بالصور.. بعد الحكم بسجنه 60 عاما.. ضحايا مستريح السيارات بدمياط يروون تفاصيل هروبه بـ70 مليون جنيه.. صبرى: "استولى على 40 ألف جنيه تحويشة العمر".. وفكرى: "الشركة عاوزة تاخد ثمن العربية تانى"

شهدت محافظة دمياط خلال الفترة الأخيرة، ظهور عدد ممن أطلق عليهم لقب "المستريح" قاموا بالنصب على عشرات المواطنين، واستولوا منهم على ملايين الجنيهات عقب إيهامهم بتشغيلها واستثمارها فى مجال العقارات والأراضى وتجارة الأدوات المنزلية لينطبق عليهم المثل القائل "طول ما الطماع عايش النصاب بخير"، ولكن يختلف الوضع فى هذه القضية، فالطماع صاحب معرض حسن السمعة والأعلى مبيعا للسيارات فى محافظات شمال الدلتا، طبقا لشهادة أحد البنوك العاملة فى هذا المجال، والذى أكد أن معرض السيارات قام ببيع 1000 سيارة العام المنتهى، أما الضحايا فهم 218 شخصا سمعوا عن عروض لبيع السيارات بأسعار مخفضة وتسهيلات كبيرة فلجأوا إليه طمعا فى خصم بسيط لا أكثر فخسائرهم كانت بمثابة مقدمات وعربون ومنهم من دفع ثمن السيارة كاملاً لصاحب معرض استسهل طريق النصب للربح السريع. صبرى إبراهيم: "إحنا ناس غلابة وربنا وحده عالم إحنا جبنا الفلوس دى إزاى" قال صبرى إبراهيم صلاح من محافظة الدقهلية: تعرضت للنصب على يد محمد السقا صاحب معرض السقا للسيارات بدمياط الجديدة، وتابع المشكلة بدأت عندما قال لى صديقى بأن هناك معرض سيارات عامل عروض كويسة وتخفيضات، وعلى الفور اتصلت بالمعرض تليفونيا فقالى ممكن تيجى الصبح تشوف العروض وتختار عربيتك وتشوف الأسعار. وأضاف: "بالفعل روحت المعرض وقعدت معاه واخترت العربية إللى أنا عاوزها وقالى المقدم كذا بس لازم أدفع نصف ثمن العربية علشان أثبت لك سعر العربية ومتزيدش بعد كده علشان لما تيجى تستلمها مقولكش إن فى زيادة بسبب ارتفاعات الدولار وده كان بداية النصب". وقال صبرى تعرضت لعملية نصب بقيمة 40 ألف جنيه على يد السقا صاحب المعرض ومحمد العشرى وإسلام الحناوى وخاصة عندما طلب منى الحضور فدفعت الفلوس وخدت إيصالا "سند قبض" وقالى هتستلم عربيتك يوم 23 أغسطس، ودفعت الفلوس يوم 8 أغسطس وهو هرب يوم 9 أغسطس. وتابع: "أثناء قيام دفعى مقدم السيارة دخلت المعرض فوجدت عربيات كتير مرصوصة يمين وشمال وناس كتير بتختار مخطرش فى بالى أن ممكن تحصل عملية نصب واعتقد أن ده كان مخطط له". وأكمل صبرى: "ذهبت لتحرير محضر بقسم شرطة دمياط الجديدة فقالوا لى لأ أنت لازم تروح تعمل محضر مباحث الأموال العامة بمديرية أمن دمياط"، مضيفا: "نحن بقالنا شهرين من يوم واقعة النصب مفيش ولا حد من التلاتة اتقبض عليه رغم أن محمد العشرى وإسلام الحناوى موجودين فى مصر وفاتحين تليفوناتهم والواتس آب متسائلا إزاى لحد النهاردة ناس سرقت ملايين وخدوا أحكام بالحبس 60 عاما ودفع". وتابع: "عملنا وقفات احتجاجية أمام مديرية الأمن وأمام المحكمة وحددنا أماكن تواجدهم للشرطة ومعايا تسجيلات لمحمد العشرى وهو بيقول كل حاجة، متسائلا إزاى مباحث الأموال العامة تخاطب مصلحة الجوازات علشان نعرف الراجل ده جوه البلد ولا هرب