قال الشاعر الغنائى أمير طعيمة على حسابه الشخصى على موقع التواصل الاجتماعى "فيس بوك": أن الشعب المصرى اللى تقريبا بيختلف مع بعضه فى كل حاجة ، دين، سياسة، رياضة، فن، أجمع على حب شخص واحد اسمه مجدى يعقوب، الدكتور مجدى يعقوب ما سوقش نفسه للناس فى الاعلام ، ما سعاش لمناصب و لا خوت دماغنا ليل نهار بالوطنية و حب الوطن و انجازاته، ما عملش حاجة غير انه اشتغل بجد لخدمة البشرية و وطنه وعشان كده وصل لقلب كل واحد فى العالم حتى اللى قلبه مش واجعه.
وأضاف طعيمة كاتب كلمات أغنية "ارسم قلب" التى ظهر فيها الدكتور مجدى يعقوب، أن البروفيسور و السير (اللقب اللى منحته ليه ملكة إنجلترا) مجدى يعقوب ما عملش إعلان من سنين طويلة ، و قبل مؤسسة مجدى يعقوب فى أسوان عمل مؤسسة لعلاج مرضى القلب فى الدول النامية ، لف الدول النامية كلها تقريبا و أنقذ حياة آلاف المرضيين بدون مقابل لغير القادرين و بدون دعاية، اللى ما يعرفهوش البعض إن د. مجدى يعقوب بيطلع فى الإعلانات يبوس الأيادى، لأنه لا يحب الظهور و بيرضخ فى الآخر لما بتتقاله جملة واحدة : "ظهورك هيزيد من التبرعات لمرضى القلب لأن الناس بتثق فيك".
وتابع طعيمة، اللى بيطلب من دكتور مجدى يعقوب يطلع فى حوار يتكلم عن إنجازاته أو يشارك فى إعلان بأجر أو حتى يرغى معاه بيقوله كلمة واحدة: الوقت اللى هضيعه ده ممكن أنقذ فيه قلب طفل.
سامحونى لو بتكلم عليه كتير ، و ربنا يعلم إنى ما جاليش شرف إنى أقابله و لو مرة واحدة في حياتى ، بس أنا طول عمرى بشوف إن الراجل ده نموذج لما يجب أن يكون عليه البشر عموما ، و الشعب المصرى خصوصا، ربنا بيخلق كل واحد فينا لهدف ، و لو كل واحد فينا حقق الهدف ده ، هتبقى الدنيا جنة مش حروب و صراعات وظلم و فشل.
وختم طعيمه قائلاً "ربنا يحفظك و يحميك و يخليك لكل قلب طفل محتاجلك يا ملك القلوب".
اعمل اللى عليك و اشتغل و أخلص فى عملك هتدخل التاريخ من أوسع أبوابه من غير ما تسعى لكده.
