الحاجة اللى سرقتها من الست فى المقطم، وقعدوا يضربونى فى اوضة بقاعة الجراج وبعد كده ودونى على قسم الشرطة وهناك الضابط مصطفى منصور خدنى على الأوضه بتاعته وعلقنى على حرف الباب وكانت يدى مربوطة وقعدوا يضربونى فى وشى وجسمى باليد والرجل .

وتابع: "وبعد كده دخلت لرئيس المباحث واسمه احمد إبراهيم وقالى يابنى هات الحاجة لحسن اعملك هيروين وفرد وراح مطلعهم لقتهم قدامى وبعدها لو انت اعترفت على الحاجة اللى سرقتها هميشك وهتبقى غلطة متعملهاش تانى وبعد كده رجعنى تانى مرتين وانا قولتلو انا مسرقتش حاجة من حد وبعد كده رجعت على اوضة الضابط مصطفى منصور وجاب عصايا خشب بها حديد حطها ورايا وقعد يلف بيها علشان تعورنى وبعد كده طلعت برة .

واستطرد: "والمحضر كان بيتكتب من جوز المجنى عليها وجوز المجنى عليها ضربنى بالرجل وراح شتمنى وطول ما انا فى اوضة الضابط المباحث وامناء الشرطة عمالة تضرب فيا لحد ما جيت النيابة امبارح .

س/ متى وأين حدث ذلك؟

ج/ الكلام دا حصل يوم21 نوفمبر الى الساعة 7 ونصف صباحا لغاية نفس اليوم فى الجراج وبالليل فى القسم.

س/ من هم محدثين اصابتك؟

ج/ انا اللى ضربنى الضابط مصطفى منصور وأمناء الشرطة وجوز المجنى عليها .

س/ ما هو دور كل من سالفى الذكر؟

ج/ الضابط مصطفى منصور ضربنى فى جسمى كله وعلقنى على حافة الباب وقعد يلف فيها وأمناء الشرطة قاعدوا يضربونى بالوكاسات والرجلين وجوز المجنى عليها ضربنى بالرجل فى وشى.
س/ ما هى أسماء الشرطة الذين قامو بالاعتداء عليكى؟

ج/ معرفش اسمائهم

س/ ما هو اسم زوج المجنى عليها؟
ج/ انا معرفش هو اسمه ايه .

س/ كيف عرفت اسم الضابط الذى قام بضربك؟

ج/ علشان انا واقف فى المكتب عنده شفت اليافطة بتاعتة وكان مكتوب عليها اسمه.

س/ كم ضربة ضربها لك المشكو فى حقة مصطفى منصور؟

ج/ من كتر الضرب مكنتش مركزة كام ضربه.

س/ ماهو قصده من إحداث تلك الإصابات؟

ج/ هو كان بيضرب علشان اجيب المسروقات.

س/ ما هو وضعك اتجاه المشكو فى حقه أثناء اعتداءه عليك؟

ج/ انا كنت واقف وايدى فى الخلف والضابط بيضرب فيا وكتافى فى نفس المستوى.

س/ كام ضربة زوج المجنى علية؟

ج/ هو ضربنى بالشلوط مرة واحدة.

س/ ما قصدة من الإعتداء عليكى بالضرب؟

ج/ هو ضربنى علشان اجيب الحاجة.

س/ هل تم الكشف الطبى عليك؟

ج/ ايوة.

س/ هل استخدمت أدوات خلال اصابتك؟

ج/ هو الضابط مصطفى منصور إستخدم اداوات لضربى

س/ هل تم سؤالك فى ثمة محاضر؟

ج/ ايوة انا كنت بتسأل فى المحضرجنح القضية.

س/ هل يوجد سابقة خلاف أو معرفة بينك وبين النقيب مصطفى منصور؟

ج/ لا انا معرفهوش لغاية يوم الإثنين اللى فات.

س/ هل لديكى أقوال اخرى؟

ج/ لا