#فشل_الزواج_فمجتمعنا_بسبب.. مغردون يعبرون عن آراءهم: خوف الأهل من المستقبل والطلبات التعجيزية وعدم المصداقية والأنانية وحب الذات.. ويضعون الحل: تربية الشباب على تحمل المسؤولية والاختيار الصحيح والتواف

بأكثر من 14 ألف تغريده، تصدر هاشتاج #فشل_الزواج_فمجتمعنا_بسبب، قائمة ترند تويتر فى مصر وبعض الدول العربية، عبر من خلاله المشاركين فى الهاشتاج عن آرائهم فى سبب فشل الزواج فى المجتمع، مقدمين بعض الحلول التى تساعد على استمرار الزواج ونجاحه. وتنوعت تغريدات المدونين، حيث قال محمد عمر: "فى كثير من الأحيان إرغام الوالدين دون توافق الطرفين والإصرار على الارتباط تحت صيغة الحب هيجى بعد الجواز"، فيما قال أنور مهدى: "الاختيار الخطأ.. الاختيار أخطر وأهم خطوة، إذا كان الاختيار صحيح فالحياة ستصبح سعيدة مع الطرف الآخر أو العكس"، موضحا: "عناصر الاختيار الصحيح.. الدين، الأخلاق، التوافق الفكرى والاهتمامات المشتركة، تحمل المسؤولية، نضوج الشخص، متفاهم، أخلاق الأهل". أما المدون محمود علاء، فقال: "حالياً السبب الأساسى هو خوف الأهل من المستقبل، يعنى تلاقى شويه طلبات تعجيزية بمعنى الكلمة، هات وهات وهات بطريقة غير طبيعية، يبقى الشباب لازم يشتغل فوق طاقته ولازم يكون عنده على الأقل 300 ألف جنيه"، مضيفا: "وتلاقى شباب مش قد المسؤولية وعايز يتجوز علشان أصحابه أو أهله عاوزين يشوفوا أحفاد، لازم نهتم بتربية الشباب على تحمل المسؤولية"، فيما قال عمر: "أعتقد عدم الاختيار المناسب وإن فى كتير مش بيفكروا فى كل خطوة قبل ما يخطوها، مع شوية مبادئ ملهاش علاقة بالمنطق والدين، ناس كتير مقتنعة بيها وبيمشوا على أساسها بعمى". ورأى بدوى: "المغالاة فى الطلبات المادية والمهور من الأهالى وأنهم فاكرين أن كتر الفلوس وقطم وسط الشاب ده اللى هيعزز بنتهم ويخليه صعب يطلقها بسبب المؤخر والنفقة والحاجات المترتبة على الطلاق، بتخليهم يقولوا الشاب هيفكر ألف مرة قبل ما يطلق، لكن لو استحلت العشرة هيطلق". ومن طرف السيدات والفتيات، رأت هبة إمام: "عدم المصداقية بين الطرفين، كل واحد فيهم بيحاول يظهر للتانى بأحسن صورة ويعدى اللى مينفعش يعديه عشان الجوازه تكمل، ولما تكمل يبان كل واحد على حقيقته وهما فى بيت واحد، فكل طرف يتهم التانى انه اتغير والحقيقة إنهم ظهروا لبعض اللى كانوا بيخفوه وده سبب الفشل"، فيما قالت روان المرادنى: "فشل الزواج فى مجتمعنا بسبب إن كل واحد بيرمى أخطاؤه على التانى، والطرفين شايفين إن التانى هو اللى بيغلط دايما وبس" وقالت فاطمة على: "الأنانية وحب الذات والتسلط،حب التملك والانفراد بالرأى، قلة الصبر، لا تغاضى ولا تسامح بين الطرفين وإساءة الظن ببعضهما، وجود أطراف خارجية فى المحيط الخارجى تغذى كل هذه السلبيات التى ذكرتها، حرية المرأة واستقلالها وأنها ممكن تعيش وتنجح من غير زوج"، بينما قالت فاتن: "كل واحد مترتبط بالتانى لهدف معين، البنت فكراه مصباح علاء الدين وإن الجواز ده فسح وسهر وكلام حلو بس، والولد فى باله إنه متجوز كوبى من ماما فى تلبية الطلبات، وعايز كوبى تانى من ياسمين صبرى، ليل ونهار لابسه شيك وحاطه ميكاب وبتدلعه، إنما الاستقرار ده مش فاهمينه".