قدم تليفزيون انفراد أقوى السهرات الغنائية، حيث استضاف خلالها المطرب الكبير على الحجار، والموسيقار هانى شنودة، والمطربة شاهيناز فى سهرات خاصة، احتفالا بالعام الميلادى الجديد، وذلك فى إطار الفقرات المنوعة التى يقدمها تليفزيون انفراد.
وقال المطرب الكبير على الحجار إن نصائح والده كانت أكبر داعم له خلال مسيرته الفنية، مضيفاً: "أنا أنتج شغلى بنفسى، وأنا مش من المطربين اللى بيعملوا حفلات كتيرة عند رجال الأعمال والأغنياء، دايماً أنتج شغلى بنفسى من خلال ما أحصل عليه من غناء تتر المسلسلات، أو أحد الحفلات خارج مصر، وأحرص على توفير الأموال لكى أستطيع إنتاج ألبوماتى، وهذا ما أقوم به منذ عام 1981، وحين أنتجت لى شركات الإنتاج ألبومات لم تحقق نجاحا مثل النجاح الذى تحققه الألبومات التى أنتجها".
وأضاف على الحجار، خلال لقائه تليفزيون انفراد احتفالات برأس السنة، أنه يستطلع آراء كل الأشخاص المقربين منه قبل إصدار أى ألبوم خاص به، لافتاً إلى أنه يحرص على الاستماع لرأى الفنان أحمد عبد العزيز فى الأغانى قبل إصداراها، قائلا: "حظى حلو فى أصحابى، فالملحن الكبير بليغ حمدى اكتشفنى ثم قدمنى للشاعر الغنائى عبد الرحيم منصور، ثم كتب لى الشاعر الكبير فؤاد حداد أغنيات فيلم المغنواتى، ثم عملت مع صلاح جاهين وغنيت الرباعيات، وعملت مع كل الشعراء والملحنين الكبار".
وأشار على الحجار إلى أنه عمل مع الملحن الكبير عمار الشريعى وقدمنا أغانى لأكثر من 100 مسلسل، قائلاً: "عملت أكثر من 100 أغنية مع عمار الشريعى من أغانى البداية والنهاية أغانى داخل المسلسلات، وقدمت أغانى أشهر المسلسلات الليل وآخره، والمال والبنون، وكناريا، ورسالة خاطرة، ثم عملت مع عمر خيرت".
فيما قالت هدى طلعت، زوجة المطرب الكبير على الحجار، إنها كانت إحدى المعجبات ومن جمهور على الحجار، مضيفة: "مكنتش أتصور إنى هتجوزه فى يوم من الأيام، البيت عندنا كله كان بيحب على الحجار كمطرب ونتابع أعماله، ومتخيلتش الصدف اللى جمعتنا وأنا محظوظة بيه".
وأضاف المطرب على الحجار، خلال لقائه تليفزيون انفراد احتفالات برأس السنة: "بقالنا 18 سنة متجوزين، وكل يوم حبنا بيزيد، وأولادنا سبب فى زيادة حالة الحب فى البيت، هدى مراتى عارفة كل تاريخى، وأنا باحكى كل حاجة عنها وعمرى ماخبيت عنها حاجة، الحقيقة كل المرات اللى اتجوزت فيها كان فى مشاكل، ولما اتعرفت عليها رحت لهم البيت فى المنصورة، وقلت لها حضروا المأذون، وكنت أول مرة أكون مرتاح وأنا باتجوز، وكل ما كنت ببص فى عينيها كنت بافرح أكتر".