برة وميجيش رد"، متسائلا: "عاوزين نعرف ليه متقبضش عليه لو السقا مسنود أو ابن مسئول كبير نعرف لو الحكومة بتسانده نعرف علشان نستعوض ربنا فى الفلوس ونرتاح بدل ما كل مرة نروح مديرية الأمن يثبتونا بالكلام ويشربونا شاى بالياسمين ومفيش أى حاجة بتتعمل". وناشد صبرى وزير الداخلية بالتدخل لمساعدتهم لاستعادة فلوسنا قائلا: والله العظيم تلاتة إحنا ناس غلابة وربنا وحده أعلم إحنا جيبنا الفلوس دى إزاى اللى تعب بيها واللى باع دهب مراته واللى عمل جمعية، واللى جاب قرض من البنك، واللى استلف فلوس علشان يجيب عربية يسترزق منه فلوس حلال بتطلع عاوزين نشتغل بدل ما نبقى عبء على الحكومة. فكرى هلال أحد الضحايا: استدرجنى فى عملية النصب من خلال الإنترنت من جانبه، قال فكرى فكرى هلال من مركز الزرقا بمحافظة دمياط، بدأت عملية النصب عليه عندما رأى إعلان على الإنترنت أن فى عرض عند معرض سيارات السقا والامتيازات أيه حاجات بسيطة متفرقش كتير عن السوق وده يدوب خصم 5 آلاف جنيه بس قالوا إنه هيخلص ورق العربية ويسلمنى يوم 11 أغسطس. وقال: "اشتريت عربية منه وقالى جهز الفلوس ولو أنت عاوزها كاش هتاخد العربية بالمفتاح وأنت واقف وفى عرف العربية بستلمها وبعد شهر باستلم أوراقها وأنا معايا عقد العربية ومستندات إنها خالصة الثمن، ولكن عندما سمعت عن هروبه جيت شوفت وحررت محضر مع الناس"، مضيفا: "اضطررت للذهاب للشركة الأصلية للسيارة بالقاهرة وروحت بعقد العربية وأن أوراقها خالصة فقالولى ماشى وبعد كده بعتولى مندوب من الشركة قابلته فى أحد معارض السيارات بمدينة دمياط وفوجئت بيه بيقولى ادفع 72 ألف جنيه تانى وأنا أسلمك العربية". وتساءل فكرى: "معقول أنا هدفع حق العربية مرتين وربنا أعلم أنا أتصرفت فى فلوسها إزاى وتابع أنا حاسس أن الشركة دى ساعدت السقا على النصب ومتأكد بنسبة 90% أنها خدت من السقا فلوس العربية وجايين دلوقتى ينصبوا عليه مرة تانية يعنى أدفع 80 ألف جنيه حق العربية وأرجع أدفع 72 ألف جنيه علشان أستلم ورقها". وناشد فكرى الحكومة قائلا: أنا دلوقتى العربية معايا ومش عارف أرخصها لأنى جايب العربية دى للمحل مش جايبها أتفسح بيها وعاوز أى طريق أرخص بيها العربية. وكشف فكرى فى أكتر من حاله زى حالتى ولازم يكون فى حل ياترخصوا عربيتى ياتخدوا العربية وترجعولى فلوسى أنا دلوقتى ظروفى الله اعلم بيها وكده الحكومة بتحكم علينا بالإعدام، إزاى يتنصب علينا من واحد محقق أعلى نسبة مبيعات فى السنين اللى فاتت وبينزل له إعلانات فى التليفزيون". وتابع: "أناشد وزير الداخلية بالتدخل للقبض على السقا علشان نحل مشكلتنا ولازم يتقبض عليه هو وموظفينه لأنه خد أحكام بالحبس". السيد سعيد: "لو الحكومة مش هتقدر تجيب حقنا تسمح لنا ناخد حقنا بإيدينا" قال السيد سعيد من محافظة الدقهلية: "اتفرجت على العربيات هنا فى دمياط الجديدة بمعرض السقا لقيت العرض مغرى وكويس وقالولى عندنا عرض ليوم 28 أغسطس، المهم دفعت 60 ألف جنيه قالولى إحنا بنتعاقد معاك بسعر اليوم ولما تدفع نصف ثمن العربية مش هنطالبك بأى زيادة