أدلى "محمود أ م" – 32 سنة - جزمجى ومقيم طنطا، باعترافاته أمام الرائد أحمد الحجار رئيس مباحث قسم ثان طنطا، تحت إشراف اللواء إبراهيم عبد الغفار مدير إدارة البحث الجنائى بمديرية أمن الغربية وبتوجيهات اللواء نبيل عبد الفتاح مساعد وزير الداخلية مدير أمن الغربية فى القضية رقم 152إدارى ثان طنطا، لسنة 2016 والمتهم فيها بإزعاج السلطات، حيث أجرى اتصالات هاتفية بشرطة النجدة من شريحة مجهولة وقدم بلاغات كاذبة بحدوث انفجار أمام المسجد الأحمدى ووجود قنابل فى 3أماكن بمدينة طنطا.
وقال المتهم: "كنت بتلذذ جدا وأنا بشوف القوات بتجرى فى الشارع عشان تتعامل مع البلاغات والأجسام الغريبة"، مضيفا "الأيام اللى فاتت دى وقبل الذكرى الخامسة لـ ثورة 25يناير لاحظت الضباط والأفراد مشدودين ومنتشرين فى شوارع المحافظة ودوريات الشرطة بتمشط الشوارع كل شوية عشان تواجه أى مظاهرات للإخوان".
وتابع، استغللت الاستنفار الأمنى ده وخطر فى بالى فكرة أنى أاشوف إزاى القوات بتتعامل مع الأحداث الطارئة وخاصة بلاغات القنابل والأجسام الغريبة، روحت اشتريت شريحة من سنترال وركبتها فى التليفون وشحنتها واتصلت بـ122 رقم شرطة النجدة وأول بلاغ قدمته قلت فيه الحقوا فى قنبلة بمستودع أسطوانات الغاز بشارع الحلو وقفلت الشريحة، ووقفت عند المستودع، وفى دقائق وصل مدير الأمن واللواءات والمدرعات وخبراء المفرقعات والدنيا اتقلبت والشوارع اتقفلت والناس بتجرى فى الشارع خايفة، فرحت أوى من جوايا لما شوفت الناس بتجرى خايفة فى الشارع والأمن وهو بيتعامل مع البلاغ.
وأضاف المتهم، أن فى البلاغ التانى، اتصلت بالنجدة ومقلتش على اسمى وبلغت أن فى جسم غريب بجوار كوبرى 6 أكتوبر بقرية إخناواى دائرة مركز طنطا، ورحت وقفت هناك عشان أشوف إزاى القوات هتتعامل مع البلاغ وغلق الكوبرى ومنع المواطنين من المرور.
وتابع المتهم، حبيت الموضوع جدا واتصلت مرة تالتة وبلغت، فى قنبلة اتفجرت بمنطقة الصحارة بمدخل قرية إخناواى دائرة مركز طنطا ووصلت القوات فى لحظات والدنيا اتقلبت فى البلد والناس خافت واتجمعت وكل دة وأنا مبسوط من جوايا.
واستطرد المتهم، آخر بلاغ قدمته يوم الجمعة اللى فات والمرة دى روحت عند مسجد سيدى أحمد البدوى وساعة الصلاة بلغت أن فى قنبلة انفجرت أمام المسجد ومدير الأمن جه وجميع قيادات المديرية وخبراء المفرقعات والناس فى المسجد لما شافت القوات كله جرى فى الشارع، وأنا واقف بعيد ومبسوط جدا من المنظر بتفجير جسم غريب أمام المسجد الأحمدى دائرة قسم أول طنطا عقب صلاة الجمعة، وآخر مرة كنت هقدم بلاغ اتقبض عليا.
كان اللواء نبيل عبد الفتاح مساعد وزير الداخلية مدير أمن الغربية قد وجه بتشكيل فريق بحث لكشف هوية مقدم تلك البلاغات وسرعة القبض عليه لما قام به من إزعاج للسلطات وإحداث حالة من الفزع للمواطنين، وتم وضع خطة بحث تحت إشراف اللواء إبراهيم عبد الغفار مدير إدارة البحث الجنائى بالمديرية برئاسة العقيد حلمى أبو الليل رئيس مباحث المديرية، ضم الرائد محمد نصحى والرائد هيثم الشامى والنقيب أحمد الحجار رئيس مباحث قسم ثان طنطا وتم ضبط المتهم واعترف بارتكابه للوقائع، لإشباع رغبة فى نفسه لمشاهدة القوات واهتمامها بالبلاغات.
تم التحفظ على الشريحة المستخدمة، وتحرر المحضر وقررت النيابة العامة حبس المتهم 4 أيام على ذمة التحقيقات.