علق الشيخ خالد الجندي، عضو المجلس الأعلى للشئون الإسلامية، على افتتاح الرئيس السيسي لمجمع الأسمدة الأزوتية في العين السخنة.
وقال "الجندي" في حلقة برنامجه "لعلهم يفقهون" المذاع على فضائية "dmc": "أي أب بيدفع فلوس في بيته الفلوس تنقسم إلى قسمين فلوس ظاهرة وفلوس مستترة، ودايما الأولاد يشوفوا الفلوس الظاهرة في الفاكهة أو اللحم أو الفراخ أو الهدوم الجديدة، إنما ولادك لا يشوفوا فلوس الكهربا والمياه والضرائب ومصاريف المدرسة".
وتابع خالد الجندي: "مشكلة الفلوس المستترة أنها نادر جدًا لو لقيت حد من ولادك بيشكرك علشان دفعت فلوس الكهرباء أو المياه أو الإيجار أو مصاريف المدرسة ولكن لو جبتله ساعة هيقولك متشكر لو جبتله أكلة كويسة لأن دى فلوس ظاهرة".
واستطرد: "الإنفاق المستتر أكبر بكتير من الإنفاق الظاهر، وهي دي مشكلة الدولة أنها تدفع أموالا باهظة ومليارات علشان توفر لينا بنية أساسية توفر بها كل الخدمات مثل الصرف الصحي ولولاه كانت البلد تدمرت".
وأردف "لولا الطرق والكباري اللي مش عاجبه بعض الخونة والمأجورين كنا أصبنا بحالة تجمد البلد كانت وصلت إنها كانت كده، اتعملت الكباري والطرق والشوارع والناس لسة دماغها في حلة الشوربة وحتة اللحمة".
وأكمل: "صحيح حتة اللحمة مهمة ولكن فيه حاجات لها أولوية كان لازم نلجأ إليها شبكة الكهرباء التي كانت متهالكة وكان هناك انقطاع للتيار وتلف الأجهزة أصبح بها فائض يتم تصديره".
وتابع: "بيهدروا كل مجهود الدولة بسبب ارتفاع الأسعار، لازم حد يقول كلمة الحق ويتحمل حتى لو وصف أنه بيطبل لبلده أه أنا بطبل لبلدي اتكلم على المستشفيات والمدارس وشبكة الصرف الصحي".