خلال ندوة انفراد "مستقبل السياحة فى مصر".. حسام الشاعر: لدينا مشاكل بتأمين المطار والدعاية.. هشام على: 4 مليارات جنيه لإحلال وتجديد فنادق شرم الشيخ.. الهامى الزيات: 2.5 مليون عامل هجروا السياحة

كامل أبو على: نداء لـ هشام زعزوع يرحمنا ويرحم مصر ويسيب مكانه لحد تانى.. الدولة بتتعامل مع مستثمرين السياحة على أنهم بتوع "هشك بشك" - الدكتور خالد المناوى: الدولار مش هيرجع إلا عن طريق السائح..أنا بلم وبشحت آخر الشهر علشان ندفع المرتبات - الدكتور خالد المناوى: لا يوجد شىء يدعو لحبس مستثمر استثمر فى بلدك بالمليارات تيجى تحبسه لأنه لم يدفع تأمينات العاملين يواجه القطاع السياحى فى مصر، أزمة قد تكون الأسوأ خلال السنوات الماضية، فى ظل انحسار الحركة السياحية الوافدة لمصر، عقب حادث الطائرة الروسية المنكوبة بسيناء فى أكتوبر الماضى، وتعليق عدد من الدول الأوروبية رحلاتها لمصر، تعاقد الحكومة مع شركة بريطانية لمراجعة الإجراءات الأمنية بالمطارات، لم يكن مرضيا للمستثمرين ووصفوا بإهدار الوقت والمال، وأن الدولة لا تشعر بالمستثمرين وتتعامل معهم على أنهم بتوع "هشك بشك" رفضوا إنشاء شركة للطيران الخاص وطالبوا بالسعى لخلق طلب على مصر وكشفوا عن مشاكلهم وكيف تتعامل الدولة مع مستثمرى القطاع السياحى.

هل هناك بوادر أمل لعودة السياحة أم مازال أداء القائمين على السياحة غير مرضى؟ حسام الشاعر عضو مجلس إدارة الاتحاد المصرى للغرف السياحية: مازال الأداء غير جيد.. وعندنا مشكلتان "تأمين المطار" و"التنشيط والدعاية"، "أحنا بقالنا 3 شهور بنلف وندور حولين نفسنا ومنعملش حاجة.. سمعة المطار "وحشة"، والناس خايفة تيجى علشان المطارات.. ولجان بتيجى ولجان بتمشى ومنعرفش أيه اللى بيحصل فى اللجان دى لكن اللى أعرفه أن الشغل مرجعش".

حضرتك مازالت على موقفك فى الحوار الذى أجريته مع "انفراد"؟ "أنا مش شايف أن فيه حاجة اتحسنت.. الناس بتقول أن مطاراتنا غير آمنة، ومازالنا غير قادرين أن نثبت لشركائنا بالخارج أن المطارات آمنة".

هل مازال لديك نفس التخوف برغم التعاقد مع شركة "كنترول ريسكس" البريطانية لمراجعة تأمين المطارات؟ أنا من وجهة نظرى بصراحة أن "كنترول ريسكس" مضيعة للوقت والفلوس.. لا هى هتنفع ولا هترجع شغل وهتاخد وقت كبير جداً.

ما الحل من وجهة نظرك ؟ أحنا طالبنا من رئيس الوزراء التعاقد مع شركة عالمية أو شركة مصرية دولية تقوم بإدارة الأمن فى المطار والحل الأفضل الاستعانة بشركة "عالمية" لما لديها من قدرة على تأمين المطارات، بالإضافة إلى تحسين الصورة الذهنية لمصر بالخارج، فالشركة سوف تتحدث نيابة عنك مع الدول الأوروبية وهتقول أننا عاملين الإجراءات المعمولة فى مطار لندن وباريس فرانكفورت.. هى هتتكلم عنا أحسن ما أنت هتتكلم عن نفسك وهترد على اللى بيشكك فى الأمن.. وأى شركة هتشتغل بعمالة مصرية لا تقل عن 95% .. وأنا شايف أن مفيش حاجة تمس السيادة المصرية لأنه هيشتغل بعقد بشروطك وضوابطك.

