بالصور.."حمو" رئيس موقف الوراق.. وضع دستورا للسواقين والخناق ممنوع

"الموقف".. عالم مواز صنع أفراده لأنفسهم قانوناً خاصا، لا صوت يعلو فوق صوت قواعد الموقف التى تم إقرارها وفقاً لضوابط خاصة.

عن حكاية رئيس جمهورية الموقف، وأبرز القوانين، يحكى لنا الأسطى حمو، رئيس جمهورية موقف الوراق عن تجربته قائلا: "الحكومة بيسمونا بلطجية.. لكنا احنا بنتعامل بالحب والاحترام"، أنا كنت سواق على عربية والسواقين هم اللى اختارونى عشان أمسك الموقف، بناخد من السواق 5 جنيه فى اليوم، ولو ظروفه صعبة أو عربيته عطلانة احنا اللى بنلمله فلوس".

يقول الأسطى حمو: "بحب أمشى فى السليم ومبدخلش عربية من غير رخص"، وأول قوانين الموقف هو منع السيارات غير المرخصة من الدخول والتحميل.. "معاكش رخص حمل من السكة".

وأشار حمو إلى أن العدل هو الأساس فى الموقف: "العجل له دور، وكل سواق ياخد دوره بس"، وممنوع غسيل السيارات فى الموقف "عشان الأرض متتطينش ونوسخ باقى العربيات.. ولو حد غسل عربيته هنا لازم يرجّع الموقف نظيف زى ما كان".

وأشار حمو إلى أن "الخناقات ممنوعة فى الموقف.. والسواق اللى ميحترمش وجودى مالوش مكان هنا، والسواق اللى يغلط فى زبون، يطلع بعربيته فاضية".

وأكد حمو أنه يكره استغلال السواقين: "السواق اللى يغلى الأجرة ع الزبون، أستنى لحد دوره ما يجى وأقوله مش هتحمل، لازم يتحرق دمه زى ما بيعمل فى الناس"، كما أكد أن موقف الوراق شبه خالى من المخدرات وأضاف "بقول للسواقين محدش يشرب هنا حاجة عشان ميشبهناش".

وأشار إلى أن مطالب السواقين "حاجتين بس: تندة عشان الصيف جاى وبنتعب من الشمس.. وحمامات نظيفة".