سوزان بدوى تكتب: هى دى الأم

من رحمة الرحمن بعبيده يخلقنا فى بطن ملاك جنين لا حول له ولا بإيده تحميه الرحمة من الهلاك من وهن تقويه وتزيده عطف وحنية مش امتلاك وفى يوم بتبقى من مواليده تباركت اللهم فى علاك بتلاقى كل ما تريده فى حضن ده الملاك هى دى الأم معنى جميل وتأكيده فى كل حاجة فيك وفى كل شىء جواك تبدأ مشوار الحياه تضحك أوتبكى تفرح أو تشكى تلقاها جنبك وإن أسرعت الخطى بتلاقيها وراك تلهث من التعب لكن حالفة تدعم خطاك إيدها تطبطب ايدها تدادى إيدها تحلق إيدها تفادى إيدها بإيدك بعيد أو قريب هنا أو هناك ادعى لى يا أمى دعيالك وبقلبى دايماً معاك بدعوة منها تنمحى الرهبة وبكلمة واحدة يزول الارتباك إن كلوا البشر ماتكلش ومن رعايتك ماتملش وإن مليت أنت الرعاية مش هتلاقيها مطاوعاك ضنيتها صحيح ولكن راضية تكون مضناك وإن شيطانك استقوى هى بتبقى أقوى بالحب تظهر سخطها بالقلب تطلب رضاك شايفة دايماً مصلحتك مناها العمر راحتك وبتسعى ليها وأنت للشقى مسعاك ولما بتزول الغشاوة وتحل عنك الغباوة وتعانى من شيطانك اللى آذاك بتعود إليها راضخ ادعى لى يا أمى دعيالك وبقلبى دايماً معاك يكفيك الشيطان وكيده هى دى الأم معنى جميل وتأكيده فى كل حاجة فيك وفى كل شىء جواك.