وداعب المطرب على الحجار زوجته خلال اللقاء وغنى لها أغنية "انتى طلعتيلى منين ودخلتى حياتى إزاى.. فى عنيكى حنان وحنين وفى صوتك بحة ناى.. انتى طلعتيلى منين ودخلتى حياتى إزاى.. فى عنيكى حنان وحنين وفى صوتك بحة ناى.. طيبتك خلتنى صالحت الزمن الكداب النساى.. وفتحت بيبان للفرحة الجاية فى العمر الجاى.. طيبتك خلتنى صالحت الزمن الكداب النساى.. وفتحت بيبان للفرحة الجاية فى العمر الجاى.. وبحبـــــك.. بحبك.. بحبك بكل الحنان اللى فيكى.. واحبك بكل الجنون اللى فييا.. بحبك بكل الحنان اللى فيكى.. واحبك بكل الجنون اللى فيا.. وأحبك الرضا والسماحة فى عنيكى.. واحب ابتسامة شقيه خفيه.. وسلمت عمرى أمانة فى إيديكى".
وقالت هدى طلعت زوجة على الحجار: "زوجى طيب ومالوش طلبات، لكن أكتر حاجة بتضايقنى منه أثناء مناقشتنا سوا، بتلقيه اتكلم بسرعة علشان ينهى الحكاية بأى كلام، أنا بحب المنطق فى الحوار، إلا أنه بيقول كلام مش منطقى وبافهم أنه عايز يخلص الحوار".
فيما قال الفنان على الحجار رداً على سؤال المذيعة دينا شرف الدين خلال لقائها على تليفزيون انفراد، فى حلقة رأس السنة: "يومياً هى بتعمل حاجة بتضايقنى، هى بتعمل ست الناظرة، بس الحقيقة هى طول الوقت بتقدم نصايح لى".
وحكت زوجة المطرب الكبير على الحجار قصة "أغنية عارفة"، قائلة: "الأغنية دى ليا قصة معاها، أول ما تعرفنا أنا وعلى الحجار، بعت لى كوبيلة من الأغنية وتأكدت أنه بيحبنى بعدها".
وداعب المطرب على الحجار زوجته خلال اللقاء وغنى لها أغنية "عارفة" والتى كتبها بهاء جاهين وتوزيع عمر خيرت والتى كلماتها " عارفة.. مش عارف ليه.. متونس بيكى وكأنك من دمي.. على راحتى معاكى وكأنك أمي.. مش عارف ليه.. عارفة.. حاسس إنى لأول مرة بشوفك..وإنى بشوفك من أول لحظة ف عمري.. حاسس إنى يمامة بتشرب ف كفوفك.. وانك شجرة وضلة وميه بتجري.. عارفة.. فرحة كبيرة وصوت مزيكا ف قلبي.. وكأننا حبيبين اتقابلوا بعد فراق.. ليه فجأة بقيت مستنى لوحدي.. بدى اتكلم وأحكيلك واشكيلك همي.. عارفة.. ونا وياكى بحس بدنيا.. دنيا سلام وأمان.. وإن العالم مفيهوش ولا نقطة أحزان.. إيدك خليها ف إيدي.. انا طفل كبير.. وبحس إن أنا وانتى لوحدينا والكون بستان".
وأكدت زوجة على الحجار أن زوجها لم يحصل على مكانته التى يستحقها رغم أن هناك من هم أقل منه وحصلوا على ذلك، قائلة: "مغنى الأوبرا العالمى الشهير بلاسيدو دومنغو، اختار على الحجار للغناء سويا، وهو ما يؤكد على الموهبة الكبيرة لعلى الحجار، كما حصل على الحجار على جائزة السلطان قابوس والتى نافس فيها كل المطربين فى الوطن العربى".
وقالت هدى طلعت زوجة على الحجار فى حوارها مع المذيعة دينا شرف الدين خلال لقائها على تليفزيون انفراد، فى حلقة رأس السنة: "على الحجار من أقوى الأصوات فى العالم العربى، ولا يختلف أحد على ذلك، وأنا بقول للمسئولين عن صناعة الفن والحفلات فى مصر، لماذا لا يتم الاستعانة بالفنان على الحجار حتى يتم تقديم أعمال على مستوى رفيع".