لما تيحى تستلم السيارة بعد أسبوعين، ويدوب مر أسبوع وسمعت كلام بيتقال أن حصل عملية نصب من صاحب المعرض، وبالفعل جيت أمام المعرض لقيته متكسر وموضوع عليه حراسة من قسم شرطة دمياط الجديدة وقالولى روح اعمل محضر فى القسم وبالفعل عملت محضر"، "روحت مديرية الأمن أكتر من مرة ومفيش فايدة كل مرة يقولوا بكرة بعده، ولكن بصراحة إحنا مش شايفين اهتمام من حد هنا فى محافظة دمياط علشان يجيب حقوقنا". وقال السيد: إن القاضى لم ينظر الجلسة علنية بل كانت سرية المحامين، دخلوا غرفة وأصدر حكمه غيابيا على المتغيبين، بينما إحنا عاملين إدعاء بالحق المدنى. وطالب السيد وزير الداخلية "بالتدخل بدل ما ناخد حقنا بأيدينا وإحنا عاوزين حقنا بالقانون عاوزين حكم بحق ربنا علشان نقدر ناخد حقوقنا، وإذا كانت الجهات المعنية مش هتقدر تجيب لنا حقنا يسمحولنا ناخد حقنا بأيدينا". أحد الضحايا: "لو الحكومة مش حقنا هنسرق وهنبقى إرهابيين" ويضيف سالم السيد سالم من محافظة الدقهلية أحد ضحايا السقا: "أنا جيت لمعرض السيارات بناءً على إعلانات شوفتها على الإنترنت، وتعرفت على العرض ووجدته مناسب بالنسبة لى، واخترت السيارة اللى أنا عاوزها وجيت دفعت 60 ألف جنيه وكان ميعادى استلم يوم 22 أغسطس، وفوجئت الناس بتقول إن السقا نصب علينا وهرب بره". وناشد سالم جميع الجهات الأمنية قائلا: "أنا راجل على الله وبشتغل بأيدى وتم النصب عليا وبطالب بحقى ومش عاوز أكتر من حقى، ولكن الجهات الأمنية نايمة ووكيل النيابة قالى هجيب لكم حقوقنا ومديرية أمن دمياط"، مطالبا وزير الداخلية بالتدخل لحل الأزمة. وأضاف: إحنا مش لاقيين حد يجيب لنا حقنا ومالناش إلا ربنا والحكومة، وأنا بناشد الحكومة تجيب لنا حقنا يا إما غصب عننا هنطلع نسرق ونعمل مشاكل ونبقى إرهابيين". أحد الضحايا: "دفعت 200 ألف جنيه لحجز سيارتين" طالب على البسطويسى أحد الضحايا ومقيم بمدينة دمياط الجديدة رجال المباحث، بسرعة ضبط المتهمين وعرضهم للمحاكمة العاجلة وتابع دفعت 200 ألف جنيه نظير حجز سيارتين واحدة شيفروليه والثانية هيونداى. وقال البسطويسى تقدمت لشراء السيارتين بناء على الإعلانات المنشورة، وسددت المبلغ بمعرضه بشارع 100 بدمياط الجديدة، وتسلمت إيصالين سند قبض موقع عليه من العاملين بالمكتب وهم "إسلام الحناوى" و"محمد العشرى"، وفوجئت بنبأ هروبه من الإنترنت مثلى مثل بقية الضحايا. محامى الضحايا: أطالب بمليون و500 ألف جنيه لـ15 موكلا قال أحمد سعد محامى ضحايا المستريح بمدينة دمياط الجديدة، الذى تحصل على الأموال الضحايا وفر هاربًا، إنه عندما علم بعملية النصب وجد مجموعة من الضحايا، يحاولون البحث عن طريق للحل والوصول إلى النصاب، فقام بعرض الأمر وأن يتم تحرير محضر بمباحث الأموال العامة بمديرية أمن دمياط. وأضاف سعد أنه تم الالتقاء بالضحايا والذهاب إلى مباحث الأموال العامة بدمياط، لتحرير المحضر اللازم بالواقعة وإثبات واقعة النصب على المواطنين، بالمبالغ المالية التى تمت، حتى يتم السيطرة على الأمر وتتمكن قوات الأمن من منع المتهم من السفر