ينشر "انفراد" تفاصيل 4 ساعات تحقيقات مع موظفتين بمعمل أسنان، على خلفية اتهامهما بسرقة حوالي 3 مليون جنيه أموال ومشغولات ذهبية من داخل فيلا ربة منزل تركية الجنسية بالقاهرة الجديدة.
وروت فاطمة وحيد السعيد يوسف، 26 سنة، موظفة بمعمل أسنان زوج المجني عليها، تفاصيل الواقعة خلال تحقيقات النيابة، حيث أكدت أنها تقدمت للعمل بمعمل أسنان ملك زوج المجني عليها وهو الدكتور كاظم احمد كورناز 47 "تركي الجنسية"، منذ فترة ليست بالقصيرة، وبالفعل وافق مالك المعمل على عملى وأخرى بالمعمل، وكان يعاملنا معاملة الأبناء ولم يتوانى لحظة فى مساعدتنا والوقوف بجانبنا .
وأضافت "فاطمة": "الدكتور كان بيثق فينا جداَ لدرجة إنه كان بيخلينا نتواصل مع زوجته وفى بعض الأحيان، كنا بنروح نقعد معاها ونسليها فى الفيلا اللى مقيمين فيها بمجموعة 9 مدينتي، لكن مع الظروف الإجتماعية الصعبة اللى كنت أنا وزميلتى اية بدر الدين محمد، بنمر بيها الشيطان لعب بينا أكتر من مرة عشان نسرقها، لكن ديما كنا بنقدر نسيطر على رغبتنا دى" .
وتابعت المتهمة: "ومع اقتراب عيد الأضحى والطلبات الكتير اللى اهلنا بيطلبوها مننا، قررت أنا وزميلتى ننفذ الفكرة الشيطانية دى، وبالفعل وأنا شغاله فى المعمل، والدكتور معلق بليزر البدلة دخلت من غير ما ياخد باله وخدت مفتاح الفيلا من ميدالية مفاتيحه الخاصة واصطنعت منه نسخة وخططت بالاشتراك مع زميلتى علي سرقة الخزينة" .
واستطردت: "واستغلينا سفرهم كام يوم للمصيف، ودخلنا الفيلا عن طريق المفتاح النسخة المقلدة، وطلعنا الى غرفة نوم السيدة زوجة صاحب المعمل، وقمنا كسرنا باب الغرفة الالوميتال، واستولينا على الخزنة اللى كانت صغيرة الحجم بداخلها 145 ألف جنية، 141 ألف دولار، وكمية من المشغولات الذهبية وزنها حوالي كيلو جرام، ومستندات خاصة من داخل الفيلا " .
وأكدت: "بعد كل ده قمنا بكسر باب الحديقة عشان نوهم الدكتور وزوجته والشرطة بأن أسلوب الدخول عن طريق باب الحديقة مش من باب الغرفة علشان يوصلهم إنها واقعة سرقة عادية ونبعد عننا الشبهه وده كل اللى حصل، واحنا مكناش نتصور إن ممكن يجى اليوم اللى نخون فيه ولى نعمتنا وزوجته".
من جانبها، أمرت النيابة العامة، بإشراف المستشار محمد عبد الشافى، المحامى العام الأول لنيابات شرق القاهرة الكلية، بحبس موظفتين بمعمل أسنان، 4 أيام على ذمة التحقيقات، على خلفية اتهامهما سرقة حوالي 3 مليون جنيه أموال ومشغولات ذهبية من داخل فيلا ربة منزل تركية الجنسية بالتجمع .
كما أمرت بتحريات الأجهزة الأمنية التكميلية، وكشفت التحريات الأولية، فضلاَ عن رد المبالغ والمشغولات الذهبية الى المجنى عليها .