ولكن وزير السياحة هشام زعزوع أكد فى حواره لـ"انفراد"، أن المرحلة الحالية تحتاج للشركة لمراجعة الإجراءات الأمنية وأنه سيتم إنشاء شركة مصرية بخبرة أجنبية لإدارة المطارات؟ فما تعليقك؟ دور "كنترول ريسكس" هو "شهادة" .. أنا معتقدش أنى لو رحت بالشهادة دى "للروس" هيرجعوا الشغل مش هيحصل!.. الناس محتاجة تشوف أمن وتغيير داخل المطار، مش عايزين "شهادة" أما بالنسبة للرد على كلام "أننا هنعمل شركة".. أنا عندى تحفظ على هذا الموضوع.. أحنا بسمع الكلام دا من شهر ونص.. الشركة بتتعمل فى 3 أيام، والخوف من عودة البيرواقرطية فى العمل ومجاملات فى تعيينات..لكن التعاقد مع شركة أجنبية هتختار العمالة وفقا للكفاءات. هل هناك مطالب محددة تم مناقشتها مع رئيس الوزراء فى الاجتماع الأخير؟ هشام على رئيس جمعية مستثمرى جنوب سيناء: أنا تحدثت مع رئيس الوزراء فى نقاط معينة الوضع اللى أحنا فيه وإزاى أنقذ ما يمكن إنقاذه خاصة فى موضوع "العمالة – دور البنوك المصرية".. لما بنزل فى فنادق "دبى" بشوف ولادى كلهم اللى ربتهم بلقيهم هما اللى شغالين هناك.. هما بيقبلونى مقابلة أنا ببقى سعيد وحزين جوايا أنا كنت أتمنى أن الكفاءات دى تكون موجودة فى مصر.

اتكلمنا مع رئيس الوزراء عن إحلال وتجديد الفنادق.. فمنذ 5 سنوات الفنادق لم تجر أى عمليات لتجديد أو الصيانة، فالفندق 5 نجوم لا نستطيع أن نقول عليه الآن 5 نجوم، وكذلك 4، 3 نجوم ..محافظ البنك المركزى وافق على ضخ 4 مليارات جنيه لإحلال وتجديد الفنادق، ولكن بضمانات مثل تعيين استشاريين للإشراف على الإنشاءات... الإحلال والتجديد.

ما عدد الفنادق التى سوف تستفيد من 4 مليارات جنيه؟ تم تخصيص 4 مليارات جنيه لفنادق شرم الشيخ، وأحنا بنتكلم فى حوالى 25 ألف غرفة هتستفيد من الدعم من إجمالى 60 ألف غرفة بشرم الشيخ، كما تحدثت مع رئيس الوزراء عن المشكلة التى ستواجه السياح الروس وهى ارتفاع الدولار مقابل الروبل والذى بلغ بـ90 روبل، بالإضافة أن المقصد السياحى المصرى بيشهد فى الموسم الصيفى منافسة قوية من دول أخرى مثل تركيا والمغرب وتونس وإسبانيا.

وما تعليقك على إنشاء شركة مصرية للطيران لخدمة السياحة؟ أنا متحفظ على إنشاء شركة طيران لأسواق محددة، يعنى أية أعمل شركة طيران وأحولها "عتبة.. عتبة تنزل موسكو تقول شرم شرم ..غردقة غردقة وتحمل وتطلع لا .. أحنا المفترض نتكلم عن شركة طيران بتشتغل "إنترناشونال" مثل " توماس كوك" بتسيير رحلاتها لكل الدول .. لكن علشان أنا أقول أعمل شركة طيران وافتكر أنى بسوق "مصر" بس ..ابقى فشلت.

ما تعليقك على ما تم مناقشته خلال الندوة حتى الآن؟ الهامى الزيات رئيس الاتحاد المصرى للغرف السياحية: أولا أنا متفق أن الأزمة هتستمر لسنة أو سنتين وهذا رأيى الشخصى، ليس فقط بسبب أزمة "الروبل الروسى" ولكن هناك دراسة تم إعدادها بالتعاون مع شركة متخصصة لإجراء الدراسات لمعرفة "الناس بتفكر فينا إزاى" وده اللى لازم ابتدى أفكر فيه .. "مش لازم أفتى وبس" عينة الدراسة شملت 3 الآف "أمريكان- إنجليز- ألمان -روس –صينيين- إيطاليين" والسؤال كان "كم شخص يريد الذهاب إلى مصر هذا العام؟" والإجابة كانت 11%.

