"منى" جسدت حياة الحارة المصرية وطقوس الأعياد والمناسبات بمجسمات مصغرة

عشقها لتراث بلدها دفعها إلى تجسيده بأدق تفاصيله من خلال تصميم مجسمات تتحدث عن العادات والتقاليد المصرية، كما جسدت دفء البيوت في الأحياء الشعبية واهتمت بالتعبير عن عادات المصريين في شهر رمضان والأعياد. هي منى حسن حنفى، خريجة كلية فنون جميلة، التي اتخذت فن المصغرات وسيلة للتعبير عن الجمال الذى تراه حولها. تحدثت منى حسن، لـ" انفراد"، عن اتجاهها لتعليم فن المصغرات، حيث قالت :" اتجهت لفن المصغرات لأن ممكن من خلاله أقدر أعبر عن أي حقبة تاريخية أو مكان وتصميم بأدق تفاصيله، وكمان أنا مؤمنة بأننا نقدر نستغل الفن في التعبير عن تراثنا وثقافتنا، عشان كده اتعلمت فن المصغرات من خلال دورات عبر الإنترنت، وأقدرت أطور من نفسى بعد فترة ". وعن تصميمها للبيوت المصرية وطرق احتفال المصريين بالمناسبات الدينية في الأحياء الشعبية، قالت :"بحب استوحى افكارى من الواقع وكان دايماً بيلفت نظرى تفاصيل الديكور الغربية لكن مع الوقت أدركت أن الفن المصرى وحضارتنا أفضل مليون مرة وغنى بالتفاصيل المميزة، عشان كده أستوحيت أفكارى منها في تصميم المصغرات وعبرت عن احتفال الأحياء الشعبية في المناسبات الدينية وديكور البيوت المصرية من صناعة الكحك فى البيوت وخبز الكحك في الفرن ومظاهر الاحتفال في الشارع زى لعب الأطفال بالمراجيح والبالونات وتنزه الأسره فى الحدائق وزودت المجسمات بإضاءة لتعبر أكتر عن الواقع". تابعت :" استوحيت أفكارى في تصميم المجسمات من الحضاره المصرية وحارس المعبد وحبيت إنها تكون مميزة وصممت درج أنيق، وصممت صندوق خشبى صممت بداخله المنازل القديمة المصرية والجدران مرسوم عليها الكعبة وعِبارات تهنئة الحجاج القادمين من الحج وزينت الصندوق من الخارج بزخارف مصرية وكل جزء صممته يدوياً من أريكة وسجادة ومجموعة من الأشخاص عشان يكون أقرب للواقع". وعن الصعوبات التي واجهتها خلال تصميم الصندوق، قالت :"كل تصميم وله صعوبته وممكن أعيد مرة وأتنين وتلاتة، لحد ما أوصل للتصميم اللى عايزاه، والأدوات اللى بستخدمها بتكون أدوات نجارة زى المنشار والخشب و خامات تانية بتساعدنى أوصل للتصميم اللى عايزاه". وعن طلبات الزبائن، قالت :"أغلب الطلبات بتكون عن تصميم مكان له ذكرى عند العميل وفيه عملاء بيكونوا حابين تصميم مصغر لأفيش فيلم أو مشهد منه، أو الأدوات الموسيقية". وأنهت منى معبرة عن الأمنية التي تحلم بتحقيقها في المستقبل، حيث قالت:" نفسى فى المستقبل أنفذ تصميمات أكتر عن تراثنا عشان أعرف العالم والأجيال الجاية على ثقافتنا وعاداتنا".