ملخص الأسبوع - الخميس - 28/1/2016 :-
(1)
- رسميا.. العبار ينسحب من مشروع العاصمة الإدارية الجديدة.. والحكومة تبحث عن شريك وممول.
دا تاني شريك يهرب.. بصوا إعملوا إعلان في الجرايد .. حكومة جادة ممشوقة القوام تقدس الحياة الزوجية .. تبحث عن ممول جاد يشارك في الأثاث ومن سكان الخليج .. وإبقوا مضوهم على كمبيالات علشان ميهربوش. D:
(2)
- في عملية نوعية للداخلية المصرية.. سقوط عصابة لسرقة "البط" في أسيوط مكونة من 5 افراد.
نقرا التفاصيل يا جماعة لو سمحت .. بيقولك مدير أمن اسيوط شكل وحدة بحث ورصد للتكشيل العصابي بعد بلاغات متكررة بإختفاء البط.. وشكلوا قوة إقتحام ورصد.. واوقعوا بالتشكيل العصابي.. جمهوريات سوق التلات.
(3)
- زي النهاردة من 5 سنين إكتشفنا إن الشرطة المصرية بتلبس "كلوتات سبعة " بعد ما جريوا " ملط " في الشوارع هربا من بطش المتظاهرين.. كل سنة وانتوا طيبيين.
(4)
- انقلاب "تريلا" مُحملة بـ22 طن نترات بوتاسيوم في ترعة بالأقصر.
حياتنا فعلا كانت محتاجة شوية بوتاسيوم.. أهو نترات البوتسايوم دي.. تتفاعل بقى مع الفوسفات إللي إتقلب في النيل من كام شهر.. ويا سلام لو شوية نفايات نووية كمان يبقى كدة فل جدا.. عموما مش عايزكم تقلقوا.. مؤكد الكلام دة بعيد تماما عن مياه الصرف الصحي إللي بنشربها
(5)
- مصر تبدى قلقها من تنامى العنصرية فى بلجيكا والدانمارك وتحثها على احترام الحريات الدينية.
كان في مناقشة دورية لاوضاع حقوق الإنسان.. فمصر بقى إللي عامله "هولوكوست" للمعارضة.. قدمت ورقة من 10 نقاط بتنتقد فيهم أوضاع حقوق الإنسان في بليجكا.. نركز مع بعض والنبي.. هناك جهة ما في مصر.. مركزة مع الاوضاع في بلجيكا والدانمارك وفنلندا.. وبتنتقدهم وبتقدملهم حلول إزاي يحسنوا من اوضاع حقوق الإنسان في بلادهم.
(6)
- إلغاء الأحكام العسكرية التي صدرت بحق ظباط وأفراد الشرطة خلال أخر 5 سنوات.
معروفة .. المحاكم العسكرية معمولة للمدنيين بس.
(7)
- عبدالغفار شُكر، نائب رئيس المجلس القومى لحقوق الإنسان: الشعب أعطى فترة سماح لـ«السيسى».
طب وسماح راضية باللي بيحصل دة طيب!!!
(8)
- استبعاد 90 متهما بينهم 73 قيادة بالداخلية من «الاستيلاء على المال العام» بعد سداد 150 مليون جنيه.
دا كمان يا جماعة إسمه الخبر الأيقونة.. في ظباط حرامية سارقين بتاع 900 مليون جنية.. فالحكومة تصالحت معاهم وقالتلهم خلاص رجعوا شوية من اللي سرقتوه وهنسامحكم.. نقرا الخبر دا لو سمحت بتفاصيله.. في أمين شرطة لوحده مرجع مبلغ 19 مليون جنية .. ايوا انت قريت الرقم صح.. 19 مليون.
(9)
- القبض على 217 مواطن بتهمة «نية التظاهر» في ذكرى 25 يناير.. وتوقيف أكثر من شخص بتهمة ارتداء تيشرتات سوداء بتهمة تلبية دعوة حركة 6 ابريل.
اه والله .. تهمتهم "نية التظاهر" ومحبوسين إحتياطي لغاية دلوقت والناس اللي اتقبض عليها لابسة تيشرتات اسود.. ايون.. احراز القبض عليهم تيشرتات.. نقرا بقى سوا حيثيات القضايا علشان نضحك شوية
(10)
- القبض على أمريكى بالجيزة لاتهامه بتحريض المواطنين للتظاهر فى ذكرى يناير
الراجل الغلبان دا جاي يتعلم عربي في مصر.. فقاعد عالقهوة بيدردش مع الناس.. الحس الأمني لرفاق القهوة كان عالي جدا.. اتصلوا بالشرطة لأنهم شكوا إنه جاسوس.. جات سرية كاملة من وحدة مكافحة الإرهاب للقبض عليه ودا طبعا في إطار جهودنا لتشجيع السياحة.