فيما قال الفنان على الحجار: "أنا حصلت على جائزة السلطان قابوس بعد منافسة مع 27 مطربا على مستوى الدول العربية، بس حزين لأنه لم يتم تكريمى من بلدى، وباشكر الدكتورة إيناس عبد الدايم على تكريمها لى وإقامة حفلة لى فى دار الأوبرا، والحقيقة الفن مهم لأى دولة".
وكشف المطرب الكبير على الحجار أنه تلقى العديد من العروض الكبيرة للغناء خارج مصر، قائلاً: "اتعرض عليا عرض كبير جداً للغناء فى إسرائيل، تحت دعوى أنها فى فلسطين لإسعاد الشعب الفلسطينى، والحقيقة أننا لو رحنا فى ضابط فلسيطينى هيشوف الباسبور بتاعى، بعدها هيشوف ضابط إسرائيلى الباسبور بتاعى وهيوسخ الباسبور بتاعى، وأنا عمرى ماهقول للديب يا أعز حبيب، وأنا لو كنت بجامل كنت خدت فرص أكتر وفلوس أكتر بس أنا مش كدة".
وكشف الفنان على الحجار فى حواره مع المذيعة دينا شرف الدين خلال لقائها على تليفزيون انفراد، فى حلقة رأس السنة، أنه فى كثير من الأحيان يسجل آيات بصوته، ولكنها ليست للنشر العام؛ نظرًا لكونه ليس مقرئا بالأساس رغم امتلاكه إجازة من الأزهر".
وغنى الفنان على الحجار خلال اللقاء أغنية: "كل الجروح ليها دوى.. ياطير.. يا حايم.. فى الهوى.. اطوى الجناح على الجراح.. اطوى الجناح على الجراح.. وأضحـك...ويلااااا... نطير سوى.. أنا مش هبيع الصدق ب الأكاذيب.. ولا قولش للحمل الوديع... يا ديب.. ولا قولش للديب... يا أعز حبيب.. والصدق مهما... عزّ.. ف.. الازمه... مش... ههتز.. ساعات يكون كــــــــــتّم الأنين
أصــــــــــــدق.. ودى مســـــــــــألــــــــة مــــــــبـــــــــــــــــــــدأ".
ويحتفل تليفزيون انفراد، على مدار الأربعاء والخميس، برأس السنة، حيث يستضيف عددا من النجوم، فى سهرات خاصة، احتفالا بالعام الميلادى الجديد، وذلك فى إطار الفقرات المنوعة التى يقدمها للمشاهدين.
وبكى الفنان على الحجار خلال حواره مع الإعلامية دنيا شرف الدين على تليفزيون انفراد، حين تذكر فيلم الشيماء حين قالت سعاد محمد "كم ناشد المختار ربه"، حيث أنشد الحجار قائلاً: "كم ناشد المختار ربه، فى هدى إنسان أحبه، لكن وحى الله جاء، إنك لا تهدى الأحبة، والله يهدى من يشاء".
وكشف الفنان على الحجار، خلال اللقاء، أنه يجمعه علاقة كبيرة مع الفنان محمد منير حيث ظهر معاً فى أحد الحفلات وغنا كل منهم أغانى الأخر، قائلاً:" أنا ومحمد منير، ومحمد الحلو، كنا دفعة واحدة وأصدقاء من سنين، ودخلت أنا ومحمد منير الجيش سوا، ومحمد منير فى حتة لوحده ومحدش بيغنى زيه".
وأهدى الفنان على الحجار أغنيته الجديدة "طبطب بروحك" من كلمات طارق على وألحان، لتليفزيون انفراد، والتى ستصدر قريبا وكلماتها "طبطب بروحك على اللى حاسين بالقلق، وقول لهم فى رب فوق لما خلق.. خلق الدواء، قبل ما يخلق أى داء، وإن الوجع زاد فى إحساسنا أو كبر بيبقى رحمة".
