استقبلت الإعلامية منى الشاذلى الشاعر الغنائى أيمن بهجت قمر بأغنية وحياة قلبى وأفراحه بعد نجاحه بالسنة الأخيرة في كلية السياحة والفنادق .
وقدمت الإعلامية منى الشاذلى في حلقة برنامج معكم بلقاء قديم مع الشاعر أيمن بهجت قمر، وهو يقول إنه في السنة الأخيرة من سياحة وفنادق، منذ 16 سنة أو 17، وأنه يتمنى أن يتخرج ويحصل على الشهادة، كما تلقى البرنامج عدة مداخلات هاتفية من الفنانة شيرين والدكتور أشرف زكى نقيب الممثلين وأمير طعيمة وحازم إمام وابن أيمن بهجت قمر "بهجت" وعرضت فيديو لأدهم قمر.
باركت الفنانة شيرين عبد الوهاب لأيمن لحصوله على البكالوريوس، وقالت: أنا كلمت الدكتور أشرف زكى وقولتله أنا كمان عاوزة أكمل تعليمى، واحنا صغيرين كنا بنكره الصحيان بدرى وحاجة جميلة إننا نرجع نكما دراستنا في السن ده.
وأضافت خلال مداخلة ببرنامج معكم مع الإعلامية منى الشاذلى: دى خطوة جميلة من أيمن إنه يكمل تعليمه في السن ده، وانا اعرفه من سنين كثيرة ممكن 20 سنة، وأنا بحسه أيمن ده ضنايا وهو طفل كبير وبسيط جدا، وهادى وبيخلى باله من أصحابه وبيتابعهم ووقف معايا في أزمتى الأخيرة وبحب الجمهور كله وبحييه.
وتابعت: هنعمل فيلم كوميدى مع أيمن، احنا مرتبطين جدا ببعض ولازم كل يوم أتطمن عليه، ويتطمن عليا انا بفضل الهدوء والسكينة وابقى بعيدة عن الأضواء والسوشيال، وانا رفعت شعار لا حب مع الحياة ولا حياة مع الحب ولتسقط الرجالة، الحاجة الوحيدة اللى حبيتها واديتنى هي العمل، وليلة عاشوراء كانت ليلة كلها بركة والدعاء كان مستجاب ودعوات الناس وصلتلى ، نفسى أعيش في بيت فيه كل الناس اللى بحبهم كل أصحابى
وأكد أيمن بهجت قمر،أن شرين عاملة أغانى كثيرة ومركزة جدا الصيف ده، وهتعمل حاجة جديدة، وأوضح، أنه بعد حصوله على البكالوريوس شعر أنه يهديها لوالدي، مضيفا: "كنت في حوار مع سيد حجاب، قاللى أنت لو كتبت مش هتخلص تعليمك، ولكن أنا خلصت أهو صحيح بعد 33 سنة من الحوار".
وأضاف "كل سنة أنا بدفع المصاريف عادى، ومحافظ على إنى أبقى في الكلية، لكن في الأخر الحمد لله عملتها، وأنا كنت وعدت حمايا ونفذت الوعد، لكن بعد سنين، وأنا اتعملى لجنة لوحدى والمواد بتاعتى أنا اتلغت".
وتابع: "أنا قررت أخوض التجربة وأذاكر واجتهد، وعشت التجربة بكل حاجة فيها، وكان عندى مشروع التخرج، والشباب اللى معايا لما اتولدوا كان عندى 26 سنة، وأمى أكثر واحدة فرحت بنجاحى، وأمى زوج خالتها إسماعيل يسو، ووالدى طلب ايدها منه، ورفض قاله انت لسه مش جاهز دلوقتى، أمى حضرت الفن الحديث كله وعبد الحليم كان عندهم في البيت وتعايشت مع الوسط الفني من أحلى نافذة وقولتلها هعمل مسلسل وأسميه قصة حياة أمى".
وعلق الشاعر الغنائي، إن والده توفى، عندما كان في الصف الثالث الإعدادي ثم انتقل للعيش مع والجته لأنهما كانا منفصلين، مردفا: "والدى كان عايش حياة عزاب وحسن مصطفى قال لوالدى انت هتبوظ الواد لازم ينام بدرى ووالدتى كانت عاوزة بقى تربى وقررت إنى أرجع بيت والدى".
وأضاف: "والدتى كانت مأجرة البيت لشباب من المنصورة علشان تساعد في مصاريف البيت عاملينها مكتب استيراد وتصدير ورحت قولتلهم أن والدتى طردتنى من البيت وأنا مش لاقى مكان أبات فيه قالولى اتفضل اقعد معانا ولما سافروا غيرت الكالون وقولتلهم عندكم أمى روحوا اتصرفوا معاها".
