شارك الكاتب الشاب آسر إسلام اللبان "انفراد" بـ قصيدة جديدة، بعنوان "بعد أمى.. الكلام فى أمى مش بيخلص"، وذلك ضمن مشاركة كبار وشباب الشعراء فى قراءة نصوصهم خلال فترة العزل المنزلى ضمن الإجراءات الاحترازية لمواجهة فيروس كورونا.
وتقول كلمات القصيدة:
بعد أمي ملاقتش اللي اشكيله همي..
ملاقتش اللي يداوي جرحي بأديه ويمسحلي دمي..
بعد امي..
ملاقتش اللي أجري عليه و اترمي ف حضنه واعيط كتير..
لو انت غني بفلوسك فا انا والله بدون امي فقير..
الناس بتختلف بحكم العاده ف انهم ينطقو اسم الأم..
ف الصعيد بيقول ياما.. و هنا ف القاهره بيقولو ماما و مامي ومامتي..
إلا أنا.. انا مبقولهاش غير يا حبيبتي..
حبيتك يا أمي وحبي ليكي بزياده..
يا أول ست عيني تقع عليها بعد الولاده..
يا أول حضن دفاني و خلاني اعرف طعم السعاده..
همشيلك بلاد و اقف اودام الدنيا عشانك..
ازاي ربنا يرضي عني من غير رضاكي ياللي الجنه تحت اقدامك..
بتقوليلي انت ضهري و سندي و انتي والله سندي الاول والاخير..
دورت كتير.. قبل ما اكتب كل الكلام ده واقولك..
ان ورب العباد وسط كل ستات الارض يا امي انا بحبك..
بعدم هلاقي مين بعد كل امتحان متصل بيا فوق العشرين مره عشان يطّمن..دعوتك هي السبب اللي بتخليني مكمل..
يا أحن قلب شوفته ف دنيتي.. انتي دنيتي و انتي الوحيده اللي تستاهلي دمعتي..
انتي الخير و الرزق والرضا و الحنان..
انتي مصدر ضحكتي وسط كل الاحزان..
الصلاه عرفتها علي ايديك..ياما كتير عاقبتيني عشان مصلتش مع انك حذرتيني..قولتيلي الصلاه هي عماد الدين.. و ربنا بيزعل من اللي مش ماشين مستقيم.. و عشان تمشي مستقيم يابني.. لازم تصلي..الصلاه بتنهي عن الفحشاء والمنكر..صلي قبل ما تلعب..قبل ما تنام..قبل ما تفطر.. صلي عشان مفتاح الجنه يكمن ف الله اكبر
حاضر خلاص..
حافظ كل تعليماتك.. هحط الهدوم ف الغساله و مش هسيب المروحه شغاله واول ما اقوم هنفض سريري و اوضب اوضتي..
هشوف اخواتي محتاحين ايه وهاخد باللي منهم..
مش همد ايدي عليهم هستنا لما انتي تجلهم..
كل كلامك كان صح يا أمي وكأنك كتاب..
قولتيلي يومها ان مفيش حاجه اسمها صحاب..
قولتيلي صاحبك اللي يجيلك عشان قاعده دخان يبقي انت ف غني عنه.. قولتيلي يوم ما هيدخل منك نسوان هيبيعك عشانهم..
لما كنت اجي اعيطلك واقولك صحابي ضايقوني كنتي تقوليلي معلش يابني دول غيرانين منك عشان انت احسنهم..
انت اشطر حد بنهم..
و زي يابني ما انت بتحفظ دراستك افهم صحابك كويس وذاكرهم..
قولتيلي اياك والبنات..ابعد عن الحب..الحب كدبه كبيره في الافلام..
قولتيلي نصايح كتير من كترها راحت من نفوخي لما جيت انام..
افتكرت كلامك ده لما حصل فعلا بالحرف وحياتي ابدت تمشي بالذق..
ساعتها جريت عليكي و بوست اديكي و قولتلك كان عندك حق..
بس انتي بطيبه قلبك طبطبتي علي شعري و ابتسمتيلي..
قولتيلي ولا يهمك يلا ابدأ من الاول يا حبيبي..
مهما كبرت و مركزي عالي فا انا لسه طفل بالنسبالك..
انا اكبر واحد ف اخواتي واصغر طفل من عيالك..
كام مره قولنالك خلي بالك من منابك وخليه ليكي وانتي مبترضيش..
ازاي مستحملني كل ده ولسه مكرهتنيش..
ده انا كرهت نفسي و كرهت اني اعيش..
والسبب اللي مخليني مكمل انك متعيطيش..
انتي اعظم هديه بالنسبالي..
انتي الكنز الغالي..
ف الوقت الصعب بصيت لقيت كل الناس سابتني وانتي بس اللي مستنياني..
وشك دنيا و ضحكتك شمسها..
حٌبك عباده و طاعتك صوابها..
انا اتعلمت أحب الحياه بسببك..
انا وعيت عالدنيا لاقيتك بتعملي كل حاجه بنفسك..
لاقيتك مخلصه لأمك.. لبيتك..لاقيتك مخلصه لشغلك..
صدقني حبي للحياه ف ده عشان بحبك..
أمي..هي أجمل نساء الكون..
وعيون أمي اغلي من حياتي..
وانا مخلص جدا للعيون..
وهفضل مخلصلك لحد ما يتنهي وقتي و يحل ميعادي