رجال الدين والتفاهة

رجال الدين والتفاهة تخيل يا أخى المواطن العادى، وإحنا ناس غلابة على باب الله أنا وأنت، لما نلاقى الإخوة رجال ونساء الدين بيلاغوا بعض بالتطاول والشتيمة والتلقيح، أمال إحنا نعمل إيه بقى، عندك يا سيدى الشيخ ياسر برهامى، نائب رئيس مجلس إدارة الدعوة السلفية طلع وقال «إن الـ«خمسة وخميسة» لمنع الحسد لا تجوز لأنها شرك بالله»، فقامت الست الدكتورة آمنة نصير، أستاذ الفقه المقارن بجامعة الأزهر الشريف، وعضو مجلس النواب، ردت عليه، وقالت له: «بطّل تفاهة»، وبغض النظر عن تفاهة الشيخ من عدمها، لما يبقى ده المستوى اللى رجال الدين بيكلموا بيه بعض، يبقى قول على البلد دى يا رحمن يا رحيم. زمن الابن اللى بيسرق أبوه تقترب القيامة من القيام حين نتوقف عن الانزعاج من الجرائم العائلية، التى يعتدى فيها الأب على ابنه والابن على أبيه، والإخوة فيما بينهم.. وتعالى ننزعج قليلا من هذه الجريمة، تلقى رئيس مباحث قسم شرطة عابدين، بلاغا من «عاطف.ع.إ» 57 سنة، مهندس، يفيد بأنه اكتشف سرقة مبلغ 20 ألف جنيه، و16400ريـال سعودى، و2230 دولار أمريكى، ثم تبين أن نجل المبلغ وراء الحادث، وأنه سرق النقود لشراء سيارة.. انزعجت حضرتك؟! أكيد مش قوى، الحاجات دى بقت تافهة وعادية، عندك حق، ربنا يستر على بلدنا.