نرمين الفقي لـ منى الشاذلى: لما اختفيت محدش سأل عليا غير شيرين وحنان شوقى.. والدتى ضربتنى علقة عشان قصيت شعرى.. أول مرة أشوف والدى كان عندى 16 سنة.. فاضلى سنتين وأكمل 50 سنة ومحتاجة راجل يكون سند.. صو

حلت النجمة نرمين الفقي ضيفة على الإعلامية منى الشاذلى فى برنامج "معكم منى الشاذلى" المذاع على قناة Cbc، وتحدث خلال الحلقة عن علاقتها بوالدتها وأسباب عدم حديثها عن والدها من قبل، خاصة أن أول مرة تراه كانت فى عمر الـ16 عاما، كما تحدث عن أسباب اختفائها لفترة كبيرة عن التمثيل، وكشفت خلال اللقاء عن طفولتها وكيف نشأت وترعرت، كما تحدثت عن أسباب عدم زواجها حتى الآن ومواصفات الرجل التى تريد الزواج منه، وفى نهاية لقائها تحدثت عن أعمالها الجديدة التى ستعرض فى شهر رمضان المقبل. وكشفت نرمين الفقي فى أول اللقاء عن سبب غيابها لحقبة زمنية كبيرة، قائلة: "كنت في البيت كان وقت والدتى جالها سرطان، وأنا وحيدة وكمان جت فترة الثورة وانشغلت الفترة دى جامدة جدا حتى توفيت والدتى، وبعد كدة عملت مسلسل (جبل الحلال) وعملت مسلسل الإمام الغزالى مع محمد رياض وحاولت أبرز قدراتى من خلاله في اللغة العربية ولكنها صعبة جدا وكنت بعافر". وأضافت نرمين الفقي: "المشكلة اللى عرفتها لما كبرت إنه بمجرد ما اختفيت ملقتش حد حواليا وفضلت فترة بقول معقولة مفيش حد يتصل بيا أو يهتم بيا، وللصراحة مفيش غير حنان شوقى وشيرين فاجئونى باتصالاتهم بالرغم إننا مش أصحاب أوى وهما اللى زارونى أيام مرض والدتى، وعملوا معاها كذا فيديو وأنا بشكرهم جدا". وتابعت نرمين الفقي: "لما رجعت وقت مسلسل جبل الحلال قلت خلاص رجعت نرمين تانى وكان زمان بيقولوا إن الفنان اللى بيقعد بيكون مطلوب أكتر لقيت العكس بعد جبل الحلال والعروض اللى جت مكنتش لطيفة، لغاية لما جالى مسلسل أبو العروسة، وكان مخرج المسلسل فاكرنى هاعتذر عشان مش أنا اللى هاكون العروسة، ولكن انبسطت بيه جدا وحسيت إنه هايبقى حلو وفعلا ده اللى حصل وبقى تريند على طول". وتحدث عن طفولتها قائلة: "كنت شقية وأنا طفلة بشكل غير طبيعى وكنت عاملة زى الولاد، ووالدتى لما كانت بتيجى تاخدنى من المدرسة وتسأل عليا يقولولها فوق الشجرة بتحدف العيال بالطوب، ووالدتى كانت حريصة أتعلم الجمباز والرياضة من صغرى". وأضافت نرمين الفقي : "بدايتى في الإعلانات كنت بروح أنا وأصحابى في الإسكندرية وكان في مخرج إعلانات بيعمل إعلان هنلك فشافنى على البلاج وأنا بتفرج فقالى تعملى إعلان فقلتله أه أعمل وطلبنى أجى القاهرة بعد كدة، وكنت بسافر أنا ووالدتى بالسوبر جيت، وفاكرة أول إعلان عملته كان لأطقم أدوت مطبخ ودى كانت بدايتى مع الإعلانات". وعن علاقتها بأسرتها قالت: "والدى ووالدتى كانوا منفصلين من صغرى وعيشت مع والدتى أكتر، ودى حياة محدش يعرفها عنى، لأنى عيشت مع جدى وجدتى ووالدتى في الإسكندرية وكانوا هما وقتها اللى بيحتضنونى ولما بدأت أكبر ملقتش إن في أب فعرفت إنهم منفصلين ووالدى مسافر برة على طول ومش بييجى". وتابعت نرمين الفقي: "يمكن اللى خلى عندى نوع من التوازن لأن عيلة والدتى كان عندى منها بدل الأب 4، وزوج خالتى كان الخامس وعمرهم ما حسسونى بأى حاجة نقصانى وبيحاولوا يعوضونى ولكن طبعا مفيش حاجة زى الأب خاصة لو كان عايش". واستكملت نرمين الفقي: "فى مرحلة ما كان عندى 16 سنة كان بداية تعب والدتى وإصابتها بورم وكانت دى أول مرة أشوف والدى وقتها في المستشفى لما رجع مخصوص لما عرف إن والدتى تعبانة، وعشان كان لازم تسافر تعمل العملية كان لازم أروح أقعد في بيت عمتى ودى كانت أول مرة أشوف عيلة والدى، كنت وقتها في الثانوية العامة، وكنت متخوفة في الأول ولكن هي وزوجها مكنوش عارفين يعملوا إيه ولا إيه معايا، وكان في كمية من الحب والعطاء غير طبيعية". وأضافت نرمين الفقي : "طبعا كنت زعلانة بقالى