عشان ما تتفاجئيش.. 8 حاجات لازم تعرفيها قبل قرار الاستقلال "اسألى مجرب"

التحرر من القيود والانطلاق وتحقيق الذات، والتصرف بعيدًا عن تحكمات الأهل، واكتساب المزيد من الثقة بالنفس فضلاً عن الشعور الممتع بأنها قادرة على إعالة نفسها والحياة دون الاعتماد على آخر. هذا الوجه المشرق لاستقلال الفتيات الذى يشبه حلمًا ورديًا لدى الكثيرات، يجعل البنت المستقلة محط غيرة الأخريات ممن لم تسمح لهن الظروف بأن يعشن مستقلات.

فى المقابل، ترى الفتيات المستقلات اللائى خضن التجربة وتعرفن عليها من قرب أن الأمر ليس بهذه السهولة، وأن هناك الكثير من المفاجأت وجدنها بانتظارهن بعد استقلالهن والكثير من الخبرات اكتسبنها بعد سنوات من الاستقلال والتجارب المريرة أردن أن يشاركن الحالمات بالاستقلال إياها لتكون تجربتهن أسهل قليلاً، ولا يقعن فى الخطأ نفسه.. الموضوع مش سهل! "أهم حاجة لازم البنت تعرفها إن الموضوع مش سهل" هكذا بدأت "أسماء القمحاوى" إجابتها على سؤال "انفراد" عن أهم ما يجب أن تعرفه البنت التى تنوى الاستقلال، وأوضحت "طول عمرنا بنتعود نعتمد على اللى حوالينا، لكن لما بتستقلى إنك مسؤولة عن نفسك حرفيًا فى كل حاجة، ورغم إنك ممكن تنبسطى فى البداية بالفكرة دى لكن بيجى عليكى وقت وتحتاجى حد يشيل مسؤوليتك لو ثانية واحدة بس".

مهما كانت ظروفك.. متخافيش أما "أهيلة سعد" فقالت "الموضوع صعب فعلاً وممكن تنام فعلاً من غير عشا وتمشى مش أزمة، بس الفكرة إن ربنا مش بيسيب حد، ومن غير ما تبقى واخدة بالها ولا مرتبة ربنا بيحلها من عنده، أهم حاجة ما تيأسش، هتعدى عليكى أيام وحشة بس هتتعلمى إنك تظبطى أمورك الشهر الجاى، وهتتعلمى تشيلى مسؤولية وإحساسك بالناس هيزيد".

المجتمع ما بيحبش الست المستقلة النقطة الأهم فى نظر "صفاء بسيونى" هى نظرة المجتمع، وقالت "صعب جدا تلاقى حد يأجرلك شقة بسهولة باستثناء طبعا مناطق راقية جدًا مش كل الناس بتقدر على الحياة فيها ماديًا.. هى دى الفئة اللى ما بيفرقش معاها وضعك الاجتماعى، قيسى على ده انه مافيش راجل بيفكر يرتبط جديًا بالست المستقلة اللى عايشة لوحدها فى مجتمعنا الشرقى الجميل.. من اآخر بتبقى مطمع ونظرة الناس ليها على إنها ست أو بنت مش كويسة".

وأضافت "عموما احنا مجتمع مابيحبش الست المستقلة وبيشوفها مسترجلة وبيعتبرها مش مظبوطة لمجرد انها اختارت تعتمد على نفسها وماتتحوجش لحد وبالتالى سمعتها بتكون اول حاجة بيبتزوها بيها عشان تفضل محووجة للراجل وعايشة تحت ضله".

خليكى قدها.. وما تبينيش إنك لوحدك للسبب نفسه ترى "إحسان الشامى" أن أهم ما يجب أن تدركه البنت المستقلة هو "إنها تبقى قد ثقة أهلها فيها، وما تبينش طول الوقت للناس إنها لوحدها، لإن المجتمع بيبص لها نظرة مش كويسة، وبيعتبرها سهلة".

اظبطى فلوسك وتصرفاتك أهم نقطتان تناولتهما "عايشة محمد" هما "المصروف والتصرفات" فقالت "انا كنت عايشه لوحدى لمده خمس سنين بس مش استقلال عن الاهل كان عشان دراستى لانهم فى السعوديه ودراستى فى مصر فعشت لوحدى، وكان مصروفى منهم بس فعلاً كان ممكن ايام تعدى ويكون معايا يادوب حق مواصلات الجامعة.

ده كان فى اول ترم لكن بعد كده اتعلمت إن معايا مبلغ معين هصرف منه على الأكل والشرب والمواصلات والورق والكتب وكمان احوش منه".

وأضافت "المهم بقى بعيدًا عن الماديات إنها تعرف إنها هتكون محط أنظار وشكوك دائمًا ومهم تهتم بتصرفاتها واصحابها وحياتها علشان ماحدش يؤذيها بالكلام".

الوحدة مش سهلة تحدثت "ريهام محمد" عن المشكلة الأصعب التى تواجهها فى استقلالها "أصعب مشكلة بتواجهنى إنى مش عارفة أعيش لوحدى فنصيحتى لأى بنت عايزة تعمل دا إن مهم أوى يكون جنبك صاحبة، أو حد يدعمك".

اتعاملى أول الشهر زى آخر الشهر بالظبط خلاصة خبرة 10 سنوات فى الحياة مستقلة قدمتها هبة محمود لأى فتاة تنوى الاستقلال "أهم حاجة اتعاملى أول الشهر زى آخر الشهر بالظبط، يعنى ما تفرحيش أوى أول ما تمسكى الفلوس عشان هيطيروا.. ادفعى مصاريفك الإلزامية أو شيليها على جنب قبل أى حاجة وآخر حاجة تحسبى لها الأكل، لأنك ممكن تاكلى أى حاجة".

أوقات بتكونى تعبانة مش لاقية اللى يديكى دوا أما "يمنى محمد" فقالت "هتعدى عليكى أيام بتكونى تعبانة ومش لاقية اللى يديكى دوا حتى ويعملك حاجة تاكليها".