منة الله جابر تكتب: تحقيق الذات بين الواقع والخيال

كلنا عندنا أحلام كتير بنسعى إننا نحققها .. كلنا عايشين فى الدنيا لينا هدف لينا رسالة بندور عليها .. كلنا نفسنا فى حاجات كتير نوصلها كلنا .. كتير مننا عنده امل فى بكرة فى المستقبل .. كتير مننا لسا تايه مش عارف يحط رجيله على أول الطريق بس ليه وإزاى وفين؟ إحنا بنعيش فى مجتمع محبط بالفطرة .. مجتمع لما تقوله انا عايز أعمل كذا أو نفسى أعمل كذا يرد عليك يقولك انت فاكر نفسك هتغير الكون .. طب معلش وإيه اللى يخلينى ما اغيرش الكون آه أنا عايز أغير الكون أه أنا عايز أعمل حاجة كويسة أسيب بيها علامة فى الدنيا آه أنا عايز أكون حاجة.. الكلام ده بيخلى ناس كتير تيأس وتكمل نوم وتفضل عايشة فى أحلامها وبس أحلام مش مكتبلها أنها تشوف النور وتبقى حقيقة ومع الأسف أفكار منها كتير ممكن فعلا فى وقت من الأوقات تغير الكون.. ياترى نعمل ده إزاى.. خلى عندك ثقة فى نفسك وفى حلمك متخليش أى حد مهما كان يهز يقتك فى نفسك متسمعش لحد أعمل اللى فى دماغك وبس محدش هايكون شايف حلمك زيك اسعى امشى فى طرق كتير دور واعمل سيرش الدنيا بقت مفتوحة قدامك طور نفسك فيه اتعلم من تجارب غيرك شوف اللى نجحوا قبلك نجحوا إزاى وحاول تتعلم من بدايتهم أغلط واقع وأفشل وحاول تانى وتالت وعاشر مع المحاولة هتنجح مش من أول حد أو جهة تقولك أنت مش نافع أو دون المستوى تحبط وتفتكر أن دى النهاية محدش وصل لحلمه وهو نايم على المخدة ومحدش نجح من أول مرة ناس كتير ليهم اسم وكيان كانوا فى يوم من الأيام فاشلين فى نظر ناس تانية .. ناس سابوا علامة فى حياة ناس كتير اتقالهم أنتوا ولا حاجة بس حاولوا بدل المرة اتنين وتلاتة وعشرة لحد ماصلوا للى نفسهم فيه.. طول ما أنت مش مؤمن بحلمك محدش هايؤمن بيه .. طول ما أنت شايف انك متقدرش محدش هايشوفك تقدر .. طول مانت بتتعب ربنا هايسخر كل حاجة حولينا عشان تساعدك أنك توصل حتى لو مع مشاغل الحياة نسيت حلمك شويا هتلاقى نفسك مكمل فيه من غير ما تاخد بالك ربنا مش بيضيع تعب حد مهما كان خلى ثقتك فى ربنا أكبر من أى حاجة تانية..