أيوة بخاف من النور أكتر
وبخاف من الناس جدا جدا
وبخاف من أى علاقة جديدة
وبعدى الأيام بالحيلة
وأحيانا يزعجنى الفرح
بس أنا عادى ومن غير شرح
أصل الإنسان لو عاش عمره
بيدور علي حلم ولقاه مدفون
ميصحش تيجى بكل بساطة
تتهمه وتقول مجنون
أنا يمكن فعلا مش عادى
وبتغير تلاتين مرة خلال الشهر
لكن الأمواج بتروح وبتيجى
والبحر بيفضل دايما بحر
أنا يمكن شكلى أصبح أكبر
لكن تفاصيلي زي ماهي
لسة محدش عارف شىء عن كل آلامى الشخصية
بحب الليل وبحب الضلمة
بحب اكتر ابقي لوحدى
ومبحبش شعور اني لوحدى
وبحب كتير اني أهزر ..
وبحب كتير اني مهزرش
وبحب جدا اكون بختار ..
وارجع واقول ياريت ماخترش
انا واحد صان كل الناس ..
لكن في الآخر متصانش
شخص غريب وتفاصيلي اغرب
ولو جرحى من شخص قريب ..تلاقينى أهرب
وبلم حاجاتى في صمت وخوف
مش بعرف اجرح زيكوا كده ع المكشوف
شخص خارج ع المألوف
مش بنسى لكن بتجاوز عادي
نار جوايا لكن دايما تلاقينى أبان هادى
تفاصيل جواها تفاصيل بتعادى
بحب الحزن والناى ..وبكره كلمة إزاى
وبسأل ع الناس دايما ..والناس عايشة بمبدأ انساى
وعشان لما بحب بيكون قلبى شىء مضمون
الناس كلها قالت عنى إن أنا مجنون
أنا مش مجنون
أنا شخص حقيقى بجد
مقدرش ألعب بمشاعر حد
وفرحتى دايما ع القد وسعادتى بسيطة
مش محتاج منك تمدحنى أو تبعتلى رسالة طويلة
قولى إزيك ..قول بشتاقلك
قولى الدنيا بتبقي كئيبة
وبتتحول جنة أما أرجعلك
قولى إني مهونتش ابدا ..وإن أنا لسة في بالك
قول إن أنا حالى مش أصعب جدا من حالك
قول إن الدنيا غريبة ..وإنك يومها مكنتش واعي
وإوعي تقول أن ده وهم ..وإنك مستمتع في وداعي
أنا مش مجنون ..أو يمكن فعلا مجنون
كلنا مجانين ..كلنا تايهين
بندخل في طريق وإحنا عارفين
إن نهايته مش زي بدايته وبنكمل
أنا فعلا مجنون إن أنا مهربتش م الأول