(11)
- مجلس الدولة يُفتى بعدم خضوع القضاة لـ«الكسب غير المشروع»
كدة يبقى عندنا حكم بعدم الإفصاح عن مرتباتهم.. وعدم جواز التعليق على أحكامهم.. ولا يخضعوا للمسائلة في جهاز الكسب غير المشروع لما يسرقوا.. البلد تحولت لعصابات.. وكل عصابة بتدافع عن السبوبة.. جمهوريات قعر البكابورت والله.
(12)
- الطالب عمرة التويج ينجح في اختراع كهرباء مبتكهربش.
بصوا.. انا قريت الخبر كتير وحاولت افهم يعني إية كهرباء مبتكهربش.. بس على اي حال مش لازم نركز مع مصر أكتر من كدة.. دي أكيد علشان نشغل بيها الدبابة بدون دباب والغواصة بدون غواص
(13)
- جائزة أفضل بيمب مصطفى بكري .. تذهب هذا الأسبوع للكابتن لميس الحديدى وتصريحها «ثوار يناير» قتلوا أنفسهم من أجل أن «يلبسوها لمبارك»
كامل أعتذاري للرفيق مصطفى بكري .. بس إنت أداءك مش عاجبني وفي "بيمبات" عاملين شغل عالي قوي وبيسحبوا البساط منك
(14)
- الزند: رفعت ميزانية نادي القضاة من 250 ألف إلى 105 ملايين جنيه.
دا كمان خبر لازم نسمعه على أنغام أغنية انا مش قادر أديك
(16)
- في سؤال للتربية الدينية في إمتحانات الدقهلية: حفر المسلمون الخندق في غزوة بدر برأي (خالد بن الوليد - حمزة بن عبد المطلب - سلمان الفارسي)
طبعا الإجابة اللواء مهاب مميش.. إنهم يدعون إلى دين جديد والنعمة.. خندق في غزوة بدر.
(17)
- "الداخلية".. شعرنا بالتفاف الشعب بعد فيديو "الواقى الذكرى".
هوا إنتوا حسيتوا بإية طيب.. أنهو جة الأول يعني!؟.. الإلتفاف وألا فيديو الواقي الذكرى!!
(18)
- أسد يتجول فى شوارع دمياط بعد هروبه من سيرك دمياط الجديدة.. وظهور تماسيح ببحيرة الإسماعيلية.. وأسفل كوبري مسطرد.. «والبيئة» ترد: «أكيد هنمسكهم»
طالما جودذيلا مظهرش ومعاه اسراب من الديناصورات.. يبقى إن شاء الله خير
(19)
- ضبط طائرة تجسس داخل طرد قادم من الإمارات.
طبعا الطيارة اللعبة بتتباع في فيرجن وكارفور بـ150 درهم والله.. بس طبعا إحنا زي ما اتفقنا دي بلد واتجننت واللي كان كان.
(20)
- مصدر أمني: القبض على ضابط تركي أثناء تصويره كمين شرطة بالهرم
شوف يا أخي.. الإستخبارات التركية سايبة كل بلاويها مع داعش وسوريا والاكرد والعراق.. وباعته ظابط مخابرات يصور كمين فيه أمين شرطة و3 عساكر.
(21)
- يوسف زيدان ينشر المقالة الأولى: «التحميس بالتقديس.. والتهميش بالتشويش»
في إنتظار المقالة الجاية إن شاء الله بعنوان.. الفلة في المنفلة.. والتنة والأنتنة.. والشخرمون في شد السيفون.. كدة كتير والله يا مصر
(22)
- المحامي سمير صبري: «مالك وشادي» ارتكبا جريمتهما بالتعاون مع أمريكا والمخابرات الإسرائيلية
معروفة.. طالما واقي ذكري تبقى المؤامرة من أمريكا وإسرائيل.. إنما لو المؤامرة فيها "لولب" تبقى من قطر وتركيا طوالي.
(23)
- «الزند»: لن تنطفئ ناري إلا إذا تم قتل مقابل كل «شهيد جيش» 10 آلاف من الإخوان
بسم الله الرحمن الرحيم.. الإجابة: أيوا دا وزير العدل في الخرابة.
