"السد العالى" يواجه المغرب بـ"دعوة الأم".. بالفيديو والصور: والدة عصام الحضرى: منه لله جوزيه.. ابنى محافظ على نفسه وهيفضل يلعب طول ما فيه نفس.. نفسى يختم حياته فى الأهلى.. وهنكسب الليلة وهناخد الكاس

قالت الحاجة فتحية، والدة عصام الحضرى، حارس مرمى منتخب مصر، إن من عادة ابنها الحديث معها تليفونيًّا قبل كل مباراة بساعة، إذ يطلب منها الدعاء له ولزملائه، قائلة: "بدعى له من قلبى ربنا يوفقه هو وزملائه، وبقول ربنا يحبب فيك خلقه، حتى الحصى اللى بتمشى عليه". وتضيف والدة عصام الحضرى فى "حوار مع انفراد"، قائلة: "بحب الأهلى وبشجعه، وكان نفسى عصام يختم حياته فى الأهلى، ومنه لله مانويل جوزيه كان سبب اشتعال الأزمة بين عصام والأهلى وجماهيره، عصام قال لى أنا هفضل ألعب كورة طول ما فيا نفس، ولحد ما أسلم حراسة المرمى لياسين ابنى"، وإلى نص الحوار... - الكابتن عصام الحضرى كان يحب الكرة أكثر أم المدرسة؟ الكرة هى حياته منذ صغره، هى أكله وشربه، بيحبها أكتر من أى حاجة، وده من أيام ما كان بيلعب فى دمياط، مشكلتنا أنا ووالده معاه كانت علشان الدراسة. - هل تذكرين حفل زفاف عصام فى رأس البر؟ ومن من النجوم حضروه؟ طبعًا لسه فاكراه، هى دى حاجة تتنسى، وكان من الموجودين الكابتن أحمد شوبير، وكل لاعيبة الأهلى. - ما هى الأكلات التى يحبها عصام من يدك؟ كان بيحب ياكل من إيديا كل حاجة، وما كانش بيقول لأ لأى حاجة، إنما لما راح النادى الأهلى وانتقل للعيش بالقاهرة، كان يطلب منى أعمل له محشى وبط، وكنت أعمل له وأبعته مع أخوه. - ما أفضل مباراة لعبها الحضرى؟ وهل ما زلت تذكرينها؟ بحب كل مبارياته، وكل حاجة الحضرى بيشارك فيها. - وبماذا تدعين له؟ بدعى له وأقول، ربنا يحبب فيك خلقه، حتى الحصى اللى بتمشى عليه. - وما هى نصائحك له؟ بنصحه وبقول له ما تزعّلش حد منك، ومش عاوزة حد يزعل منك. - وهل يتكلم معك قبل المباريات؟ أيوة طبعًا، بيكلمنى قبل كل مباراة بساعة، وبيطلب منى أدعى له، وأنا مش بنتظر يطلب منى، على طول بدعى له من قلبى فى كل وقت، والحمد لله دعواتى ليه مستجابة. - هل يواصل عصام الحضرى اللعب حتى الآن بمجهوده أم بدعواتك؟ طبعا بمجهوده، لأنه بيلعب بشرف وبمجدعة، وكمان بدعواتى. - بدعواتك أم كما يقول مرتضى منصور إنه يستعين بالجن وجاميكا؟ (ضاحكة) شبعنا من الكلام ده والله، عصام ابنى بيلعب جد، وطول ما هو جدع وبندعى له ربنا هيعطيه. - وهل قال لك عصام متى يعتزل لعب الكرة؟ عصام قال لى يا ماما أنا هفضل ألعب كورة طول ما فيا نفس، ولحد ما ابنى ياسين ياخد مكانى فى حراسة المرمى. - هل تشجعين الكرة؟ أيوة طبعًا، بنحب وبنشجع الكرة. - ما الفريق الذى تشجعينه؟ طبعًا الأهلى. - وهل ما زلت تشجعين الأهلى؟ طبعًا بحب الأهلى وبشجعه من زمان، وكلنا أهلاوية أبا عن جد، وعشقنا الأهلى أكتر بسبب لعب عصام فيه، وهنفضل نعشق الأهلى مهما حصل، ولما الحضرى انتقل للأهلى عملنا حفلة كبيرة فى مركز شباب كفر البطيخ، وكل الناس كانت بتيجى تهنى وتبارك لوالده الله يرحمه فى البيت. - هل تتمنين أن يعود عصام الحضرى لصفوف الأهلى؟ طبعًا نفسى، بس مفيش نصيب. - هل تعتقدين أن مانويل جوزيه كان له دور فى اشتعال الأزمة؟ طبعًا، منه لله وربنا يسامحه، وقف ضد عصام كتير، بس ربنا نصر عصام، ولسه بيلعب وبيفرح المصريين كلهم. - وكيف كان إحساسك بعدما رأيت الجمهور يهاجم عصام بعد ان كان يهتف له؟ طبعا ده إبنى، وقلب الأم لا يمكن يغضب أبدا على ابنه، بس الحمد لله الناس بتحب عصام وكلها بتدعى له. - من أكثر لاعب بالمنتخب المصرى تفضلينه وتحبينه؟ بحبهم كلهم علشان خاطر عصام. - ما هى توقعاتك لمباراة المنتخب مع المغرب الليلة؟ إن شاء الله مصر هتكسب، وعصام هيتألق هو وزملاؤه، وأنا بدعى له.