قال الإعلامى باسم يوسف على صفحته الشخصية على الفيس بوك، بمناسبة السجون اللي اتكلمت عنها في البوست اللي فات، فإن معدل بناء السجون في مصر، سجن جديد كل ٤ شهور تقريبًا، وتكلفة السجن الواحد حوالى ٧٥٠ مليون جنيه، يعني بمعدل ١٨٧ مليون و ٥٠٠ ألف جنيه شهريا.
أضاف باسم، نقدر نعتبر كل مواطن صبح على مصر باتنين جنيه كل يوم، خدوا منهم جنيه لمصر، والتاني خلوا مصر تبني لنا بيه سجون، جاء هذا تعليقا على مبادرة الرئيس عبد الفتاح السيسى التى أطلقها امس ، " صبح على مصر بجنيه".
أضاف باسم ، مافيش حد أبدا ممكن يستخسر أنه يقوم يصبح على بلده بجنيه وعشرة ومية كمان. بس قبل ما تطلبوا مننا ده تعالوا نتحاسب.. نتحاسب على "التصبيحة" بتاعة الـ٦٤ مليار جنيه بتاعة قناة السويس اللي قلنا إنها فلوس في الأرض وأننا مش محتاجينهم دلوقتي وأنها حتسحب الاحتياطي المصرفي بتاع الناس في ظل تباطؤ الاقتصاد العالمي وحنبلس فى الحيط. والنتيجة؟ لبسنا فى الحيط عشان خلصنا دولارات البلد على حفر ع الناشف بدون أي عائد حقيقي.
نتحاسب على صرف مبالغ مرعبة على بناء سجون هي الأكثر والأكبر في قارة أفريقيا والصرف على منظومة أمنية أقل ما توصف أنهم مش بوليس دول مافيا بتعذب الناس و تحبسهم و ترعبهم في بيوتهم، يعني ينفع أصبح عليك بجنيه تصبح عليا برصاصة ؟
ينفع تحبس أهالي الناس و أصحابهم و تقولهم صبحوا؟ ما يصحش كده..نتحاسب على فلوس مبارك اللي أوروبا باست أيدينا عشان نرجعها، لكن لا، إزاى؟ إحنا نسحب منك جنيه على الموبايل و نصيبنا خالص من مليارات المفروض هي حقنا.
نتحاسب على الملايين اللي اتصرفت على أكبر نكتة في العصر الحديث "جهاز الكفتة"، المراكز اللي اتجهزت و المصاريف المرعبة اللي انصرفت على كذبة ماحدش أتحاسب عليها لغاية دلوقتي ..نتحاسب على الفلوس اللي اتصرفت على رفع مرتبات و معاشات و بدلات و مكافات القضاء و العسكريين و الشرطة مرة و اتنين و تلاتة، قولهم هما يصبحوا على مصر
نتحاسب على الضرايب اللي بالمليارات اللي مش بتدفعها اكتر من جهة سيادية و اللي اثبتها تقريرالجهاز المركزي للمحاسبات. لكن طبعا الجهاز عميل و اخوان فمش حتاخد على كلامه .
نتحاسب على الكهربا و الميه و الضرايب و الرسوم اللي مش بيدفعها الجيش على مشروعات استثمارية و بالقانون وآخرها ٦٤ منشأة تم إعفاؤها من الضرايب وش كده منها دور حضانة و مطاعم و فنادق، يعني مش بس هما مش عايزين يصبحوا لا دول بياخدوا مميزات و أفضليات على اي مستثمر في السوق و مش حيقدر ينافسهم. فأنت و لا صبحت و لا خليت الاستثمار في حاله.
نتحاسب على الفلوس اللي ضاعت من مصر بسبب هروب السياح منها عشان انت طلعت ضربت سياح بطياراتك في الصحرا و عذبت طالب طلياني و قتلته و فلقتنا بالأمن و الأمان و مش عارف تأمن مطاراتك فانضربت طيارة و اتفضحت في العالم كله، شوف بقى السياحة كانت حتصبح بكام؟
فيه خمسين حاجة تانية نتحاسب عليها قبل ما تقولنا صبحوا بس الواحد زهق أنه يكرر نفس الكلام،فتعالى نتحاسب على اللي فات ده الاول قبل ماتقولي نصبح او تضطر يا عيني تبيع نفسك.