ينشر "انفراد" أقوال المواطن حمدى أحمد صادق أحمد، فى اتهام النائب محمد المسعود عضو لجنة السياحة والطيران المدنى بمجلس النواب، بالتعدى عليه بالضرب وسحب سيارته الملاكى منه .
وقال "صادق" خلال التحقيقات التى باشرها المستشار محمد عبد السلام المحامي العام الأول لنيابات شمال الجيزة فى القضية المقيد برقم 6036 لسنة 2016 بلاغات النائب العام، أنه قام بشراء سيارة كيا سيراتو عام 2011 موديل السنة من معرض محمد أحمد المسعود، حيث قام بدفع مبلغ مالى يقدر بـ38 الف جنيه كدفعة أولى، و 5 الأف جنيه لبوليصة التأمين، فضلاَ عن الفى جنيه رسوم تسجيل السيارة بإجمالى 45 الف جنيه .
وأضاف "صادق": " فى الوقت ده أنا استلمت السيارة وبعدها بأسبوع تقريباَ حصلت ثورة 25 يناير 2011، وكترت حالات التعدى على الناس فى الطرقات خاصة سرقة السيارات، وده خلانى أفكر مليون مرة إزاى احافظ على العربية، لغية ما قررت اخزنها فى أحد الجراجات الموجودة بجوار مديرية أمن الفيوم وجوار سكنى، وأحداث الثورة اتسببت فى انى مدفعش 3 أقساط للعربية" .
وتابع: "لكن الحاج محمد المسعود استدعانى بصفة ودية عشان يحل أزمة التأخير فى دفع الأقساط، وده لإنى على صلة به من 25 سنه، وحكيتله على الأسباب اللى خلتنى أتأخر فى دفع الأقساط، وبعد ما طمنى إنه مش هيرفع ضدى أى بلاغات أو محاضر، جيت أمشى ملقتش العربية خارج المعرض بتاع بولاق أبو العلا زى ما سبتها، ولما رجعت عشان استفسر عن العربية السكرتارية عنده بلغونى وقالوا ( الحاج بيقولك مفيش عربيات عندنا واحنا عربيتنا عندنا وفلوسك عندك واتفضل امشى من هنا)، ولما اصريت ءاقابله بلغونى أنه انتقل الى معرضه فى سفنكس" .
واستطرد: "وبالفعل اتحركت على معرض سفنكس وأنا مش عارف اعمل ايه، وأول ما وصلت وطلبت ءأقابل الحاج-فى إشارة للمسعود- قام المساعد بتاعه ويدعى عمى رضوان بالتعدى عليا وسحلى، ولما بدأت أزعق لقيت الحاج خارج من مكتبه وقالى أمشى من هنا وضربنى على وشى بالقلم، رحت اتجهت لقسم شرطة العجوزة وحررت محضر بالواقعة، وبعدها سافرت الفيوم، وحصلتلى اصابة خليتنى معرفتش بسببها اتابع الموضوع وفى الوقت ده أنا كنت بتابع المحضر اللى كنت مقدمة ضده، ولإن نفوذه كتير المحضر متحركش من القسم" .
وأكد: "مع مرور الأيام عرفت إن الحاج محمد المسعود هيخوض الإنتخابات، ساعتها وصلتله رسالة بإنى هوصله فى أى مكان هيعمل فيه دعاية، وعشان يقدر يخوض الإنتخابات من غير مشاكل أو بلبلة أجرى بى هو وزوجته اتصالاَ هاتفياَ لمعرفتى المسبقة بهم، وطلب مقابلتى وبالفعل اسجبت له، واقنعنى انه هيحللى مشكلتى مقابل التنازل عن المحضر، حتى يتمكن من خوض الإنتخابات من الناحية القانونية، وإنه هيدينى عربيتى" .
وأضاف: "وحينما انتهى الحاج المسعود من خوض الإنتخابات عن دائرة بولاق أبو العلا، ونجح فى الدائرة، لم يعاود الإتصال بى مرة أخرى عشان يوفى بوعده لىَ، قٌمت مقدم البلاغ ده ضده، وده كل اللى حصل" .
من جانبه، أكد مصدر قضائى فى تصريح لـ"انفراد" أن نيابة العجوزة باشرها المستشار محمد عبد السلام المحامي العام الأول لنيابات شمال الجيزة، من المقرر أن تتخذ الإجراءات القانونية لإستدعاء النائب محمد المسعود، عضو لجنة السياحة والطيران المدنى بمجلس النواب، للإستماع لأقواله والتأكد من صحة الواقعة من عدمها، ومواجهته بالمستندات التى قُدمت للنيابة العامة .