طالبة ثانوية عامة تكتب: شكرا لوزير التربية والتعليم على المنظومة الفاشلة.. روبرتا رشال: إحنا مش لعبة فى إيدكم.. أهالينا ذنبهم إيه يعيشوا التعب أسبوع تانى.. ليه نوصل إن التعليم بقى كابوس وغير مرغوب فيه

تزامنا مع تصاعد أزمة إلغاء وتأجيل 4 امتحانات لطلاب الثانوية العامة، نتيجة كارثة تسريب عدد من الامتحانات، أرسلت القارئة روبرتا رشال طالبة الثانوية العامة، مقالا لـ "انفراد"، تبيدى فيه وجهة نظرها تجاه ما يحدث، خصوصا بعد تظاهر المئات من الطلاب أمام وزارة التربية والتعليم اليوم.

ورصد الطالبة روبرتا رشال، من وجهة نظرها، كطالبة فى الثانوية العامة، معاناة الطلاب وذويهم مع تأجيل وتسريب الامتحانات المستمر، وفيما يلى نص ما كتبته: يعنى إيه طلاب الثانوية العامة اللى بيحلموا بأخر يوم امتحانات، فجأة و بدون أى مقدمات يعرفوا إن فيه قرار بتأجيل الامتحانات " اسبوع كامل" و السبب ايه؟!.. وزاره فاشلة مش مسئولة..

طلاب الثانوية العامة مش لعبة! دول ضحايا، ضحايا لمنظومة فاشلة وطريقة تعليم متخلفة.

ونرجع نقول فى الآخر ليه البلد بايظة وليه الشباب بيهربوا، وليه عندنا دكاترة بيموتوا ناس فى إيديهم ومهندسين بيوقعوا عمارات!! حد دلوقتي فهم وعرف ليه كل ده؟؟ وزير التربية والتعليم عارف ليه ولا تحب نقولك؟؟ بلاش نكلم الوزير و نكلم " رئيس الجمهورية "حضرتك عارف ليه البلد مش بتتعدل وليه احنا اتأجلتنا الإمتحانات ؟ علشان فيه ناس قاعدة في اماكن اكبر منها و مش قادرين عليها! علشان ابسط حقوقنا مش عارفين نمتلكها..

وزارة التربية والتعليم هي الوزارة الوحيدة المحتاجة للتربية والتعليم احنا كطلاب ملناش ذنب في انهم فى الوزارة مش قادرين يتحكموا في فشلهم و يطلعوا ده علي الطلاب اهالينا ايه ذنبهم يعيشوا التعب ده اسبوع تاني بسبب فشلكم! ليه نوصل لمرحلة دعوة أب و أم بحرقة علشان شايفين عيالهم تعبانين ، ليه نوصل ان التعليم بقي كابوس و حاجة مش مرغوب فيها!! فيه كلام كتير بيكون قبله " ليه"؟؟ مين هيرد عليه ؟؟ خلينا متفقين ان محدش يقدر يرد عليه لأن السبب في كده مش فاهم اصلا السبب شكراً للوزارة على القرار الجديد الناتج عن فشلكم، واللى هيكون سبب فى تنسيق مش فى مصلحة أى طالب.

واخيراً شكراً للوزير على المنظومة الفاشلة، وشكراً للطلاب اللى تحملوا فوق طاقتهم من أول السنة علشان الناس الموجودة المسئولة مش بتقدر عقلية الجيل الطالع وبيستخفوا بتفكيرهم وكلامهم.