السؤال الثانى "كم شخص يريد الذهاب لمصر دلوقتى؟" الإجابة كانت 2%، السؤال الثالث، "كم واحد هيسافر مصر خلال السنوات القادمة؟" الإجابة كانت 60% .. السؤال الرابع "كم واحد لا يود السفر لمصر؟ الإجابة كانت 30%.. وهذه النسبة خطيرة جدا وأول مرة نتعرض لها.. المشكلة أن المقصد المصرى أصبح غير مرغوب.. إذاً نحن بحاجة لتغيير الصورة الذهنية لمصر، وليس مسئولية السياحة فقط، ولكنها مسئولية مصر كبلد.

ومن هو المسئول عن تحسين الصورة الذهنية لمصر بالخارج ؟ المسئول عن تحسين صورة مصر ..هيئة الاستعلامات ووزارة الخارجية.. فنحن لدينا مشكلة فى صورة مصر خارجيا، فيجب معالجتها أولا ..قبل التسويق ، ولكن أسوق قبل ما أحسن الصورة ده كلام .." وأتفق مع حسام الشاعر فى ضرورة وجود شركة لإدارة المطارات سواء كانت مصرية أو أجنبية فى الأخر هيتعيين 98% مصريين.. "وزارة الداخلية متنفعش أنها تكون المسئولة عن المطار .. مهامها تقتصر على التأمين من الخارج، أما عن " كنترول ريسكس" فدورها مهم لتحديد الإجراءات المطلوبة فى تأمين المطارات .

أما بالنسبة لإحلال وتجديد الفنادق انا بنظر لمصر كافة وليس شرم فقط .. انا كرئيس اتحاد لازم أنظر للغردقة والأقصر وأسوان ..احنا ضاع مننا اكثر من نص القوى العاملة واللى مشى هما الكويسين".. حوالى 2.5 مليون عامل من إجمالى 4 ملايين عمالة مباشرة وغير مباشرة واشتغلوا فى الدول العربية .. أو غير المجال.. وللأسف خريجى السياحة والفنادق لا يصلحوا لأنهم لا يمتلكون أى لغة .. لا يوجد أى إغراء لواحد يجى يمتهن مهنتنا؟.. ولدينا مشكلة مالية مع البنوك .

ما المقترحات لحل الأزمة من وجهة نظرك كمستثمر سياحى؟ المستثمر السياحى كامل أبو على: لو استمرت أزمة السياحة أكتر من 4 شهور مش هقول سنة.. أكثر من 70% من الفنادق المفتوحة حالياً فى البحر الأحمر هتقفل .. هيبقا عندكم بالظبط نصف مليون عامل متشرد الفترة القادمة .. ومين العبقرى اللى عندنا فى مصر يقدر يعمل من "الفسيخ شربات" يبقا عبقرى فى التسويق ويقصر المدة .. أنا مع كل احترامى لكل الناس فى هيئة تنشيط السياحة ووزير السياحة ووزير الطيران ليس عندهم الكفاءة ولا الإمكانيات أنهم يقودوا السياحة خلال الفترة القادمة، إذا كان هما فى الفترة السهلة اللى مكنش فيها مشاكل وكانوا ضعاف .. الحل الوحيد السريع هو الإنسان المعجزة اللى ممكن يطور أى شئ .. ولدى شعور اننا قاعدين فى مجتمع مهزوم معندوش أى طموح خالص .. أزاى بتتكلموا عن وزارة السياحة اللى هى اكبر مصدر للسياحة من حج وعمرة وخلافه كان أولى بيهم يتوجهوا للسياحة الخارجية اللى بتجيب الدولار .

أحنا عندنا مصيبة كبيرة جداً من 5 سنين مصر معملتش دعاية بدولار واحد وفجأة حملة "وحشتونا وقرفتونا والحاجات دى كلها" احنا بنكلم بعض فى المهرجانات برة الواحد بيشوف يبقا عاوز يرجع.. يا جماعة النهردة انتم عندكم وزير لما يطلع من 3 سنين فاتوا ونختار افضل وزير فى العالم وانت عليك حظر ولبسونا السلطانية علشان الراجل فى "الباسيفك " الراجل الهندى بيخش على الدول النايمة والعبيطة ويديك شهادة أحسن وزير .. اصلاً المنصب ده مش موجود فى الدنيا كلها العالم.

البلد دى مش هتقوم.. نفسى أشوف أن فى يوم واحد يقول أنا مش قادر هسيب مكانى.. نداء لـ"هشام زعزوع" يرحمنا ويرحم مصر يسيب المكان ده لواحد يقدر يرجع السياحة.. الوزير اللى جه من داخل القطاع دمر القطاع.. أحنا محتاجين وزير من خارج القطاع يكون قادر على اتخاذ القرار مش يده مرتعشة ومش بيحب الإعلام.

