منة الله جابر تكتب: المخاوف

كلنا عندنا مخاوفنا فى الحياة لانه ببساطة مفيش حد فينا مبيخافش كلنا عندنا كوابيس بنشوفها بليل كلنا عندنا احلام يقظة احلام فعل مش قادرين نحققها او يمكن خايفين اننا نحققها كلنا بشر وأعتقد أن الخوف هو غريزة خلقها ربنا جوانا يمكن تكون سبب فى أننا ننجح فى الحياة. كان فى مثل بيقول اللى يخاف من العفريت يطلعلوا .. لما قعدت افكر فى الموضوع ده لاقيت إن ربنا قال أنا عند حسن ظن عبدى بى يعنى احنا لما هنتفائل ونثق فى ربنا ربنا هايبقى عند حسن ظننا زى ماوعدنا وهيدينا على اد التفائل والثقة دى واننا لما نخاف من العفريت مع ثقة ان ربنا هينجينا منه اكيد مش هيطلعلنا ولا حاجة . أنا عندى إيمان قاطع أن الخوف هو درجة من درجات النجاح اللى لازم نعدى عليها أنت لما تخاف وتبدأ تواجه خوفك وتتغلب عليه هتنجح ! أنا كمان بخاف جداً ولعل أهم مخاوفى فى الحياة هى المستقبل ..! أنا بخاف من بكرة لأننى ببساطة مش عارفة بكرة مخبى ايه .. طبعاً المستقبل ده بإيد ربنا وانا دايماً متأكدة ان ربنا شايلى الخير حتى فى وسط الحزن والزعل بس لانى مش ملاك فانا بخاف من بكرة لانى بخاف الفشل .. كلنا بنفشل ولما بنفشل بنتعلم فبنكرر التجربة فبننجح بس مع الاسف فى حاجات وده اعتقاد شخصى منى مينفعش فيها الفشل ..! لان احياناً الفشل بياخد مننا ومن روحنا حتة ولما بنرجع نبدأ الطريق بنبقى ناقصين تايهين وتبدأ التساؤلات انا لما كنت كاملة فشلت طب ودلوقتى ايه نسبة النجاح ومين فيهم كفته اكبر مين فيهم احتمال انه يطغى اكبر ؟! احنا ممكن نفشل فى اهدافنا فى شغلنا كل ده بيساعدننا اننا نبدأ من الاول واحنا متعلمين درس جديد ممكن نفشل مع ناس بنحبهم ممكن نفشل مع صحابنا لكن صعب اوى نفشل فى جوازنا نفشل مع عيالنا نفشل مع نفسنا ! صعب انك تختار انسان وتقرر تعيش وتكمل معاه وتفشل بعد ماتبنى احلام وترسم فى خيالك حياة وتفتح عينك تتصدم بالواقع وتحاول مرة واتنين وتلاقى الفشل هو حليفك الاول والاخير وتقرر انك تبدأ من جديد لكن بتتصدم اد ايه روحك بقت مرهقة تايهة معندهاش اى طاقة انها تكمل فكرة ان تتعرف على انسان من اول جديد وتبدأ تعرفه انت مين بتبقى مرهقة . يبقى فى بينك وبين الجواز حاجز نفسى اتبنى حاجز عشان تهده ممكن تاخد سنين ومع الاسف بيكون برضو فى احتمال بالفشل .... الاطفال ان يكون عندك اطفال تبدأ تربيهم وتعلمهم وتديهم من روحك ووقتك ومبادئك ومع الوقت يخرجوا للحياة وينسوا كل اللى شربوه منك وتلاقى نفسك بمنتهى البساطة فشلت .. فشلت انك توصلهم لبر الامان فشلت انك تحقق معاهم ولو جزء صغير من احلامهم فشلت ان الضحكة متفضلش مرسومة فشلت لما تشوف دموعهم لانك حوطت عليهم والحياة اديتهم على دماغهم فشلت لما تكتشف ان الناس اللى حواليهم مش فاهمينهم لانك ببساطة ربيتهم صح اوى فى زمن غلط .. احياناً بيكون الفشل انت مع نفسك لما توعدها انك هاتبقى قوى وتخذلها فى لحظة ضعف او توعدها انك هتوصل لاحلامك وتزهق فى نص الطريق او لما توعدها انك هتلاقى اللى يشبهها وفجأة تلاقى فى حياتك حد مختلف عنك مليون درجة وترجع بليل لقوقعتك الضلمة وتبدأ تصارحها بحقيقتك وتتصدم انك فشلت فى كل حاجة وعدتها بيها حتى انك تبقى كويس .. مخاوفنا بتختلف من شخص لاخر وكل شخص فينا ليه اسلوبه وطبيعته فى التعامل مع المخاوف دى احياناً بحس انى بتعامل مع مخاوفى بطريقة صح لانه بمنتهى البساطة لحد دلوقتى انا مجربتش الفشل الحقيقى وكل مرة وقعت فيها قدرت انى ارجع اقف على رجلى اقوى من الاول وانجح مع بعض الدروس المستفادة ... الحياة مش سهلة وعادى لما نخاف بس النجاح الحقيقى هو لما نقف قدام المراية ونواجه نفسنا بمخاوفنا بيقولوا فى علم النفس ان الاعتراف بالمشكلة هو بداية العلاج وبرضو الاعتراف بخوفنا هو بداية النجاح ..!