أهالى عزبة المفتى بالوراق يصرخون: "الحقونا.. آخر الشهر هنترمى فى الشارع.. ويؤكدون: "البيوت تحولت لوكر دعارة ومخدرات و"رايحين جايين على محافظة الجيزة ورئيس الحى ولا حياة لمن تنادى".. فيديو وصور

جدد أهالى شارع مدرسة الحداد الخاصة بالوراق، شكوتهم للمرة المائة من خطورة منزلين تقرر هدمهما وإزالتهما من قبل محافظ الجيزة اللواء كمال الدالى بعد تقرير من المهندس أسامة هدهد. وقال الأهالى إن حى الوراق ورئيسه محمد نور الدين لم يكمل إزالة المنزلين حتى النهاية، حيث تركوا الدور الأرضى دون إبداء أسباب، رغم تشديد محافظ الجيزة اللواء كمال الدالى على الانتهاء من أعمال الإزالة والهدم. ومن أمام مبنى محافظة الجيزة، قال شحاتة شاكر أحد المتضررين: "جينا أكثر من 20 مرة كل ما نيجى مش موجدين محدش بيعملنا حاجة خالص وأدينا لايصين اهو". والتقطت منه خيط الحديث مدام منى قائلة: "عاوزين حد يشوفنا لازم مسئول يتصرف، آخر الشهر ده هنترمى فى الشارع بقالنا سنة مأجرين شقق بعد ما بيتنا حصل له هبوط أرضى، وقرروا يهدوه، المحافظة صرفت لنا 500 جنيه لمدة كام شهر وبعد كده وقفو الفلوس"، متابعة: "صاحب البيت هيرمينا فى الشارع لو مدفعناش، عاوزينهم يكملوا هد البيت ويسلمونا الأرض فاضية". واستطرد حمادة أحد أصحاب المنازل التى لم يتم هدمها بعد، قائلا : "سبب الهبوط المجارى، المحافظ قال هيهد على حساب المحافظة ويسلمنا الارض فاضية وهيدينا إيجار لحد ما نرجع بيوتنا، الإيجار اتمنع عننا، البيوت دلوقتى اصبحت مقلب زبالة ووكر للدعارة والمخدرات ومحدش يقدر يفتح "بقه" واحنا رايحين جايين على المحافظة ومحدش بيعملنا حاجة". وأضاف : "المسؤولين عمالين بيرمونا لبعض وحى الوراق معملش حاجة، قالولنا شوفوا متبرعين، جينا لعبد الرحمن الشهاوى سكرتير المحافظ كلم رئيس الحى وبرضو معملش حاجة.. الحى قال المقاول مخدش فلوس وله متأخرات 150 الف جنيه ، والمقاول بيقول أنا عاوز ورقة بس أثبت بيها حقى والحى مش عاوز يعطى له حاجة"، وإحنا تعبنا وهنترمى فى الشارع". وقالت مدام منى إن هذا الأمر من 16 مارس 2017 ، متابعة: "آخر الشهر ده هنترمى فى الشارع ، احنا عاوزين نعرف سبب هبوط البيت، المحافظة قالت ان الصرف الصحى مش هو سبب الهبوط وإحنا نزلنا لجنة"، قائلة: "احنا بنشكك فى اللجنة دى، عاوزين لجنة تانية تقول الحقيقة او يورونا التقرير ، وعاوزين نعرف من المسؤول عننا ، احنا اما نقعد فى الشارع ومعانا اطفال ومعانا بنات ازاى ينفع يعنى هيرضيهم، قالولنا روحوا للنائب سعد بدير ، والنائب قال هعمل ومعملش ، وبطل يرد على تليفونه، وأدينا مرميين فى الشارع. ومن هناك إلى هنا، حيث شارع مدرسة الحداد الخاصة بعزبة المفتى، أشار شحاتة شاكر إلى القمامة التى ملأت الشارع وحولت البيوت لمقالب زبالة، قائلا " :يرضى ربنا كده ، فين فلوس الضاريب اللى بيخدوها، 5 شهور مخدناش فلوس وهنترمى فى الشارع ". وقال حمادة : "مش عاوزين يكملوا هد، وخدوا عدادات المياه والغاز ورغم كده بيجيلنا إيصالات غاز، الأرض مازالت تهبط وفى مدرسة ممكن الأطفال تتعرض لخطر ومفيش مسؤول متحرك .. العواطلية بياخدوا حقن ومخدرات بالليل، عاوزين حد ينجدنا". يذكر أن محافظ الجيزة اللواء كمال الدالى، كلف رئيس حى الوراق محمد نور الدين، بإزالة المنازل الآيلة للسقوط بشارعى مدرسة الحداد الخاصة وصلاح بشير بالعروبة فى منطقة عزبة المفتى، إثر هبوط أرضى وقع بمنطقة عزبة المفتى بالوراق، الأمر الذى أدى لتصدع 11 منزلا، منها 3 منازل تضررت بدرجة كبيرة، وتم إخراج السكان منها لحين هدمها، وذلك منذ 16 مارس الماضى.