برنامج Sold Out Interviews يتصدر الأكثر مشاهدة على منصة watch it ..منى زكى: استفدت من مسلسل «تحت الوصاية» إنسانيا ومشتاقة لأيام التصوير رغم العذاب..المخرج أهم عنصر فى العمل وأحمد زكى وضعنى فى مكانة كب

استطاع برنامج Sold Out Interviews الذى يقدمه الإعلامى محمود سعد، عبر منصة watch it الإلكترونية، أن يتصدر قائمة أكثر البرامج مشاهدة، وذلك فور عرض حلقة النجمة منى زكى، التى تحدثت خلال اللقاء عن أبرز المحطات الفنية فى حياتها، فضلا عن كواليس أحدث أعمالها الدرامية مسلسل «تحت الوصاية»، الذى عرض فى السباق الرمضانى الماضى، وعن النجاح الكبير الذى حققه العمل، كما فاجأ البرنامج منى زكى بحضور نجوم المسلسل فى اللقاء، ومنهم مها نصار، الطفل عمر الشريف، أحمد عبد الحميد، خالد كمال، على صبحى. رحبت النجمة منى زكى بأبطال مسلسلها، إذ حرص عدد منهم على حضور التسجيل، ومنهم مها نصار، خالد كمال، عمر الشريف، على صبحى، أحمد عبدالحميد، وأعربت منى زكى عن سعادتها بحضورهم اللقاء، قائلة: «بشكركم على الحضور، وده شرف كبير ليا، هم مش فنانين عاديين، هم فنانين حتى النخاع وعمرهم ما خدوا حقهم»، وقامت بتقديم كل واحد منهم. ومن جانبه، قال الفنان على صبحى الذى جسد دور «عيد» خلال أحداث مسلسل «تحت الوصاية»: «الفن نجانى، لأنى اتولدت واتربيت فى مناطق شعبية وعنيفة شوية، وأنا طول عمرى مش بحب العنف، فكانت الفرصة اللى عرفتنى على المسرح وده العلاج بتاعى، كنت بهرب بيه من العنف اللى فى الشارع»، متابعا: «ودلوقتى شغال مهرج شارع للأطفال فى المناطق الفقيرة، لأنى بحس إن وجودى فى الشارع ممكن يخلى حد يتم إنقاذه ويشوف طريق تانى أحسن». تحدثت النجمة منى زكى عن أسس اختيارها لأدوارها وأعمالها الفنية، مشيرة إلى أن الأهم فى كل ذلك المخرج لأنه أساس أى نجاح فنى. وقالت منى زكى عن اختيارها لأدوارها: «بقرأ روايات ساعات بس بحسها غير قابلة للتنفيذ بسبب الصعوبة الإنتاجية، فلما بيجيلى شغل بقرأه كويس وأبدأ أقارن»، لافتة: «حاجة مهمة جدا بالنسبالى هو المخرج لأنه أساس كل نجاح، لو المخرج معاه ورق حلو وهو مش شاطر، مش هيطلعه أحسن حاجة، فلازم أبقى مقتنعة بيه ومنجذبة لمواهبته، لأنى برمى كل ثقتى عليه، ومش ببص على نفسى بعد المشهد». وأوضحت منى زكى خلال اللقاء: «كنت خائفة فى البداية، قبل التصوير لأنه لم يكن لدى وقت كبير للتحضير للشخصية، كنت شاكة فى نفسى جدا وأنا داخلة المسلسل، وكنت مشدودة». وعن تدخلها فى اختيار الفنانين المشاركين فى العمل، أوضحت: «اتناقشنا أنا والمخرج محمد شاكر خضير، ومقتنعة جدا باختياراته، ولكن مكنتش اتعاملت معاهم ولا مرة على المستوى الإنسانى حتى»، مضيفة: «ولكنى دخلت العالم الحالم الساحر بتاع محمد شاكر خضير، وتوهت فيه وتوهت مع الناس دى بشخصياتهم وأحساسيهم وازاى حاضرين أوى، وإحساسهم جديد، مش حاجة متخزنة شوفتها قبل كده، كل ده اللى دخلنى فى المود». كما أعربت عن اشتياقها إلى أيام التصوير، قائلة: «ورغم العذاب اللى شوفناه، إلا إنى وحشنى الأيام دى، العيشة البسيطة الحلوة، اللى كان فيها استكشاف على المستوى الإنسانى قبل الفنى». وعن تفاصيل شخصية «حنان» التى جسدتها خلال العمل، وطريقة مشيها وتحركها، أوضحت: «بعد ما أخدت الملخص من المخرج محمد شاكر خضير، أو رؤيته فى الدور، وبعد ما قرأت، بيبقى معايا مدرب التمثيل، بيساعد إنك تمرن نفسك كممثل وتستخدم أدواتك وتستحضر إحساس، أو ترتجل، وعملت معاه معايشة ومن وهى صغيرة لحد ما بتكبر بكل تفاصيلها وعلاقتها وأحاسيسها». كما ذكرت: «أول صورة شوفتها لحنان لما كبرت إنها بتمشى بالطريقة دى، لأنها شالت عيالها غلط وبتعمل حاجات البيت غلط، والظروف حطتها إنها لازم تبقى قوية وتخوض فى أى مشكلة، عشان دى الحاجة اللى تخليها تعيش هى وولادها، واستحضرت ماشية ناس شوفتها قبل كدا وكنت مخزناها». وأكملت منى زكى: «نعمة كبيرة من ربنا إنى أشتغل الحاجة اللى بحبها، لإن فى هناك ناس كتير بتفضل وقت طويل عشان تعرف هى عايزة إيه، ولكن ده ميمنعش إن فيه ضغوطات فى الحياة، فكلنا عندنا ضغوطات ومشاكل بس بنسب مختلفة». وتابعت: «مينفعش تظهر مضغوط طول الوقت، لأن فى التصوير لازم تبقى حالة تانية بعيدة عن مشاكلك»، الفنان من الممكن أن ينزل إلى التصوير على الرغم من معاناته من حالة وفاة أو مشكلة كبيرة دون أن يظهر ذلك، موضحة: «احنا أحيانا بيبقى عندنا حالات وفاة وبننزل نشتغل، والمفروض منبينش ده للناس، مش مجرد شوية مشاكل أو ضغط، ومش بنعمل كده عشان نمثل عليهم، ولكن شغلتنا لازم إنك تتغاضى عن نفسك، وتدخل عوالم الشخصيات اللى بتمثلها، اللى عايشها بشكل تانى وبمشاعر مختلفة». وعلقت النجمة منى زكى على الانتقادات التى واجهها البوستر التشويقى لمسلسل «تحت الوصاية» قبل النجاح الكبير الذى يحققه العمل لاحقا، قائلة: «أنا مبشوفش أى ست قبيحة، كل ست عندها جمال مختلف ومميز». وأشارت خلال لقائها فى برنامج sold out مع الإعلامى محمود سعد، المذاع عبر منصة watch it ، إلى أنه أهم مميزاتها فى الحياة أنها واقعية، موضحة: «أنا واقعية على الأرض ولامسة الواقع على الرغم من الخيال اللى موجود فى شغلنا، وده ضرورى عشان أكون متوقعة أى حاجة تحصل أو تتغير». وعن علاقتها بالفنان الراحل أحمد زكى، أوضحت: «أستاذ كبير ده الأسطورة اللى بنتعلم منه، هو النجم اللى فاهم أهمية الفن، بيرمى نفسه فى الفن، وبيعتبره كل حاجة عنده وأهم حاجة، واتعلمت منه حاجات كتيرة». وتابعت: «أما كنت بروح أمثل معاه كنت بشوف شخص جديد، كان بيعمل الشخصيات من روحه، الله يرحمه الأستاذ حطنى فى مكانة كانت أكبر منى ومن موهبتى». مسلسل «تحت الوصاية» عرض على شاشة قناة dmc و dmc دراما ومنصة watch it فى رمضان الماضى، وهو من تأليف خالد وشيرين دياب، وإخراج محمد شاكر خضير وإنتاج ميديا هب سعدى- جوهر، بطولة منى زكى، دياب، أحمد خالد صالح، نهى عابدين، رشدى الشامى، مها نصار، على الطيب، أحمد عبدالحميد، محمد السويسرى، وعدد آخر من الفنانين.