بالصور.. ننشر نص كلمة "أبو هشيمة" خلال افتتاح عزبة النصارى بالمنيا بعد إعادة إعمارها

افتتح رجل الأعمال أحمد أبو هشيمة، رئيس مجلس إدارة مجموعة حديد المصريين، اليوم الاثنين، "عزبة النصارى"، التابعة لمركز سمالوط بمحافظة المنيا، بعد الانتهاء من إعادة إعمارها، بحضور الدكتور أحمد زكى بدر وزير التنمية المحلية، والدكتور محمد مختار جمعة وزير الأوقاف، والدكتور أشرف العربى وزير التخطيط، واللواء عصام البديوى محافظ المنيا. وفيما يلى النص الكامل لكلمة رجل الأعمال أحمد أبو هشيمة: بسم الله.. صباح الخير عليكم وعلى كل المصريين.. أهل عزبة النصارى وصباح الخير على كل أهل "عروس الصعيد" محافظة المنيا فى البداية أحب أوجه خالص الشكر لسيادة الرئيس عبد الفتاح السيسى وصندوق تحيا مصر على رعايتهم لمبادرتنا "إعادة إعمار القرى الأكثر احتياجاً بصعيد مصر".. الرئيس عبد الفتاح السيسى هو فعلاً المثل والقدوة والمحفز على استمرار المبادرة. وأوجه الشكر للدكتور أحمد زكى بدر وزير التنمية المحلية على دعمه المستمر وحرصه على دعم المبادرة، وهنا أريد أن أذكر موقفا لمعالى الوزير، لما رحنا نفتتح القرية اللى فاتت فى شمال سيناء وأنتو عارفين المخاطر اللى هناك.. هو كان أول واحد قدامنا. وأنا سعيد جداً بتشريفه افتتاح القرية التاسعة فى مبادرة إعادة إعمار القرى، ودى تانى قرية تشملها المبادرة فى محافظة المنيا، الأولى كانت قرية الشيخ فضل بمركز بنى مزار. كل الشكر أيضاً للقيادات المحلية والتنفيذية بمحافظة المنيا، وعلى رأسهم الأستاذ عصام البديوى محافظ المنيا، ومساعد وزير الداخلية مدير أمن المنيا اللواء فيصل دويدار. وكل مرة بحب أوجه خالص شكرى للسادة الإعلاميين ممثلى القنوات الفضائية والصحف والمواقع الإلكترونية اللى بيبذلوا معانا مجهود كبير وعمرهم ما اتأخروا لحظة فى كل قرية رحناها، فى بنى سويف وفى سوهاج وأسيوط وقنا والمنيا وسيناء.. كل الشكر ليهم ولمؤسساتهم المحترمة. وأكيد بشكر شركاءنا فى النجاح جمعية الأورمان، وعلى رأسهم المهندس حسام القبانى، واللواء ممدوح شعبان. بصراحة أنا أكتر حاجة بتسعدنى وإحنا بنفتتح قرية جديدة فى مبادرة إعادة إعمار القرى الأكثر احتياجاً إننا بنبقى حددنا القرية الجديدة اللى حنكمل بيها المشوار، فإحنا جايين وكلنا حماس وأمل وتفاؤل بالمستقبل عشان نوصل لمحطة جديدة فى المبادرة. وبالمناسبة دى أحب أعلن إن القرية العاشرة فى المبادرة هتكون قرية توشكى بمركز نصر النوبة فى محافظة أسوان. إحنا عندنا أمل وحماس الحمد لله عمره ما بيقل ولا بينقص فى المشروع ده، بالذات من أول ما بدأنا المبادرة مع جمعية الأورمان فى يونيو 2014 لحد دلوقتى. إحنا بإعادة إعمار قرية عزبة النصارى يبقى وصلنا للقرية رقم تسعة، وإن شاء الله مكملين لحد ما نوصل للقرية رقم 40 زى ما حددنا فى خطة المبادرة، وأنا من دلوقتى بقول حتى لما نخلص الأربعين قرية حنكمل تانى وحندور على 40 قرية تانية فى مصر. مصر يا جماعة مستحيل تنهض غير لو إحنا حطينا أيدينا فى أيدين بعض.. الحكومة مش حتقدر تعمل كل حاجة لوحدها.. والشعب لو مكنش فى ضهر الدولة وبيشتغل ويبنى معاها عمرنا ما حنتقدم. مع بعض إحنا دايما أقوى.. مع بعض بلدنا مصر حتكون دايماً فى الصدارة وقد الدنيا.. تحيا مصر!