مش لازم براند.. حملة رخيص بس شيك تجتاح السوشيال لشراء ملابس رخيصة وأنيقة

شاركت عشرات الفتيات فى هاشتاج جديد، ظهر أمس على مواقع التواصل الاجتماعى، وهو "رخيص بس شيك"، والذى تحول فى ساعات قليلة إلى "ترند"، غزا السوشيال ميديا، حيث امتلأ الهاشتاج بالعديد من صور الفتيات اللاتى يرتدين ملابس رخيصة الثمن، لكن لا يبدو ذلك عليها، وقد شاركت عشرات الفتيات، تجاربهم، مع شراء الملابس رخيصة الثمن، ولكنها أيضا تبدو أنيقة و"شيك" فى ذات الوقت، وهو ما جعل الكثير من رواد مواقع التواصل الاجتماعى، يشاركون تجاربهم على هذا الهاشتاج. الفتيات تحدثن فى "الهاشتاج"، عن تجاربهم فى شراء ملابس من أماكن بعينها تبيع بأسعار قليلة للغاية تصل إلى 50 و100 جنية وربما أقل من ذلك، وأيضا تحدثن عن تجارب أخرى بشراء الملابس "البراندات"، والتى تكلفهن الكثير من الأموال، رغم أن الفارق فى الشكل لا يبدو كبيرا. روان أشرف شاركت فى الترند وقالت "الفستان ده خامته تحفة وتقيل ومش بيوبر ولا بينتش من الغسيل وبجد يعتبر أكتر حاجة مفضلة ليا فى الشتا و بـ100 جنيه بس .. ملحوظة، انا لقيت الفستان رخيص جبت عليه إسورة بـ150 جنيه، يغمضليش عين غير لما اخد علي قفايا". فيما قالت كنز، "عايزة أقول إن الشياكة عمرها ما كانت بالبراندات والناصح اللى يعرف يبهر اللى قدامه مش اللى يعرف يدفع أكتر.. أنا بحب اللبس جداً بس معظم لبسى مش غالى ولا من براندات وما بحبش أجيب حاجة سعرها خيالى وأكتر الحاجات اللى بتسأل عليها هى الحاجات الرخيصة، زى الفستان دا مثلاً بـ 80 ج وبموت فيه عادى". بينما شاركت حبيبة وقالت "بمناسبة التريند دة الشميز الابيض دة بـ20 جنيه والكارديجان بـ25 جنيه.. والدريس الاسود بـ45.. والبلوفر الجراى بـ25.. البلوفر الابيض والبلوروه النبيتى الاتنين بـ30 جنيه، والسويت شيرت الابيض بـ50 جنيه بالتيكيت، والكارديجان الجراى ب،35 والهايكول اللى تحتيه بـ25". وقالت آيه "بعيداً عن التريند وكدا يعني من ألطف الحاجات اللي شوفتها بجد.. البنات متصالحين مع نفسهم جداً اللي هو انتي كدا كدا جميلة ايا كان اللي بتلبسيه براند بـ1000 ولا بلوزه بـ10 انتي كدا كدا حلوه.. البنات عملت هاشتاج رخيص بس شيك كل واحده فيهم بتورينا ارخص حاجة اشترتها وقد اي هي رخيصه وحلوه ومريحه وبلاش فشخره علي الفاضي وهاتوا حاجات رخيصه والبسوها عادى وحاجات لطيفه جداً".