كما احتفل تليفزيون انفراد على مدار الأربعاء واليوم الخميس، برأس السنة، حيث يستضيف عددا من النجوم، فى سهرات خاصة، احتفالا بالعام الميلادى الجديد، وذلك فى إطار الفقرات المنوعة التى يقدمها للمشاهدين.
وقالت المطربة شاهيناز، خلال حوارها مع تليفزيون انفراد، إن جائحة كورونا أثرت كثيراً على الوسط الفنى وعلى كل المجالات المختلفة، مضيفة: "الفنانون دائما تحت الضوء، وغيابهم يظهر عن أصحاب باقى المهن الأخرى، وأنا من عام 2008 خدت جنب شوية، حتى عدت للغناء فى 2014، وحسيت فى 2016 إنى مش قادرة أعيش بعيد عن الغناء، ورجعت لإصدار أغانى جديدة خلال الفترة الماضية".
وأضافت شاهيناز: "فى كتير من المطربين لم يبتعدوا عن الساحة الغنائية لكنهم لم يصدروا أغنيات مثل التى أصدرتها، أنا عملت 5 أغانى سنجل، وألبوم، و5 فيديو كليب، فى مطربين من 2007 لحد دلوقتى معلموش حاجة، والحقيقة أنا مقصرة فى الدعاية للأغنيات الخاصة بى ومفيش دلوقتى شركات إنتاج بتدعمنا فى الوقت الحالى، والملكية الفكرية ستحمى حقوقنا فى عدم سرقة الأغانى".
وغنت المطربة شاهيناز خلال اللقاء أغنية "حياتى أحلى"، وتقول كلماتها: "فى إيه بقا ماتبعد كده وبطل بقا عمايلك معايا.. قلبى أنا مش حمل ده لحسن أحبك فى النهاية.. ما تقولى عايز إيه غيرت حالى ليه.. وبعدين معاك أبعد عينيك عن قلبى وارحمنى وكفاية.. خليتنى أعيش احساسى بيك والقلب عجباه الحكاية.. عمال بيحكى عليك ويسيبنى ويروح ليك.. آخرة ده كله إيه.. حياتى أحلى ما تقولى عملتى إيه".
وقالت المطربة شاهيناز خلال حوارها مع تليفزيون انفراد، إن أغنيتها الشهيرة "قولى قولى" ليست سهلة على مستوى اللحن، وصعب غنائها رغم أن الكلمات سهلة لكنها كلحن صعب، مضيفة: "أنا مقصرة فى الدعاية على السوشيال ميديا، ولما بحس أنى فى نجاح زائف على السوشيال ميديا قررت أبعد، فى بدايتى كان عندى متابعين من جميع دول العالم العربى، وحققت نجاحات كبيرة فى الغناء، وأنا عمرى ما اشتريت فلورز ولا هشترى نجاح ولا هشترى لايكات، وأغنية قولى قولى ما زالت تحقق كبير فى العالم العربى، وأنا مش هقدر أجرى ورا السوشيال ميديا".
وغنت المطربة شاهيناز خلال اللقاء أغنية "أحب أعيش لك" والتى تقول كلماتها: "أحب أعيش لك عمرى كله من البداية.. من يوم ما شافك قلبى تايه مش معايا.. يا حبيبى ده إنت الحلم اللى ملوش نهاية
نظرة عيونك يا حبيبى دول كفاية.. أحب أعيش لك عمرى كله من البداية.. من يوم ما شافك قلبى تايه مش معايا.. يا حبيبى ده إنت الحلم اللى ملوش نهاية.. نظرة عيونك يا حبيبى دول كفاية".
وقالت شاهيناز إنها تجهز لأغانى جديدة ستصدرها الفترة المقبلة، مضيفة: "أنا فى الإجازة بسمع كل الناس، بأسمع أغانى تركى وهندى وخليجى ومهرجانات، وبحب مهرجان إخواتى جدا"، وغنت شاهيناز جزءا من مهرجان إخواتى، مؤكدة أنها تحب غناء أغانى المطربة الكبيرة وردة وصباح وفريد الأطرش.
