كشف إسلام الشاطر لاعب الأهلى السابق والإعلامى الحالى، عن سبب منعه من السفر هو نسيانه التصريح الخاص به وليس بسبب الانتماء إلى أى فصيل سياسى، مؤكدا أن أمن المطار تعامل معه باحترام وحرفية كاملة.
وكتب الشاطر عبر حسابه الشخصى على فيس بوك: "النهاردة كنت مسافر مدريد الصبح فى طيارة ٩ ونصف، وصلت المطار طلعت الشنطة الطيارة وأنا بقدم الباسبور قالى الضابط المسئول فين تصريح السفر، دورت فى الشنطة اتضح انى كنت ناسى تصريح السفر، سألته قلت له يا باشا أعمل إيه؟ قالى قدامك حلين الأول انك تروح تجيب التصريح وتيجى قبل الطيارة أو تأجل السفر لتانى يوم، وبما أن طائرتى كانت ٩ ونصف وأنا كنت هناك حوالى ٨ ونصف فأجلت السفر وبكره أن شاء الله مسافر".
وتابع الشاطر: "كل الضباط المتواجدين تعاملوا معايا بمنتهى الاحترام والحرفية وحاولوا يساعدونى بكل الطرق، لكن كل تأخيره وفيها خيره، دا اللى حصل النهاردة فى المطار الصبح، حبيت أوضح لأن فى ناس كتير اتصلت بيا تقولى هوا انت اتمنعت من السفر ليه، لقيت حد بيسألنى يعنى هوا انت تنتمى لأى فصيل سياسى عشان كدا اتمنعت من السفر، الحقيقة مردتش عليه وفضلت أضحك، شكرًا لكل من سأل عليا أنا تمام الحمد لله، والمرة الجاية اللى يكلمنى يبقا يجى بعيش وحلاوة".
وكانت سلطات الجوازات بمطار القاهرة الدولى قد منعت إسلام الشاطر من السفر إلى أسبانيا، وذلك لعدم حصوله على إذن التجنيد.