بالصور الفقراء يلجأون لسوق "السقط" والمجمعات الاستهلاكية لارتفاع أسعار لحوم الجزارين.. الكرشة و الفشه و الممبار ابطال السفرة فى العيد

سوق السقط بشارع المدبح بمنطقة مجرى العيون أحد أهم الأسواق على مدار العام و التى دائما ما يلجأ إليها الفقراء لسد أحتياجتهم من اللحوم البديلة فى ظل أرتفاع اللحوم بمحلات الجزارة .

و لكن مع دخول موسم عيد الأضحى المبارك تزداد حركة البيع والشراء بسوق السقط مع أقتراب أيام عيد الأضحى المبارك من كل عام ليعرض كل الجزارين والبائعين بالسوق الفشة والكرشة والممبار بأسعار منخفضة لتشجيع المواطنين على الشراء منتهزين فرصة غلاء أسعار اللحوم وعدم مقدرة المواطن الفقير على شرائها

وعن أسعار السقط بالسوق تقول الحاجة بدرية أحدى البائعين : " أسعار السقط فى متناول الفقير ولا زيادة فى الأسعار عن السنة الماضية وبنخفض السعر فى أيام العيد عشان عندنا زيادة فى السقط لزيادة الدبائح فى المدبح خلال أول 10 أيام من شهر العيد دا الموسم بتاعنا و الناس بتجيلنا من أخر الدنيا تشترى كل إللى نفسها فيه"

وتضيف بدرية :" ال١٠٠ عندنا ممكن تشترى بيها حجات كتير وتروح بيتك محمل أكتر من ٥ كيلو سقط عندنا كيلو الكرشة ب ١٥ جنية والممبار ب ١٥ والفشة ب١٠ ولحمة الراس ب٢٠ جنية للكيلو اللسان ب٣٥ جنية "

ومن جانبه قال الحاج أبو سليم أحد البائعين بالسوق :" احنا شغالين طول السنة ولينا زبونا وبيجيلنا لحد عندنا وفى زباين بتجيلنا من السنة للسنة فى ايام العيد دا لرخص أسعارنا إلى بنحارب بيها الغلا وجشع تجار اللحمة ونساعد بيها الغلبان "
وفى نفس السياق تقول نسرين عاطف ربة منزل : " أحنا بنشترى السقط كل عيد أضحى وبنفطر عليه يوم الوقفة وبنشترى لحمة عشان العيد والسنة دى اتفاجئنا بارتفاع أسعار اللحمة بشكل مبالغ فيه ومابقناش قادرين نوفر لحمة لعيالنا عشان كدا بنزود من لحمة الراس والسقط لأنهم ارخص عشان نعوض العيال ونفرحهم ونقضى بيهم ايام العيد كلها "

ومن جانبه قال إبراهيم سيد موظف بإحدى الشركات الخاصة : " معرفناش نشترى لحمة من الجزارين السنة دى بسبب ارتفاع الأسعار وأضطرينا نجيب لحمة من الجمعيات التعاونية برغم انها مالهاش طعم زى اللحمة الطازة وبنكمل بالباقى كرشة ولحمة راس عشان نفرح ونفرح عيالنا فى العيد مالهمش ذنب يتحرموا من اكل اللحمة بس هنعمل إيه مافيش فى ايدينا حاجة نعملها وادينا بنحاول نعوض إللى مانقدرش نجيبة ".