وأضافت شاهيناز: "لازم الواحد يفضل متمسك بمبادئه مهما تغيرت الظروف، وفى الحقيقة مفيش إنسان مش بيغلط، أنا اتعرضت لإحباط بس مش بسمح إنه يتحول ليأس، وبقول لنفسى انتى عندك موهبة كبيرة من ربنا لازم تحافظ عليها"، مشيرة إلى أنها عملت فى إحدى المسرحيات ثم توفقت بسبب فيروس كورونا.
وغنت شاهيناز خلال اللقاء، أغنية الراحلة شريفة فاضل "لما راح الصبر منى"، وكلماتها: "لما راح الصبر منه.. جانا يسأل عن دوا.. قالى شوفى أحلى عمر .. أحلى عمر نكون سوا.. دبت غيرة وحيرة مرة وليلى أطول من سنه.. قالى مالك قلت بأحلم بس ليلة بالهنا.. آه بالفرحه يداوينى.. وآه بعيونى يغطينى .. وآه وبخاطره هايجينى.. وآه وبشوقه يهنينى.. وآه م الصبر وآه".
قال الموسيقار هانى شنودة: "قبل تلحين الأغنية أقوم بقراءتها مائة مرة قبل النوم، عندما أصحى أجدها سهلة فى التلحين لأن العقل الباطن يقوم بالعمل عليها أثناء النوم طوال الليل".
وأشار الموسيقار هانى شنودة، فى تصريحات لتليفزيون انفراد، إلى أن أغنية "وده مين وده مين الحاجة الحلوة دى جبهلنا" كتبها صلاح جاهين، ولا يوجد شىء كتبها إلا وتحمل رسالة وإن لم تكن واضحة فتكون خفية، لكنها تظل عالقة فى ذهن الأطفال، موضحا أن معنى هذه الأغنية هو "الشكر"، ورسالته للطفل فى هذه الأغنية هى أن يعرف الطفل أن وراء التورتة التى سيأكلها، فلاح قام بزارعة القمح ولبان وحلوانى.
وأكد الموسيقار هانى شنودة أن فى مهنته يبحث عن النجم، وليس الشخص الناجح، لأن الناجحين كُثر، ولكن النجم يوجد لمعة فى عينه يستطيع أن يعرفها، مشيرا إلى أن من يضع أمامه أكون أو لا أكون هو الشخص الذى يحب العمل معه، وتابع قائلا: "احنا معندناش نوت مؤدبة ونوت قليلة الأدب، وشيلوا المزيكا من المعادلة، وإنما مشكلتنا مع الكلمات زى هاتى بوسة يا بت".
وأضاف هانى شنودة أن النجومية شاهدها فى كل من عمرو دياب ومحمد منير وعمر فتحى وإيمان يونس ومنى عزيز وكل من قام بالعمل معهم.
وأشار الموسيقار هانى شنودة إلى أن فرقة المصريين هى التى غيرت شكل الأغنية فى مصر، مشيرا إلى أن تراثها موجود وكل فترة يتم اكتشاف أجزاء منها، مشيرا إلى أن آخر ألبوم للكينج محمد منير اختار أغنية منذ 40 سنة.
وتابع هانى شنودة: "مع الوقت سيتم إعادة توزيع الأغانى وهيتم اكتشاف أنه فى هذا الوقت كنا نمشى خطوة بخطوة مع كل دول العالم، مشيرا إلى أنه فى الوقت الحالى نشهد حالة تراجع لأننا نقوم بعمل اللى يعجب الناس وهذا بصراحة".
وأردف: "أغانى المهرجانات إيقاعات عجبت الناس، ومشكلتنا مع الكلام، ولو عملوا أغانى مهرجانات وطنية أو دينية، أو عاطفية، مش هيكون فى مشكلة معاهم، ولكن المشكلة مع الكلمات زى هاتى بوسة يا بت".