أفاق معوض عادل ، أحد مصابي أحداث محمد محمود الأولى، بعد غيبوبة استمرت 5 أعوام، الذي تعرض خلالها لإصابة بطلق ناري أثناء إسعافه أحد المتظاهرين في 20 نوفمبر 2011.
وكان معوض طالب في الفرقة الرابعة بكلية الصيدلة جامعة مصر للعلوم والتكنولوجيا آنذاك، أصيب برصاصتين في الرأس، أدت لإصابته بكسر في عظام الجمجمة وارتشاح في المخ وشلل كامل بالأطراف، وتلقى عادل علاجه في مركز رافيال الطبي بالعاصمة البريطانية لندن، على نفقة الدولة.
ونشر مالك عدلي الناشط الحقوقي عبر صفحته الشخصية علي موقع التواصل الاجتماعي " فيس بوك " قائلا " أنا هكتب كلمتين ارجو محدش يعتبرهم مزايدة ولا إساءة وأرجو محدش يعلق عندي عليهم بس هما للأسف كلمتين لو مقلتهمش هطق، النهارده بترتيب ربنا وجدعنة Azza Ahmed Zaki Hassan الست الأصيلة الكريمة الجدعة قدرت أزور واحد من أسيادنا وتيجان رؤوسنا معوض عادل الملقب بالشهيد الحي اللي اتصاب برصاصة في المخ في أحداث محمد محمود ومن يومها وهوا ف غيبوبة".
وأضاف مالك " وبعد الدولة ما رفضت علاجه باعتباره مصاب ثورة واترفعت قضية كسبها أهل معوض اتنقل معوض للعلاج في مستشفي متخصصة في الحالات اللي زي حالته في انجلترا، معوض في مستشفي تبعد عن لندن حوالي ساعة ونص بالعربية ، رحت وانا مش عارف ايه ممكن احس بيه أو يحصللي بس دا عيل من عيالنا ولازم هشوفه يعني هشوفه، مستشفي بسيطة معوض فيها فى غرفة بسيطة علي جهاز تنفس صناعي وأجهزة تانية ،وشاب زي القمر تكوينه الجسماني يشي بإنه صاحب جسم قوي ، أبيضاني وشعره ناعم وعينيه بنية نايم علي سرير أبيض مبيتحركش بس بيشوف وبيسمع والنهارده الممرضة حكت لأخوه انه ضحك لما حاولت تهزر معاه وساعات بيحس لما حد يلمسه ".
وسرد مالك قائلا " معوض في غيبوبة من نوفمبر 2011 وبره دنيانا خالص، وعزة ومصطفي وعلي كانوا كرماء وسابوني ادخله لوحدي، يا ربي معوض بيبصلي ونايم قدامي ،هقولله ايه ؟ ازيك يا معوض انا اسمي مالك واحد يعرفك وبيحبك وجاي من مصر يطمن عليك ، شد حيلك يا بطل، فيه ناس كتير بيسلموا عليك ، معوض مركز معايا بعينيه، ابتديت اقولله أسامي علي بالي دايما بيسألوا عنه .. شد حيلك يا معوض احنا كلنا مستنيينك تقوملنا بالسلامة علشان نكمل اللي بدأناه سوا، بعد الجملة دي تاه كل الكلام من لساني وسرحت ف عينيه، يا ربي اقولله ايه؟ اننا تحت ايدين عالم وسخة مبهدليننا؟ وان مفيش حاجة اتغيرت وان رقدته دي ببلاش؟".
وأكمل حديثه قائلا" احكيله عاللي حصل وبيحصللنا وفينا ؟ مقدرتش انطق، بست دماغه تاني وإيديه ورجليه وخرجت الدنيا مغيمة ف وشي ومش شايف .. اللي صدمني كمان اني عرفت ان محدش بيزور معوض غيرعدد قليل جدا من الناس في حين اني اعرف ناس كتير ليهم رجل علي هناك وناس أصلا عايشة هناك ومنهم كتير ظروفهم تسمح وكلهم بيتغنوا بالثورة والشهداء والمصابين بس محدش فكر يزوره ولا يطمن عليه ويشوفه ويشوف عينيه ويفتكر احنا كنا فين وبقينا فين، بالذمة احنا نستاهل أي توفيق ؟ أنا غضبان قوي وزعلان من كل حد يقدر يروح يزور معوض ومراحش وكل حد نسي معوض وكل حد فاكره ومبيدعيلوش وكل حد نسي معوض نايم علي سرير بقاله حوالي خمس سنين ليه..وغضبان من نفسي ومن الدنيا كلها.، العيال دي تستاهل مننا كده؟ "
وانهي حديثه داعيا " يا رب اشفي معوض وفرح قلب امه واخوه الجدع مصطفي وقلوبنا ووفقنا يبقي فيه حاجة حلوة نقدر نقولها لمعوض لما يقوملنا بالسلامة" .