وزيرة الثقافة تكشف لـ"سرك فى بير" قصة زواجها فى 10 أيام.. إيناس عبد الدايم: "اشتغلت جليسة أطفال فى فرنسا.. وشيَّطت "الرز بلبن".. وتروى قصة الآلة الموسيقية الأحب إليها.. وتكشف سر عدم نومها ليلة حلف الي

- الوزيرة تروى تفاصيل الزواج: "تعرفت عليه فى حفل للشيخ إمام فى فرنسا.. وفاجأنى فى القاهرة أمام باب البيت.. قالى أنا رجعت من فرنسا علشان أتجوزك.. هتقبلينى ولا لأ؟" تكشف إيناس عبد الدايم وزيرة الثقافة فى الجزء الثانى من حلقتها فى برنامج "سرك فى بير"، أسرار وحكايات منذ 58 عام مضت، منها فترة عملها فى فرنسا، وحكاية زواجها منذ أن تعرف عليها زوجها فى حفلة للشيخ إمام إلى أن فاجئها فى القاهرة لطلب زواجها، وكذلك سر الآلة الموسيقية التى اشترتها من باريس ولا تزال تحتفظ بها حتى الآن. سألنا الوزيرة إيناس عبد الدايم عن أول "شغلانة" فى باريس لكى تتمكن من تدبير مصاريفها، فكشفت: "عملت بيبى سيتر، لإن دى كانت المساحة اللى كانت تخلينى أشتغل وأذاكر، ثم لأن كان ليا طموح إنى أقدر أشترى آلة الفلوت بتاعتى، كان عندى آلة، بس كان عندى طموح أشترى آلة متطورة أكتر، وحسيت إنه حرام أحمل أمى مسئولية تمن الآلة الجديدة، كفاية إنها كانت بتساعدنى فى العيشة لأن كانت المنحة مش بتكفينى، الرائع إن الآلة دى معايا حتى الآن، وهى أقرب آلة لحياتى، أشعر وكأنها صديقى الذى لن يخوننى أبداً. كما تحدثت الوزيرة عن بداية علاقتها مع زوجها، بقولها: "تعرفنا على بعض فى فرنسا فى حفل فنى، وأنا بدرس كنت رايحة أحضر حفل للشيخ إمام وأحمد فؤاد نجم، ومعى أصدقاء من جنسيات مختفلة، وزوجى كان يجلس ورائى مع أصدقائه، فحصل كلام أثناء الحفلة، وهو كان عارفنى لإنى كنت ابتديت أمارس حياتى الفنية، وكنت بعمل حفلات فى مصر، وفجأة بعد ذلك بأسبوعين، لى أصدقاء مصريين هناك وجهولى دعوة لزيارتهم، وجدته هناك، فهمت بعد ذلك إنه حصل حوار معاهم، وإنهم عملوا اللقاء دا علشان نتقابل، وكانت والتقينا". سألنا عن كواليس فترة الحب وعن أول وردة وصولاً للزواج، فقالت: "ملحقناش نجيب ورد، المشاهد كانت عجيبة، كان هناك اتصالات، لكن كنت فى اليابان بأحد الحفلات وبعدما أنهيت تلك الحفلة رجعت للقاهرة لقضاء الإجازة الصيفية، وهو كان فى باريس، وكنت ابتديت أتكلم مع الوالد والوالدة عن أن هناك شخص تكلمت معه وأننا فى فترة تعارف، وفى فترة الإجازة فوجئت إن الباب بيخبط وبيقولولى فيه حد برا عاوزك، قلتلهم مين قالولى حد بيقول إنه من باريس وعاوزك، فخرجت لقيته فجالى حالة ذهول، قلتله خير واتخضيت، قالى أنا جاى علشان أتجوزك، قلتله إزاى كده مش هينفع وسبته على الباب ورحت لماما جرى، كان كل خوفى منها لتفتكر إننا اتفقنا على كده، ماما قالت دخلوه الصالون وفى الحال جمعت أهلى وأخوالى و أعمامى وكل الناس علشان يشوفوا مين دا، والعائلة اجتمعت بالفعل، وهو قالهم أنا عندى مؤتمر كمان عشرة أيام وجاى الإجازة علشان أتجوزها هتقبلونى ولا لأ، فماما خلتهم يسألوا عليه، والموضوع كله خلص فى 10 أيام. سألنا إيناس عبد الدايم: "هل بتقدرى توازنى بين شغل البيت والوزارة ، بتطبخى مثلاً؟"