"اكسبى راجل" إعلان زواج يثير الجدل على "فيس بوك".. شاب وسيم ورومانسى يطلب عروسة ثرية وجميلة تشاركه الحياة "تجاريًا وحياتيًا".. وردود أفعال تهاجمه: "فين الراجل فى الموضوع؟".. وأخرى تدافع: نحترم صراحته

على غرار العبارة الشهيرة التى تتكرر فى البيوت المصرية فى غالبية اتفاقات الزواج "إحنا بنشترى راجل" بادر أحد الشباب بالإعلان عن طلبه الزواج عبر صفحة على موقع التواصل الاجتماعى باسم "اكسبى راجل" معلنًا شروطه فى العروس المطلوبة، التى كان على رأسها أن تكون "فتاة ثرية" مبررًا طلبه بأنه يريد أن يحقق أحلامه "بمشاركة زوجة المستقبل تجاريًا وحياتيًا، بمعنى أن تشاركنى ماديًا فى تحقيق أحلامى وتشاركنى الحياة نفسها". وأثار الإعلان المنشور على موقع التواصل الاجتماعى الكثير من الجدل بعد طرحه أكثر من مرة، وتباينت ردود الفعل بين الهجوم الشديد على الشاب الذى لم يفصح عن هويته واتهامه بأنه "مادى" و"يبحث عن زيجة مصلحة" وبين استنكار الهجوم عليه و"احترام صراحته ووضوحه". ولم يكشف الشاب عن اسمه لكنه قال فى الإعلان عن مواصفاته إنه "وسيم بقدر جيد ورومانسى جدًا وطيب وحنين" وأضاف أنه يتحمل المسئوليات والمشاكل واستطرد "مش بالضرورة كل المسئوليات والمشاكل تكون مادية"، وتابع "مش بتعصب بسهولة، وسنى داخل على 30، على قدر كبير من الحكمة والعقل فى التعاملات وحلول المشاكل يعنى أكبر من سنى عقليًا مع شوية جنان فى بعض الأحيان لزوم المرح". ووصف نفسه أيضًا بأنه "متدين بشكل متوسط، أصلى لكن بشكل غير منتظم، وغير مدخن ولا بشرب أى أنواع من المخدرات ولا المكيفات ولا الخمور. أحب السهر والمرح والفسح والمغامرات جدًا. دمى خفيف نسبيًا وأحب الضحك والهزار". وعن مستواه المادى والاجتماعى قال "أنا من أسرة متوسطة ماديًا، عالية اجتماعيًا. أحب البيزنس جدًا والفن بأنواعه. أفكارى غالبًا فنية وتجارية وخيرية ولى أفكار تجارية كبيرة حاولت تنفيذها ولم أتمكن لقلة الماديات". أما عن مواصفات العروس المطلوبة فشدد فى الإعلان على أن تكون "ميسورة ماديًا تشاركنى أحلامى التجارية" وكتب فى الإعلان "مطلوب عروسة رومانسية وطيبة وحنونة تحب الضحك والمرح وتكون جميلة (والجمال نسبى بطبيعه الحال) يفضل مهتمة بشكلها وجسمها وأناقتها"، وأضاف "لا يشترط سن ولا يشترط إذا كان سبق لها الزواج أم لا ولا يشترط بحجاب أو بدون ولكن على خلق، تتعامل بما يرضى الله كما سأعاملها أما المغرورة أو المتعالية أو اللى فاكرة إن بفلوسها هتعمل أى شىء تمتننع عن التواصل تماما". وعن طريقة التواصل وإتمام الزواج قال "فى النهاية لازم نتقابل أكتر من مرة علشان نشوف هنتفق فكريا وعاطفيا ولا لأ لأن مش أى واحدة معاها فلوس وخلاص هتجوزها"، والتواصل عن طريق الرسائل الخاصة على الصفحة. وفى نهاية الإعلان نوه إلى أنه "لو فى واحدة ممكن تشارك تجاريا بدون زواج معايا مبدأيا مشروعين واحد مكلفه حتى الآن نحو 700 ألف وينقصه من 300 إلى 500 وهذا يحدد حسب دعاية المشروع، والآخر مكلفة حتى الآن 100 ألف وينقصه من 150 إلى 200 ألف". ردود الفعل على السوشيال ميديا بين "وهو فين الراجل؟" و"نحترم صراحتك" أثار الإعلان الكثير من الضجة على مواقع التواصل الاجتماعى التى استقبلته بردود فعل متباينة بين من ينتقده وكتبوا "طب هو فين الراجل بقى؟" وكتبت "غادة": "هتتجوز فلوسها وبتقولها بصراحة؟ دا الزمن الأخير ستكون النساء قوامون على الرجال"، وعلقت "هبة محمود": "أنا لو معايا الفلوس دى ما أفكرش فى الجواز أصلاً، اتجوز واحد واديله فلوسى وبعد كده يتجوز عليا؟". أما "أمل عبدالناصر" فكتبت "عالم فاضية وعايز كل حاجة على الجاهز، كويس إنه ما طلبش يكون معاها عيال عشان الصفقة تكون رابحة معاه". فيما حذرت "نهى محمد": "ممكن يكون نصب وجب التنبيه". وتساءلت "أميرة طلعت": "بص، بما إنك بتقول أفكارك تجارية يعنى المفروض تكون عارف إن من مبادئ الصفقات إنها تكون win win يعنى مكسب للطرفين، فأنت قلت على مكسبك أنت فى الإعلان مقلتش إيه اللى متقدمه فى المقابل؟ وأوعى تقول زى فيلم تحكى يا شهرزاد لما قالها هبقا جوزك عشان ساعتها هتلاقى نفس رد سوسن بدر عليه فى الفيلم برضه وقد يكون مصحوبا بحاجات متطايرة". فيما دافعت عنه بعض التعليقات فكتبت "حنان": "أنا شايفة إنه واضح ومحدد هدفه ودا مش غلط"، واتفقت معها ساجدة سلامة: "جواز مصلحة، هو واضح أحسن من بتوع اللف والدوران ليه الصراحة بتزعل أوى كده؟ أنا عازراك بصراحة بسبب ظروف الشباب اللى زى الزفت دى. ربنا يرزقك باللى تتمناه". وفى ردوده على التعليقات على الإعلان قال الشاب: "الموضوع أعمق من اللى مكتوب لأن أكيد فى تفاصيل ما اتقالتش. وبعدين أنا مش بتجوز فلوس أن بتجوز بنى آدم بدليل شروطى الثانية. المساعدة دى ممكن تكون من طرفين هى تساعد بفلوسها وأنا بفكرى ومجهودى، وبعدين أنا مش على الحديدة يا جماعة عشان تبقوا عارفين بس ما اقدرش أمول مشاريعى لوحدى، زى بالظبط الاتنين اللى بيتجوزوا ويشتغلوا هم الاتنين ويصرفوا على البيت بس بشكل تانى". وأوضح "أنا عايز واحدة تشاركنى كل حاجة حتى المشاريع... يعنى مش عايز واحدة تصرف عليا إطلاقا ولا واحدة غنية بس برده.. والله أنا مش شحااااااااات أنا برده معايا فلوس بس طموحاتى عالية شوية فى التجارة".