ينشر "انفراد" التحقيقات الأولية التى باشرها المستشار محمد البشلاوى، الرئيس بنيابة شرق القاهرة الكلية، وبإشراف المستشار محمد عبد الشافى، المحامى العام الأول، مع على سيد فهيم أبو المعاطى الشهير بـ"سيد مشاغب"، المحبوس على ذمة عدة قضايا، والصادر ضده قرار بالحبس 15 يومًا على ذمة التحقيقات، لاتهامه بالاشتراك فى الهجوم على مبنى جهاز الأمن الوطنى فى 2 مايو 2013.
وقال على سيد فهيم أبو المعاطى الشهير بـ"سيد مشاغب"، فى تحقيقات النيابة: "فى الحقيقة أنا مليش علاقة خالص بالقضية دى ولا أنا كنت موجود فى مكان الواقعة، ولا كنت أعرف عنها حاجة وأنا عرفت الأحداث دى وشاهدتها من خلال التليفزيون زى كل المصريين، وكل الكلام اللى ذكرته التحريات بإنى كنت موجود يوم الواقعة، وإنى اللى دعيت ونسقت مع المتظاهرين مش حقيقى".
وأضاف "مشاغب": "وكمان أنا معرفش ولا واحد من اللى كانوا موجودين هناك عشان أتواصل معاه من الأساس، والدليل على كده كمان إنى كنت مع زمايلى بنجهز لترحال عشان نسافر تونس بعدها بيومين، لإن نادى الزمالك كان عنده مباراة فى دورى الأبطال بتونس، وكنا مشغولين بالتجهيزات النهائية قبل عملية السفر".
وأشار "مشاغب": "إحنا دورنا معروف منذ تأسيس رابطة الوايت نايتس إننا نشجع نادى الزمالك وبس، وكانت دى أول لبنة فى تأسيس الرابطة إننا مننخرطش فى السياسة ولا لينا دعوة بيها، وكمان مننتميش لأى حزب أو جماعة سياسية أو حزبية، وإن دورنا يقتصر على التشجيع فقط لا غير".
وتابع: "أنا بعتبر إنى من أسوء أعضاء الوايت نايتس حظًا نتيجة شهرتى، اللى جلبتلى المتاعب واتسببت فى إنه يتم الزج بيا فى أكثر القضايا اللى تم اتهامى فيها، وعشان كده بيتحط اسمى فى كل التحريات بدون بحث أو تمحيص، والدليل على كده إنه فى أحد الوقائع وهى الهجوم على قسم شرطة ثان مدينة نصر فى 2013، اتصل بيا عدد من ضباط مباحث القسم اللى يعرفونى وقالولى يا سيد امشى إنت والمجموعة اللى معاك من أدام القسم، ولما سألتهم قسم إيه ومجموعة إيه، واحد من الضباط حكالى اللى بيحصل، ولما قولتله إنى مش موجود معاهم وإن اللى موجودين عندكوا ملهمش علاقة بالوايت نايتس أصلاً، قالى لأ هما من الوايت نايتس لأن فى اتنين منهم لابسين فانلة نادى الزمالك، ساعتها أنا ضحكت فى التليفون وقولتله هو يا فندم معنى أنهم لابسين فانلة الوايت نايتس يبقوا من الرابطة، ما كل الناس بتلبس فانلة الزمالك، وانتهت المكالمة بينا بعد ما اتأكد إنهم مش من الوايت نايتس".
وأضاف "مشاغب": "أنا بس ذكرت الواقعة دى علشان أؤكد لحضرتك إنى وعدد كبير من زمايلى بيزج بينا فى معظم القضايا بدون دليل بناءً على التحريات، وأما بقية الاتهامات اللى تضمنتها التحريات زى الانضمام لجماعة إرهابية واستعراض القوة والشروع فى قتل عساكر بمبنى الأمن الوطنى وإتلاف المال العام، فدى كلها اتهامات ليس لها أى أساس من الصحة، وكل القضايا اللى اتعملتلى مكتوب فيها نفس الاتهامات دى بالإضافة للتهمة الأساسية اللى هى الهجوم على مبنى الأمن الوطنى".
تجدر الإشارة إلى أن النيابة العامة واجهت "سيد مشاغب" بالتحريات التى جاء فيها، أن "المتهم استجاب للدعوة التى أطلقها حسام أبو البخارى بالتوجه لمبنى قطاع الأمن الوطنى بمدينة نصر للتنديد بسياسته، ومحاولة التعدى على مقره والعاملين به، بحجة أنهم يمارسون أعمال قتل واغتصاب لعناصر التيار الإسلامى".
وأكدت التحريات، أن "دعوة حسام أبو البخارى التى ساهم فى نشرها سيد محمود جاب الله، محمد أحمد سعادة، مصطفى البدرى، هشام العشرى، ومحمود فتحى بدر، واتفقوا جميعًا على أن يتجمعوا أمام مسجد رابعة العدوية عقب صلاة العشاء، ورفعوا لافتات مكتوب عليها (كلنا أسامة بن لادن)، وتوجهوا لمبنى الأمن الوطنى وحاصروه ورسموا عليه (نجمة داوود)، واعتلى أحد المشاركين فى المسيرة وهو عبد الباسط الفشنى، سور المبنى، ونزع علم الداخلية وعلم مصر، ووضع مكانهما علم تنظيم القاعدة".