وتابع: "والدى سابلى ميراث 7 آلاف جنيه وطبعا اتشالوا في البنك لأنى كنت لسه 16 سنة، والدى كان متفق مع شريهان على نسبة من إيرادات مسرحية وكان عندى 21 سنة وكلمونى علشان أعمل تنازل وقولتلهم كلموا خالى هو الوصى عليا وطلبت 50 ألف جنيه قالولى لأ 11 ألف بس كانت مسرحية شارع محمد على وبعدها طلبت 100 ألف جنيه وشريهان قالتلى أنا في ضهرك وأعطونى 90 ألف جنيه".
وذكرأيمن أن عمرو دياب حالة "تانية" في حياتى وعرفته لما كان بيعمل ضحك ولعب وجد وحب، وهو كان بيعرف أبويا وهو كان بيشجعنى دائما،وأضاف : بدأت محاولاتى مع عمرو دياب في 95، وبدأنا شغل مع بعض في 98، أنا بكتب الأغانى بتاع عمرو دياب على اللحن، عملنا أنا وعمرو دياب انتعاشة، وما كنتش اتخيل إنى أكتب أغنية باريس لعمرو دياب من 10 سنوات، لكن الصح أننا نتطور.
وتابع: ما كنتش اتخيل أن الناس هتعلق مع كلمة الطبطبة في أغنية حسين الجاسمى، لكن جت في وقت الناس محتاجة طبطبة، وعن فيلم أهل الكهف هو رواية توفيق الحكيم، وأنا عملتلها معالجة وكتبته السيناريو بالفصحة وغيرته بالعامية، وأنا بحب أغير، وما عنديش أي مشاكل رقابية خالص أنا اشتغلت مع إليسا وبهاء سلطان الصيف ده، وعمرى ما اشتغلت معاهم، وهينزل ألبوم إليسا اليومين دول وعاملين حاجة لدنيا سمير غانم، وهى من الناس اللى مركز معاهم الفترة القادمة ومسرحية دنيا هتتعرض خلال شهر لشهر ونصف مع بيومى فؤاد، وبباركلها على الفيلم الجديد.
وقال الدكتورأشرف زكى نقيب الممثلين، تعليقا على حصول أيمن على البكالوريوس: "أنا عرفت أن أيمن أخد البكالوريوس قولت إنى هقدم بلاغ كاذب وطبعا بهزر معاه هو يستاهل الدكتوراه، وكفاية أغنية سلم على الشهداء اللى معاك"، مضيفا: أيمن فنان ومؤلف وسيناريست وصديق جدع وراجل وخدوم، وحكى أنه بحث عن قبر والد أيمن بهجت قمر حتى وجدوه بالصدفة وليس عليه شاهد ونفتخر إن لدينا أيمن بهجت قمر لأنه يستحق اسم والده وأصبح امتدادا له.
وتابع أشرف زكى: أيمن بهجت قمر نقابة لوحده والموضوع ليس بالشهادات
فيما علق الشاعر الغنائى أمير طعيمة على حصول أيمن بهجت قمر على البكالوريوس، قائلا، اعرف أيمن من سنة 99، ولسه ما اتخرجش، وعادل إمام لما عمل الإفيه قال 14 سنة، والراجل وفى بوعده وأخد البكالوريوس.
وقال حسين سنجارى لاعب خفة اليد وزميل أيمن بهجت قمر بمشروع التخرج، خلال لقائه بالبرنامج، أنا أول مرة باتصل بأيمن رد عليا مدير مكتبه، قولتله مدير مكتبه أيه انت هتهزر معايا، قاللى لأ ، وقولتله مش طالب زينا، وسألته هو بيشتغل أيه، قاللى شاعر غنائى، قولتله ابنه، يعنى قاللى لأ هو أيمن بهجت قمر، قاللى يعنى اللى بيكتب لعمرو دياب، هو زميلنا؟ قاللى اه، وعلق أيمن بهجت قمر، قائلا أنا العقد اللى معاه أنى هطلعه في البرنامج، وهو كان طالب إنى أشيرله فيديوهات.
فيما علق حازم إمام، نجم نادى الزمالك السابق: " كنا نقعد أنه وأيمن في الحمام ونغنى وكنا شلة واحدة كلنا،"استغربت جدا أن أيمن أخد البكالوريوس دلوقتى ومبسوط أنه فكر ياخد البكالوريوس بعد ما بقى من أشهر المؤلفين في الوطن العربى، وما توقعتش إنه ياخد البكالوريوس واتفاجئت إنه بيقولى أول إمبارح، وهو قصة كفاح كبيرة جدا وهو نحت الصخر بجد من وهو عنده 15 سنة".
وتابع أيمن بهجت قمر: "حازم كان معايا في فصل واحد كان حازم ومحمد أبو شقة هما اللى ولاد ناس فى الشلة مش بيشربوا سجائر وعلى طول بنتجمع عند أيمن في البيت في الدقى وبنتفرج على ماتشات كثيرة جدا".