فترة كبيرة، ولكن ربنا يديله الصحة دلوقتى فى آخر كام سنة بقى في شوية حب جوايا وجواه وقدر يقرب منى ويقربنى له، وأنا للأسف مليش إخوات". وتحدثت عن الارتباط في حياتها قائلة: "أنا فعليا بعمل كل حاجة لوحدى، وبقف مع العمال وبعمل كل حاجة، وحسيت بموضوع الارتباط ولازم حد يشيل عنى لما والدتى توفيت". وأضافت نرمين الفقي: "حسيت إن لازم يكون في ونس في الحياة، وإنى لو تعبت لازم يكون في حد جنبى، ولازم يكون رجل أتسند عليه مش ياخدنى إنى نرمين الفقي لأن لا شكل ولا جسد دايم، ولكن الروح والطبيعة هي اللى فاضلة بعد ربنا سبحانه وتعالى". وتابعت نرمين الفقي: "أنا طلعت في أسرة وكبرت نفسى واتربيت بثقافة معينة ومش هاتخلى عن ده وأكيد مش هاضحك عليكى وأقولك لو مستواه قليل هوافق، ولكن يبقى مناسب ومش لازم يكون ملياردير، لأنى مش هوافق عليه لو قلبى وعقلى مش عاوزينه". وعن مسلسل "الليل وآخره" قالت نرمين الفقي: "ده عمل هيفضل مدى الحياة ويكفينى شرف المشاركة فيه، لأن ده عمل مش هيتنسى أبدا، ويوم لما حصل فركش أنا كنت حاضنة المخرجة رباب حسين ومكنتش مصدقة إن خلاص فركش وفضلنا نعيط في حضن بعض، وكواليس العمل والقلب الحلو النضيف بيبان على الشاشة وعشان كدة المسلسل نجح". وتحدثت خلال الحلقة عن كواليس يومها قائلة: "أنا بيتوتية وبحب البيت جدا وبعشق الجيم ومدمنة رياضة، ولكن بسب فترة كورونا تخنت لإنى كنت 66 كيلو ودلوقتى بقى 72 كيلو وده مينفعش على طول 168 سم". وأضافت نرمين الفقي: "أنا عندى 48 سنة وفاضلى سنتين وأبقى 50 سنة وربنا يدينى الصحة وأكلمهم، وأنا مش بيفرق معايا الكلام ده والأهم إن ربنا يكرمنى ويكون شكلى لطيف قدام الناس، وأنا مش بعمل عمليات تجمل لأن أنا ممثلة مش طالعة موديل وهحتاج تعابير وشى ولازم أكون مقنعة". وتابعت نرمين الفقي : "أنا صريحة ولكن زمان كنت (مدب)، وحاليا أكثر هدوءا ولازم أفهم الأول وأستوعب عشان متحطش في مشاكل كتير، يمكن اللى خلانى كدة إنى كل مراحل حياتى مكنتش سهلة من الطفولة وحتى لما كبرت، المواقف قوتنى وخليتنى أفهم أكتر". وعن أعمالها الجديدة قالت نرمين الفقي: "أشارك في رمضان بمسلسل (ضل راجل) وبجد أنا تعبت أوى فيه بسبب كم الشجن والوجع والألم والطبيعية والتلقائية اللى مكتوب بيها السيناريو، وأنا كلمت المؤلف أحمد عبد الفتاح وقلتله بجد أنا تعبت وبقيت مرعوبة وحاسة إنى مش عارفة أعمل حاجة، بس هايكون دور مختلف تماما بجد والناس هتتفاجئ". وأضافت نرمين الفقي: "وكمان أشارك في مسلسل النمر ودى حاجة عمرى ما عملتها في حياتى، وبعمل دور شمس تاجرة من كبار تجار الصاغة وده امتحان صعب جدا ليا، وفى أول الاتفاق قعدنا أنا ومحمد إمام والمخرجة شيرين عادل والمؤلف محمد صلاح العزب، وكانوا متخوفين عشان أسلوب الكلام بتاع تجار الصاغة، لدرجة إنى لما عملت أول مشهد لقيت محمد إمام بيقولى إنتى حدوتة، وشيرين عادل كانت خايفة في الأول بس اطمئنت بعد أول مشهد". وتابعت الفنانة نرمين الفقى، دخلت مؤخرا عالم السوشيال ميديا وحسيت إن التواصل مع الناس حاجة لطيفة بس لازم يكون الواحد حذر جدا، لأن ممكن حد يقول كلمة مش كويسة"، وبسؤالها عن آخر رسالة تلقتها من معجب قالت نرمين الفقي: "تلقيت أغنية للمطربة نجاة الصغيرة، وهو إعجاب من طرف واحد ولكنه إنسان محترم جدا ورديت عليه شكرته". وبسؤالها عن آخر مرة بوظت الرجيم قالت نرمين الفقي: "علطول الرجيم بيبوظ، المساعدة بتاعتى بتجيبلى محشى كرنب ومكرونة بشاميل، وأنا مش بقدر أمنع نفسى بضعف جدا قدامهم". وبسؤالها عن أول وآخر عريس رفضتهما قالت نرمين الفقي : "أول عريس كان ابن الجيران ووالدتى رفضته عشان كنت لسه صغيرة، بس هو كان من عائلة محترمة في الإسكندرية، أما آخر عريس رفضته فبعتله ردى في رسالة وقلتله آسفة مش هاقدر أرتبط بيك، ورد قالى ميرسى على ذوقك وأخلاقك وخلاص".