، فقالت: "طبعاً بطبخ، لكن فى الفترة الأخيرة دى صعبة شوية: عقبت: " بمناسبة الطبخ، فاكرة حلة رز شاطت منك؟"، فقالت ضاحكة: " كتير فى باريس، لأن دى كانت ليها مواقف، كنت لسة بتعلم، وكنت بكلم ماما فى التليفون أقولها الأكلات بتتعمل إزاى، تخيل لما رز بلبن يشيط، شيطته واتعلمت بعد كده". سألناها عن افتقادها لإحساس الأسرة والأمان بعد منصب الوزيرة، قالت: " طبعاً بحس، لأن عندى حفيدة "بتول" وسعادتى بوجودها لا توصف، لكن فكرة إنى أترك منصبى صعبة جداً، لإنى لما بشعر بالغربة فوراً بجمع عيلتى". تحدثنا معها عن أولادها فيروز و شادى ، وسألتها عن مدى صحة موقف حكاه لى أحد أصدقائها أنها كانت تشارك فى حفل كبير وأبلغوها أن ابنتها فيروز تلد الآن فى باريس فانهمرت فى البكاء؟"، قالت: "دا صحيح، أنا عيطت من الفرحة ومن خوفى عليها وأنا مش معاها، الكوميدى بعد كده إن فى الحال غيرنا التذكرة، لأننا كنا عاملين حسابنا ليوم معين للولادة واليوم اتغير، وكنت قلقانة جداً عليها، وبكلمها بخوف، لقيت الدنيا اتطورت، وبقولها بقلق يا فيروز طمنينى، كلمتنى بسهولة جداً وقالتلى أيوة يا ماما ، قلتلها انتى بتكلمينى إزاى بسهولة كده وأنا بنهار وبموت، قالتلى كل حاجة بقت سهلة هنا". وجهنا لها آخر سؤال عن كواليس يوم حلف اليمين، ضبطت جلستها وقالت: "فى اليوم دا ما نمتش، اللى اختارلى لبسى بنتى وأختى، لإن زوجى كان خارج مصر، كل اللى كنت شايلة همه هى اللحظة اللى هقف فيها قدام الرئيس، وكنت حريصة إنى ما أخطأش فى حرف واحد". برنامج "سرك فى بير" يُعرض خلال شهر رمضان، وتستضيف الحلقات عددا من وزراء الحكومة فى حوارات خاصة جدا، تُذاع الاثنين والخميس من كل أسبوع، وتقترب حلقات البرنامج فى لقاءاتها مع الوزراء من حياتهم الشخصية منذ الطفولة وحتى تولى منصب الوزير، بما فى ذلك من حكايات المدرسة الابتدائية، وقصص مثيرة من محطات تعليمهم المختلفة. كما يكشف البرنامج فى حواراته مع الوزراء عن تفاصيل رحلتهم فى التعليم، ودرجاتهم فى الثانوية العامة، وكواليس توليهم الحقائب الوزارية، إضافة إلى أسرار تُذاع لأول مرة عن لحظات دخولهم قصر الاتحادية لحلف اليمين، فضلاً عن نشر صور جديدة لهم لم تُنشر من قبل تعرض عددا من محطات حياتهم المختلفة. "سرك فى بير" يُعرض على "انفراد"، ويقدمه الزميل محمد مجدى السيسى، ويركز على قصص حياة المشاهير من الشخصيات العامة والفنانين والرياضيين ورجال الأعمال، من الطفولة حتى الوصول لعالم الشهرة.