(وأنا كمان).. أكتر كلمة بيقولها معظم المصريين بعد كم الألفاظ الغريبة اللى هجمت علينا كالطير الأبابيل. (وأنا كمان) بتتقال ردًا على شكوى من طرف آخر. وطبعا دى بتكون غلطة اللى بيشتكى لأن فعلا الشكوى لغير اللة مذلة وخصوصا الأيام دى.
والغرض من الكلمة بيختلف لما يقولها الراجل أو تقولها الست.
يعنى الست تقولها بغرض منع الحسد.. لما واحدة تشتكى من زوجها مثلا وأد إيه هو قاسى عليها وبخيل معاها تلاقى التانية بقدرة قادر اتحولت من امرأة سعيدة إلى امرأة تعيسة بكلمة (وأنا كمان) وخدى وراها بقى مليون شكوى من جوزها الغلبان اللى قاعد فى البيت لا بيه ولا عليه وعامل كل اللى يقدر عليه.. تلاقى مراته حولته لاشكيف مخيف..بغرض انها تمنع حسد زميلتها المسكينة اللى عايزة تفضفض بكلمتين.. وتتقلب الآية وتلاقى القاعدة كلها على الغلبان اللى ماعملش حاجة غير أنه جوز واحدة بتخاف من الحسد.
ولو واحدة بتحكى عن مرض أصابها أو أصاب أحد أولادها مرض عادى، فجأة تلاقى الثانية بتتكلم على أد إيه اولادها عيانين ودور البرد مدمرهم وهى قلقانة ألا يكون فيه حاجة لا قدر الله.. حاجة زى إيه مثلا ! واحد مناخيرة مسيبه على البحرى حيكون عنده بواسير!
أما الراجل بقة فدا حكايته حكاية.. يقول (وأنا كمان) أول ما مراته تقول (أنا تعبانه).. تلاقى فجأة أمراض الدنيا عنده مع أنه كان زى الجن من ثوانى.. طبعًا هو بيقولها خوف وتهرب من أن المسكينة تطلب منه أنه يساعدها أو حتى فكرة إنه يعمل حاجته بنفسه.
بمجرد أن الست تتعب وتقول (أنا تعبانة وعندى برد) ومفيش حاجة فى دماغها إلا أنها تتكلم بس وتفضفض. تفاجأ بزوجها داخل عليها وهو واقع من طوله.. تتخض المسكينة (مالك يا بنى) يرد بكل سهتنة واستهواك (أصل جالى دور برد وتعبان جدًا) وقبل ما يديها فرصة تفكر أو تسأل جاله أمتى.. يطلب منها لمون وأدوية وعسل ومش قادر أكل وطبعًا بيكون رازع الغدا من برة.. وجرى على السرير لافف نفسه ويكلم خلق الله كلهم يقولهم أنه تعبان علشان المسكينة تسمع فتعتقه لوجه الله.
بجد كل واحدة تحصلها حاجة تكتمها فى قلبها.. لأن مفيش حد حيسمعلك ولا حيهتم بيكى إلا أمك.. ولو مش موجودة ليكى رب اسمه الكريم، احكيله واشكيله براحتك هو حيسمع ومش حيقفل بابه. ولو عندك صاحبة زى دى قاطعيها بينك وبينها السلام بس ولو عندك جوز زى ده اعتبريه جوز هند يادوب يترش على وش الرز بلبن.. يعنى ما تحاوليش تعتمدى عليه فى ازماتك بس سيبيه يمكن ينفع.
متجيش على نفسك كتير.. ما تسمعيش لواحدة مش بتسمعلك.. ما تديش فرصة لحد ينكد عليكى.. ما تكلميش كتير لأن الناس بيصطادوا من الكلمات.. اشغلى نفسك بحاجة مفيدة.. بلاش مجلس النميمة اللى حيودينا فى داهية.. القراءة القراءة القراءة حتى لو ميكى جيب.. جوزك لو تعبتى حيتخنق منك بعد شوية.. حافظى على صحتك.