مع احترامى يا ميزو للتابلت اللى بتذاكر عليه وشرم الشيخ اللى بتعمل فيها عيد ميلادك وكنتاكى سبايسى اللى بتحبه .. أبوك بيحن ل طفولته ف عزبة الرياح وسنبادة بس قبل المدنية المتوحشة ما تقتحمهم .
- شوف يا مازن: اللى ماجرّبشى يمسك كتاب المدرسة ويمشى بيه وسط الأراضى والغيطان والخضرة والشجر وتبقى الدنيا مفتوحة قدامه على مدد الشوف ومفيش حد حواليه، ويقرا ويذاكر ويتكلم ويشرح لنفسه ويضحك ويبتسم .. فاته كتير جدا من متعة القرايه والمذاكرة .
- واللى ما جربشى يتعب من شغل بدنى مرهق (العزيق بالفاس ونقى الدنيبة من الرز ف عز الضهرية) ويقوم نايم عالتراب تحت شجرة الصفصاف جمب الطوالة ف ساعة عصارى ويعمل شبشبه مخدة، وتبقى نسمة الهوا اللى جايه كأنها بتحكى له حدوته عشان ينام .. فاته كتير جدا من متعة النوم .
- واللى ما جربشى ياكل رغيف عيش طرى سخن طالع من الفرن البلدى لسه حالا مع خرطة جبنة قديمة من البلاص وعليها شوية مش وقشر برتقان مخلل وشوية سريس من البرسيم وبصله ناشفه .. فاته كتير جدا من متعة الأكل .
-% 90 من الحاجات اللى فوق دى مازن سألنى معناها إيه دى .. زى (العزيق بالفاس؛ ونقى الدنيبة من الرز؛ الطوالة .. إلخ ( .