(24)
- خالد شوكات المتحدث باسم الحكومة التونسية: الخروج في المظاهرات يسبب الضعف الجنسي للرجال.
الخبر دا لازم نقراه بصوت الدكتورة هبة قطب وهيا بتقول مرة واحدة كفاية.
(24)
- مخترع الوحش المصري "التوكتوك الطائر" عن مراسل ابلة فاهيتا: "الحقير دا اللي شد سكينة الكهربا عن اختراعي!"
بس هوا دا الخبر.. سؤال الحلقة: طلعلي ألشة تضاهي ألشة الخبر ذات نفسه!!
(25)
- الداخلية تقرر السماح لـ 3462 طالبا مسجونا بأداء امتحانات نصف العام
الداخلية عندها 3462 طالب محبوس.. هذا الوطن هالك لا محالة والنعمة.
(26)
الفنانة وفاء عامر: أنا مش متخيله إن في حد بسفالة أحمد مالك وشادي.
في يا مدام.. عادل إمام في فيلم الواد محروس بتاع الوزير كان بيضربك على.. على كتفك.. مشيها كتفك
(27)
- رسميا توجية الاتهام للدكتور طاهر مختار بمحاولة قلب نظام الحكم.. في قضية أحرازها "شيت إكسيل" فيه اسماء المعتقلين إللي بيعانوا من أمراض مزمنة.. متهمينه بقى بحيازة منشورات
منشورات اية يا ولاد الكلب في 2016.. انتوا بجانب إنكم طغاة ومستبدين.. إنتوا عالم قديمة قوي.. منشورات؟؟
تحيا مصر تحيا تحيا مصر.. بصوت مدام غادة عبد الرازق.
(28)
«الفضالي»: مصر صارت أكثر أمنا واستقرارا في ظل وجود رئيس بحجم «السيسي»
أنا مش عارف إية قصة حجم السيسي دة.. انتوا يا جماعة ركزوا في توسعة صلاحياته.. الريس بيحب قوي اللي بيوسعهاله.
(29)
- مصطفى بكري : السيسي يتألم من ممارسات الفساد.. وخسر أعز ما يملك لإرضاء المصريين.
والله يا جدعان كدة كتير.. إنتوا جايبيين الراجل تعملوا فيه اية بالظبط.. الكلاب بيمارسوا الفساد مع سيادة الريس .. الله يخربيتكوا بوظتوا الراجل.
(30)
الفنانة الراحلة ماجدة: مستقبل هذا الوطن يرتسم أمام عيني.. واراه مشرقا بقيادة السيسي.
حضرتك لسة منتظره المستقبل!! وشايفاه مشرق!! طيب.
(31)
- وزير البيئة خالد فهمى: مصر من أكثر 10 دول تلوثًا فى العالم
نجتهد.. نركز.. منستسلمش.. وبعون الله نبقى رقم واحد في العالم.. حضرتك بس ركز مع موضوع نترات البوتسايوم إللي بيترمي في النيل دة وهتشوف نتايج مبهرة.
(32)
- المذيع محمد الغيطي: الإخوان وراء هجمات 11 سبتمبر على الولايات المتحدة
أنا هعمل كتاب يا جماعة هسميه 100 عام من الياختااااااااي.. البلد أتجننت والله
(33)
لجنة فرز الأجهزة الطبية بمستشفى جامعة المنيا تعثر على طوب بدلا من الأجهزة
لجنة بتعمل جرد سنوي.. هوا المفروض سنوي بس محدش بيعمل.. جالهم شكوى إن في فساد.. قرروا يشوفوا شغلهم بقى.. فأتضح إن مخازن الاجهزة الطبية مليانة كراتين طوب أحمر.
بس بيقولك الثورة خربت البلد.. مصر دي بلد مبهرة عالأخر
(34)
- سفر أفراد أسوياء "بيشوفوا" بدلا من منتخب كرة الجرس للمكفوفين إلى بولندا..
في بطولة للعالم لمكفوفين في بولندا.. في حد من الاتحاد قرر يعمل سبوبة.. فقرر يأخد فلوس من شباب بيبحث عن الهجرة.. وعملوا مكفوفين وسافروا فعلا.. واللجنة هناك اكتشفت ده وأتفضحنا والجرايد العالمية كتبت.. والشباب قطعوا جوازاتهم وهربوا هما والمدرب.