بالأموال خارج البلاد. وأوضح سعد أن إجمالى عدد الموكلين 15 موكلاً، بإجمالى مبالغ وصلت إلى مليون و500 ألف جنيه، مطالبًا الجهات القانونية بضرورة أن يتم متابعة الأمر وسرعة التدخل لحل الأمر والقبض على المتهم واستعادة المبالغ المالية. وأشار سعد إلى أنه أقام 15 إعلان بالدعوى المدنية أمام جنح دمياط الجديدة ضد كل من محمد السقا ومحمد العشرى وإسلام الحناوى وبالفعل حددت محكمة كفر سعد الجزئية دائرة جنح دمياط الجديدة يوم 27 أكتوبر الجارى للمتهم لتواجهه باتهامات النيابة العامة وإلزامه بدفع 10 آلاف جنيه على سبيل التعويض المؤقت. جهود مديرية أمن دمياط وتواصل أجهزة البحث الجنائى بمديرية أمن دمياط، جهودها لضبط صاحب المعرض الذى فر هاربا من دمياط الجديدة بعد استيلائه على مبالغ مالية من أكثر من 218 شخصا من أبناء دمياط والمحافظات المجاورة، نظير حجز سيارات ماركة حديثة من خلال محل بيع سيارات خاص به بمدينة دمياط الجديدة، وتقدر قيمة المبالغ التى أمكن حصرها بصورة مؤقتة، بناء على البلاغات الواردة 60 مليون جنيه. كان المتهم الهارب سبق وأن أعلن عن عرض بيع السيارات بالتقسيط المريح وسهولة الإجراءات بمقدم 30 ألف جنيه وأول قسط بعد 3 أشهر، والاستلام بالبطاقة، وترخيص السنة الأولى مجانا، وهدية عبارة عن شاشةLCDأو لاب توب لجذب الزبائن، توافد عليه مئات الراغبين فى شراء السيارات من دمياط والمحافظات الأخرى. رئيس مباحث الأموال العامة للنيابة العامة: "الواقعة صحيحة" أكد الرائد محمد أنيس السعدنى رئيس مباحث الأموال العمة بمديرية أمن دمياط، صحة واقعة النصب، التى قام بها محمد السقا واستيلائه على مقدمات شراء سيارات من 218 شخصا قاموا فعلاً بحجز سياراتهم مقابل إيصالات سند قبض. وأوضح السعدنى أن التحريات أكدت وجود 5 أشخاص أساسيين بالشركة وهم: محمد السقا ومحمد العشرى وإسلام الحناوى ووائل عبد القادر وعثمان السقا. وذكر السعدنى 218 ضحية تم فعلا النصب عليهم، ويمتلكون إيصالات سند قبض موقعه من مساعدى السقا وهم إسلام الحناوى ومحمد العشرى وممهورة بخاتم الشركة. وأكد السعدنى فى أقواله أمام النيابة، أنه خاطب مصلحة الجوازات لبيان مغادرة المتهم إلى خارج البلاد من عدمه. حبس المستريح 60 عاما أصدرت محكمة جنح دمياط الجديدة برئاسة المستشار محمود صالح رئيس المحكمة، أحكاماً غيابية بالحبس 60 عاما على "مستريح السيارات" بدمياط الجديدة، واثنين من مديرى المبيعات بشركته. صدر الحكم بالحبس فى 60 قضية، والتى لم يحضر مقيمو الدعوات الجلسات، بينما تنظر المحكمة 140 قضية أخرى ادعى مقيموها مدنيا على المتهمين "م- ع- السقا" صاحب معرض سيارات و" م- العشرى" و"ا- الحناوى" مديرى مبيعات بالشركة وطالبوا باستعادة أموالهم والحصول على تعويض مادى. وكان حوالى 200 شخص قد تقدموا ببلاغات ضد صاحب معرض سيارات واثنين من مديرى المبيعات بالشركة، اتهموهم فيها بالاستيلاء على مبالغ كبيرة ثمن حجز سيارات جديدة من الشركة والهروب خارج البلاد، حيث بلغت حجم الأموال التى حصل عليها صاحب معرض السيارات 70 مليون جنيه.