خالد هيبة يكتب: دعوة للتفكير العقلانى المحايد

(للعقلاء فقط الجهلاء يمتنعون) حوارى مع من يدعون لقيام ثورة وإشعال المظاهرات لإسقاط النظام. بدعوكم لنفكر ونتحاور سوياً بدعوكم للتفكير العاقل والمحايد لتقييم الأمور والأوضاع فهل الوطن الأن يحتمل القيام بتلك المظاهرات والاحتجاجات؟ إيه بتقول إيه ؟ أيوه صح أنت معاك حق مازال هناك فساد ومحسوبية وأسعار مرتفعة وسوء تعليم وصحة وغيره وغيره فعلا الوضع صعب بس عارف ليه؟ لان ببساطه التغيير اللى بيحاول النظام تحقيقه لإصلاح ما أفسدته عقود سابقه لم نجنى ثماره بعد واحنا مش قادرين نصبر أكثر من ذلك.، طيب ما احنا بقالنا سنين صابرين هنيجى دلوقتى ونرفض استكمال المسيرة فى الوقت اللى بدأنا نحس إن فى بارقة أمل والتغيير سيحدث قريباً خلاص هنقول لأ ! طيب يا سيدى هنعمل ثورة بس تعال نفكر شويه إيه اللى هنكسبه منها أولا تقدر تقولى كام واحد هيموت وكام مكان هيتحرق وكم الخراب اللى هيحصل فى سبيل تحقيق مطلبك ؟ طيب تقدر تقولى مين اللى هيدفع الفاتوره دى ؟ للأسف اللى هيدفعها هما الناس اللى بالعافيه عايشين وبفرض جدلاً إنك حققت مطلبك تقدر تقولى من يصلُح لتولى المسؤوليه ؟ إييييه !! بتقول مين ؟! أنا سمعك يا اللى بتقول مرسى راجع بس زى ما أنت عارف ومتأكد إن فى ملايين من الشعب رفضينه ومش هيسمحوا بان ده يحصل تانى وهيعملو ثورة تانى ايوه طبعا وأنت زعلان ليه ؟! هيعملو ثوره زى ما أنت عاوز تعمل دلوقتى بالظبط وناس تموت وأماكن تتحرق وخراب من تانى وساعتها ما تبقى من الناس اللى بالعافيه عايشين هم ايضاً من سيدفعون الفاتورة. إيه ؟ بتقول نعمل إنتخابات مبكره وتكون حره ونزيهه والله فكره كويسه بس هل يا ترى لو حد من المؤسسه العسكرية نجح تانى هتوافق وترضى بالديمقراطية طبعا لأ وإلا كنت رضيت من الأول طيب لو حد مدنى أياً كان إنتمائه نجح هل ياترى غيرك هيوافق ويرضى طبعا لأ عارف ليه لان وببساطه شديده المشكلة ليست فى الحكام أكتر ما هى فينا احنا كشعب أصبح منقسم ومنا الصالح الذى يُحكم عقله وفينا الطالح الذى يبحث عن إرضاء هواه وميوله وفرض قناعاته وعقيدته أياً كانت الوسائل والطرق دون النظر لمصلحة الوطن أو حتى المواطن فكن أخى المواطن من الصالحين العقلاء ولا تكن من الطالحين الجهلاء (لك الله يا مصر).