ما وجهة نظرك فيما تم طرحه من مناقشات حول أزمة السياحة الراهنة والتعاقد مع شركة " كنترول ريسكس" البريطانية لمراجعة الإجراءات الأمنية ؟ الدكتور خالد المناوى رئيس غرفة شركات السياحة :أنا لى رأى آخر يختلف عن باقى الآراء .. المشكلة عندى أنى لازم أروح للدكتور يشخص لينا المشكلة.. ونحن لم نشخص المرض تشخيصاً صحيحاً حتى الآن، وماذا حدث وماذا دار لصناعة السياحة فى مصر.. الأحداث متلاحقة لكن واحد بيحلها من فترة معينة .. لازم يكون عندى لجنة إدارة أزمات لديها فكر سليم حال حدوث شىء يكون هناك حل لها.

فمثلا حادث الغردقة تزامن مع حادث حريق فندق دبى .. شاهد تعامل دبى وتصريحاتها وإدارتها للأزمة وقارن بين تصريحات المسؤولين فى الغردقة..لماذا لا يوجد متحدث رسمى لإدارة الأزمات بمصر؟ السوق الإيطالى "مات" بسبب حادث مقتل الشاب الإيطالى بالقاهرة .. جثة الإيطالى خرجت من مصر دون أى تصريح رسمى بالإضافة إلى عدم صدور تقرير الطب الشرعى.. نحن نتعامل على أساس أن الناس دى بكرة هتنسى لكن الحقيقة أنهم مش بينسوا.

وتساءل قائلاً: "هل الدولة مؤمنة بأهمية هذا القطاع أم لا.. لو الدولة ممثلة فى الحكومة ككل وأجهزتها السيادية مش وزير السياحة بس مؤمنة بهذا القطاع سوف يكون هناك آليه لإدارة الأزمة.. لكن نحن ندير الأزمة بشكل فردى .. تعالى شوف تونس عملت ايه لما وقع حادث "سوسة" الحكومة التونسية أصدرت قرار انها هتساعد الفنادق والشركات ..وقامت بدعوة وزارء داخلية أوروبا وهذه إدارة دولة وليس إدارة وزير .

لابد أن تقتنع الدولة أن هذه الاستثمارات ذات جدوى.. أنا شايف أننا كمستثمرين أو كعاملين فى هذا القطاع أننا كم "مهمل" مما نتج عنه إحباط لدى المستثمر والعامل وهذا خطير جداً.. لا يوجد شىء يدعو لحبس مستثمر استثمر فى بلدك بالمليارات تيجى تحبسه لأنه لم يدفع تأمينات العاملين وتقول إن القانون عاوز يتعدل.. أنا مليش دعوة بقانون عاوز يتعدل من عدمه ممكن يطلع قرار جمهورى أو قرار من مجلس الوزراء بأن حصة العاملين.. وأنا قلتها فى اجتماع رئيس الوزراء لما وزيرة التأمينات قالت ما أنت بتخصمها من العامل فقلت ليها أنا معنديش أدفع أجور العاملين علشان أخصمها .. ولكن أنا بلم وبشحت آخر الشهر علشان ندفع المرتبات .. أنا بقول أنه فى حال إدارة الأزمة بفكر صحيح فلن تطول كثيراً وهنشتغل.

أنت عندك مشكلة فى الدولار والحل الوحيد فى ذلك السياحة.. هذا كلام واضح ومباشر وكحكومة ودولة وبنك مركزى تركيزى على إزاى أرجع الدولار .. والدولار مش هيرجع إلا بالسائح .. واحنا مجربين قبل كدا.

وبعدين هل الدولة تشتغل على أهل الثقة ولا أهل الخبرة .. لابد أن تتغير المنظومة لتكون لاهل الخبرة .. ماذا سيضيف اى وزير أن ياتى بأهل الخبرة وقبل أن ياخذ قرار يجلس معهم فى بداية الموسم ويستمع إلى جميع الآراء لان مفيش حد يقدر يدير منظومة بكاملها .. وكل وزير يدير الوزارة بفكره ولم يترك منصبه بيجى وزير آخر بفكر مختلف، لابد أن توضع استراتيجية لصناعة السياحة لمدة 10 سنوات قادمة.