الحياة حلوة.. بس أنت اللى مصرى

مصر يا أول نور فى الدنيا شق ضلام الليل، عاجبك اللى بيحصل ده؟! بالذمة دى طريقة؟! هنلاقيها منين ولا منين، منك ولا من الحكومات اللى ورا بعض ولا من المصريين؟ إحنا شعب فى بعضينا، شاربين من نفس الماية الملوثة، واكلين من نفس الحمار المدبوح، ليه نصعبها على بعض؟ ربنا عز وجل كتب علينا من فوق 7 سماوات أن نعيش فى مصر فى هذه الأيام، وتحت هذه الظروف، لا تعرف هل هو عقاب، أم تكفير ذنوب، ولا إحنا على رأى أحد سائقى التاكسى، كما كتب على مؤخرة سيارته ميتين وجايين مصر عشان نتحاسب؟! سبحان الله يا أخى، تشوف الخواجة من دول، ظروفه الاقتصادية جميلة، وحياته جميلة، وعنده حقوق فى بلده، وسبحان الله كمان بيتعاملوا مع بعض عدل، بالدين والأخلاق والحب والاحترام والقانون، تيجى تشوف المصريين الجمال، ولا بلاش. يا ريت نسهلها على بعض، نضحك فى وش بعض، نساعد بعض، نبطل مرازية فى بعض، واشتغالات فى بعض، وسرقة فى بعض، وافترى على بعض، وغش فى بعض. الحياة حلوة، بس إحنا عايشين فى صندوق مقفول، والأكسجين شاحح، ومش ناقصة خنقة.