أكد النائب إلهامى عجينة، أنه من معجبى الفنانة سما المصرى، وأنه ليس لديه مانع من أن تتحول إلى مقدمة برامج أو بطلة كليبات، موجهًا رسالته لها: "تعالى نعمل برنامج مع بعض".
وأضاف عجينة، خلال تصريحات تليفزيونية، "لا أنا ولا سما المصرى ينفع نتكلم فى الدين، الدين له ناسه، ما فيش أى مشكلة ما بينى وما بينها ولا عمرى شفتها ولا أعرفها".
وتابع عجينة، موجهًا حديثه لـ"سما المصرى"، "أنا مقولتش احتشمى أنا لا جوزك ولا أخوكى.. دى حاجة تخصك وأنا من معجبينك يعنى، وتعالى نقعد ونتفق سوا على برنامج"، لترد المغنية قائلةً: "أنت كده هتطفش منى جمهورى، الجمهور عايزنى لوحدى".
ورفضت سما المصرى ذكر اسم القناة، مضيفة: "هنعمل مؤتمر صحفى الأسبوع المقبل نعلن فيه كل التفاصيل، البرنامج قضاياه اجتماعية وأخلاقية عن عقوق الوالدين، وهنجيب رجال دين وعلماء من الأزهر، يقولوا رأى الدين فى هذه المشاكل".
وتابعت: "أنا مش شايفة الموضوع مناسب ليا خالص، لكن أنا واخدة الموضوع تحدى لنفسى، أنا الفكرة عجبتنى، والقناة اختارتنى عشان هعمل قلق ونسب مشاهدة، وأنا كده كده هعمل قلق، لكن أنا عايزة أقدم حاجة مناسبة".
وواصلت: "الموضوع قالب بكوميديا على السوشيال ميديا، وأنا من أمبارح عمالة أضحك ومش مصدقة إنى أقدم برنامج دينى، المشكلة اللى بينى وبين القناة إنهم عايزينى ألبس حجاب، أنا شايفة نفسى أنى ملتزمة والحقيقة مش هقدر التزم أكتر من كده".