محمد زكريا حبيشى يكتب: دنيا الكدب

أنا المبحوث وأنا الباحث ف دنيا الزيف بخربش جوه ف الصخرة بقلب نضيف وأتارى الصخرة ملغومة بنار وكلام وفيها حرب أهلية شتا أو صيف وأستاذ إنت يا صاحبى ف دنيا الكدب والأضواء ولحمى ليه ؟ رخيص عندك بتآكل فيه وليه تشتاق وكان الوعد تُسّترني أتارى كُلى صار أشلاء مالكشى ف الحياة مبدأ وغدرك ليّا أصبح داء وريحة قلبك الميت بقت جيفه بتعمل فيها ليه حاوى بأشكال سوده ومخيفه ومستقوى بعقلك ليه وفاكر هو رب الكون ولكن كل أوهامك عيونها ضلمة وكفيفة ولو هتبص ف مراية ضميرك تلقى أكذوبة وتلقى فكره سعرانة بتتشعلق ف توب حِقدك بصورة جِن مقلوبة بتتحول وتتلون بصوره حلوة ملعوبة أنا تعلمت شىء منك أبيع الدنيا والآخرة وبالأحرىَ أكون أراجوز أطوف الخُضره والصحرا وأتنطط فوق الجثة اللى عجبانى و الم الكل بالبصره و أعيش وأموت كمان طرطور وأمسك كل شىء م النص عشان الدنيا تضحكلى وليل الحظ ليا يبص نصيحه يا نفسى إوعاكي تلاقى النور لأن الدنيا هتخاصمك ومن بروازها ليكِ تُقص