طه عمر يكتب: همسة عتاب

البعد عنك يا بلدى تعب وشقى وعذاب صورتك فى عينى، حبك فى قلبى، مهما طال الغياب وحشنى نيلك وهرمك، نبلك وكرمك، وحشنى حتى التراب مفيش حاجة فى الدنيا تعوض فراق الأحباب **** لكن بأعتب عليكى يا دوب كلمة عتاب فى الغربة وإحنا بعيد عايشين على الأحلام بنحلم بمصر عظيمة، عايشة فى خير وسلام عايزين نعيش بكرامة ونشتغل بجد، كفاية كُتر كلام **** لما بنشوف اللى بيحصل وننظر ونتأمل نلاقى المسئول ما بيكدبش لكن بيتجمل والغنى مش فارقة معاه والفقير يتحمل **** قالوا السنة الجاية سبعمية ألف وظيفة كلام قديم ومكرر وحكاية بقت سخيفة والأسعار زادت كتير والصورة بقت مخيفة **** ماناخدش منهم للأسف غير كل يوم وعود والناس راضية بقليله وعايشة بالموجود ومنتظرين الفرج صابرين، لكن للصبر حدود **** فواتير ميه وكهربا ما نعرفشى بكام جنيه وندفع عدم نظافة من غير ما نعرف ليه ؟! فاكرين المواطن باشا والكل جاى عليه **** بالصدق والصراحة صارحينا بقى يا حكومة قولولنا الحقيقة إيه ؟! ودققوا فى المعلومة الناس بكل صراحة فيكم مصدومة **** خليكوا مع الغلابة وسيبكم من البهوات دا الناس خلاص تعبت وكرهت السكات نفسها تسمع خد، تعبوا من كلمة هات