اذيك يا ريس يا رب تكون كويس .. ازى حضرتك ربنا يبارك لنا فى صحتك ويطول لنا فى عمرك .. ما إحنا انكتبنا خلاص قدرك معلش استحملنا اصلنا تعبنا اتبهدلنا شقيانين طول عمرنا بس لقمة حلوة تلمنا كلمة حلوة من القلب نصدقها تشدنا وتهزنا والكلام اللى من القلب واصل للقلب .. احنا راضين بالقليل حتى لو الجسم عليل هو الرحيم الستار فى الليل والنهار والحمد لله على لسانا ما تنقطع ابداً حامدين شاكرين فضله جداً اصل مر علينا ظروف صعبة واللى عالم بينا هو رب الكعبة.
سيادة الريس يقولوا عليا مطبلاتى يقولوا عليا مسحراتى ومن غير كلام فى الانجازات اللى واضحة وضوح الشمس من غير تزيين ولا طمس واللى بعض الناس مش عايزه تشوفها ولا تسمع عنها ولا تعرفها ومن غير كلام عن الجيش المصرى اللى هو أعظم جيش فى العالم ولا عن الاستقرار اللى بنحلم بيه والأمن والأمان للى مش عارف معانيه راح اقول رأيى بصراحة بنفس والله مرتاحة عندى سلام مع النفس بأمل من غير يأس ومن غير ضجة وإعلام ولا نقاش وكلام راح انزل الانتخابات وعندى امل فى الله ان اللى جاى احسن من اللى فات .. انا عارف ان وقت حضرتك مشغول ويمكن رسالتى ما توصل لحضرتك بس اللى عايز اقوله لحضرتك ربنا يعينك .. انا عندى بنتين تعبان عشنهم ما بالك فى اللى رقبته مية مليون وارض ووطن عايز ينهض ويكون اعظم وطن فى الكون ، انا عارف ان الحمل تقيل وحلم الوطن يكون اعظم وافضل وطن ملهش بديل ينحلم بيه والطريق طويل ربنا يعينك على اللى انت فيه وربنا رزقك بيه وفيه ناس مش عارفه المسئولية قد ايه ، بس حضرتك عارف ان فيه ناس ملهاش الا فى الكلام ويقولوا كلام مغلوط مش مضبوط علشان مش عايزين استقرار عايزنها حريقة ونار او تقلب بدمار أو لهم اغراض تانية غير تصدير الاحباط وان اللى بره احسن مننا فارقين كتير عننا الحكاية ان احنا بس نتغير فى سلوكنا فى احترامنا لبعضنا ,فى ثقافتنا وطريقة كلامنا .. أنا عارف ان بلدنا فيها الخير بس للى يحبها ويضحى زى ما ناس ضحت بدمها عشانها لأجل تراب ارضها حضرتك عارف ان فيه ناس عايزة تاخد من غير ما تدى وفيه ناس كتيرة بتدى ومش منتظرة حاجة حبا فى الوطن . فى النهاية يا ريس كلى ثقة فى الله ان حضرتك قدها وقدود وقلبى مع اهالى الشهداء اللى ماتوا وضحوا لآجل البلد فى اعلى منزلة فى الجنة ان شاء الله واقل شيء ممكن اعمله انى ألبى نداء الوطن واكون معاه فى المحن وتحت أمره فى اى وقت حتى لو فداه روحى الانسان سيرة ومش هنعيش غير مرة واحدة ويا رب سيرتنا عند ربنا وفى الحياة تكون خير ، فى الختام انا كان نفسى اسلم على حضرتك واقولك اذيك يا ريس ويارب تكون كويس .