فنانات تضامن مع غادة عبد الرازق بعد بكائها واعتذارها.. مى كساب: اشتغلت معها فيلم وأشهد أنها بتاخذ "مهدئ".. فيفى عبده: اللي بيته من زجاج بلاش يرمي الناس بالحجارة.. وهيفاء حسين: دموعك غالية يا أختى

أعلن عدد من الفنانات تضامنهن مع النجمة غادة عبد الرازق فى أزمتها الأخيرة، بعد نشرها فيديو تبكى به وتعتذر عن الفيديو المتداول لها منذ أيام على السوشيال ميديا، وطلبت من الجمهور مسامحتها. وعلقت الفنانة مى كساب على فيديو غادة عبد الرازق، عبر حسابها بموقع "إنستجرام"، قائلة: "عمري في حياتي ما بقول غير الحق.. أبويا رباني على كده.. ودي شهادة حق.. وواجب عليه لازم أعمله.. أنا بقالي 17 سنة بشتغل في المهنة دي.. مثلت تقريبا مع كل الوسط الفني.. غادة عبد الرازق من أجدع وانضف الشخصيات اللي ممكن تشتغل معاها". وتابعت مى: "ست جدعة وأم حنينة جدًا لابنتها الطيارة المحترمة روتانا قزاز أنا اشتغلت معاها فيلم طول الوقت كانت حنينة وجدعة معايا ومع غيري بتحب شغلها بتحترم الصغير والكبير وفوق كل ده طبعًا دي موهبة عظيمة وكبيرة استاذة". وأضافت: "وأنا شاهدة إنها مش بتعرف تنام غير لما تاخد دوا فعلا.. وناس كتير عارفة تأثير الدواء المهدئ ده إيه.. اعتذارك حاجة كبيرة ومحترمة منك.. ودموعك غالية جدًا.. ما تضايقيش نفسك.. ربنا غفور رحيم.. وهو أرحم من البشر بكتير.. وكل إنسان بيفهم ويرى بعينه هو.. وأنا عن نفسي صدقتك وسامحتك.. وفخورة بيكى.. ربنا يخليكي لبنتك وأحفادك.. وكل اللي بيحبوكى". واختتمت مى كلامها قائلة: "أنا مش عارفة ليه نوصل إنسان إنه يبكي بالشكل ده قدام ناس كتير ويبان مكسور كدة من الفضيحة، إحنا للأسف بننصب المحاكم لغلطات الناس وننسي نفسنا، بل بالعكس بنعصم نفسنا من الخطأ بغض النظر عن رأيك فيها، بغض النظر عن رأيي في الحصل ومنغير ما نحاسب ونحرم ونكفر، دي ممثلة قعدت سنين كتيير تقدم أعمال حلوة وناس كتير حبتها (حتي لو أنت مش منهم) آه ممكن نعترض علي الغلط بس مش بغلط أكبر، ممكن ننصح بس مش في العلن، خلينا ناخد الآيه كاملة، مش ناخد نص الكلام بس. ربنا برضه غفور رحيم وديننا دين أخلاق ومعاملة قبل أي حاجة، استروا بعض يا جماعة ربنا يستر علينا ويعفينا ويرحمنا من أي خطأ". كما أعلنت الفنانة فيفى عبده تضامنها مع غادة عبد الرازق فى محنتها، بشكل غير مباشر حيث كتبت عبر حسابها على موقع التدوينات الصغيرة "تويتر"، تزامنًا مع نشر فيديو اعتذار غادة: "من كان منكم بلا خطيئة فليرمها بحجر - اللي بيته من زجاج بلاش يرمي الناس بالحجارة". وعبرت الفنانة البحرينية هيفاء حسين عن تضامنها مع غادة عبد الرازق، حسيث أعادت نشر فيديو اعتذارها، عبر حسابها بموقع "إنستجرام"، معلقة عليه قائلة: "يا بعد قلبي يا غادة .. رغم إني ما أحب اتدخل في خصوصيات الغير لكن كلنا عارفين الحقيقة وان هالشيء صار بدون قصد وكلنا معرضين لأي شي في هالزمن". وتابعت قائلة: "هذي الأجهزة والبرامج خطيرة ولازم التعامل معاها يكون دقيق والخطأ فيه ممكن يبهدلنا.. دموعك غالية يا أختي.. صحيح ما اعرفك شخصيا لكن أعرف إنك نجمة كبيرة وزميلة وممكن التقيك في يوم من الأيام". واختتمت كلامها قائلة: "لا تزعلين نفسك وراح تظلين نجمة رغم اللي صار وكل شي يصير في هالدنيا له وقت ينسي وينتهي.. عموما قدامك اعمال ولازم تستعدين لها بنفسية ومعنويات عالية.. انسى اللي صار وكل جمهورك ومحبينك معاك وأنا أولهم". ومن جانبها حرصت النجمة غادة عبد الرازق على توجيه الشكر لهم بعد موقفهم معها فى أزمتها، فكتبت عبر حسابها بموقع التدوينات الصغيرة "تويتر": "بحبكم وأشكركم جدًا". يذكر أن الفنانة غادة عبد الرازق خرجت ببث مباشر جديد لها عبر حسابها الرسمى بموقع الصور الشهير "إنستجرام"، واعتذرت فيه عن الفيديو المتداول لها منذ أيام على السوشيال ميديا، وطلبت من الجمهور مسامحتها.