ناقش الإعلامى وائل الإبراشى، ظاهرة غريبة تتمثل في عرض نادى السويس لاعبا للبيع أون لاين، معلقا: "مشوفتش دا خالص لاعب يباع على السوشيال ميديا كأنه عربية مستعملة أو شقة أو تونة أو معلبات".
وقال مصطفى فرغلى لاعب السويس المعروض للبيع، خلال مداخلة هاتفية لبرنامج "التاسعة"، عبر القناة الأولى المصرية، مع الإعلامى وائل الإبراشى: "والدتى تعبت وأخدت أجازة 10 أيام، وفوجئت بعرضى للبيع على صفحة النادى، والموضوع كبر مش عارف إزاى"، مردفا:"قلت لهم خدوا الفلوس وسيبونى، لكنهم رفضوا".
من جانبه علق المحاسب محمد أحمد هلال رئيس نادى السويس، قائلا: "إحنا عارفين احنا بنعمل ايه كويس، احنا أعلنا على صفحة النادى ببيع اللاعب، ووصلنا للمرحلة دى لأن مصطفى مش بيجى التمارين وعاوز يمشى".
وتابع: "من ساعة ما اتعاقدنا معاه وحتى تاريخه مصطفى مجاش غير تمرينين، والقصة بدأت إنه قال عليه ثأر، ووالده وعمه وأخوه جاءوا للنادي، وشوية يقول والدته تعبانه، دا أخد شيك مقدم 130 ألف جنيه، وايه المشكلة اعرض لاعب للبيع".