وجه الرائد هشام صالح بمديرية أمن الجيزة رسالة إلي سائق التوكتوك الذي أشعل السوشيال ميديا بتصريحاته ضد الحكومة المصرية في برنامج " واحد من الناس " مع الإعلامي عمرو الليثي الأسبوع الماضي .
وجاء نص الرسالة التي نشرها الرائد كالآتي:
" أنا سمعت الكلام اللي انت قلته ومليش دعوه انت انتمائك ايه...بس انا عايز اقول حاجه..التوكتوك اللي انت سايقه ده وجايبه بالفين تلاته او زيرو ب20 او 30 الف وبتاخد في التوصيله ال50 متر 5 جنيه وساعات اجرتك بتوصل 10 و 15 جنيه يعني انت وصلت لعشر اضعاف تذكرة المترو اللي هي اسرع وانجز منك..والدوله سايباك ومبتاخدش منك مليم واحد ترخيص ولا ضرايب وسايباك تستخدم الطرق وتزحمها وتاخد البنزين المدعم بلا حساب وكل ده وده لو كنت موظف وبتجمع بين شغلتين وده غلط والكل عارف لكن البلد سايباك بردو...ولما التوكتوك بتاعك اذا اتحجز فالمرور بردو بتدفع غرامه وتاخده تاني...يعني انت راجل كسيب باقل الخساير ومبتدفعش الا بنزينك ولا ضرايب ولا مخالفات ولا رخص...ايه اللي مضايقك...طب ماتجرب تاخد التوكتوك بتاعك اللي بالميت بيطلعلك فاليوم من 70 ل 100 جنيه اواكتر وتوصل كده لحلب او دمشق او روح بني غازي شوف هتعيش هناك ازاي او اوصل صنعاء كده لو لقيت زبون واحد هيركب معاك او معاه فلوس يحاسبك...او لو لقيت بلد بتدعم البنزين وانت بتاخده ومبتاخدش منك ضرايب علي التوكتوك بتاعك....انت زي كتير...بترغي وبس...كعادتنا بنحب الكلام....طب ماتطلع كده وانت واضح انك مثقف واتبنى انكو ترخصو الاجره بتاعت التوكتوك بما ان الراجل البسيط هو اللي بيستخدمه وتساهمو في تحمل اعباء الناس يانجم...ماتعمل رابطه كده وقول انكو لازم تترخصوا وتاخدو رخص وتدفعو ضرايب ومخالفات بدل مانتو مبرطعين علي حس ان في بطاله وانك بتاكل عيش...هاتلي دوله فالعالم كده يامثقف بتمشي اي مركبه في الشارع بدون ترخيص او ضرايب...؟.........!!!
انا مش هنكر ان في سلبيات .. وكتير ...وفي حاجات كتير متاخره وقرارات لازم تتاخد فعلا ومستنيينها من زمان....والدنيا نار وغاليه عليا وعلى الكل....وانا مش بدافع عن حد ولا بنكر سلبيات او كلام واقعى او حقيقى لكن الانتماء للبلد مالوش علاقه بالحكومه ولا الاسعار...اسالو الناس المصريين بردو عدو محنة عدوان 1956 ازاي وساعتها كان في ازمات تموين اكتر...ازاي عدو ازمة النكسه اللي مشيت في دمنا زي المراره....اسالوهم كان احساسهم ايه ساعتها...ازاي عبدالناصر قال طوز فالمعونه انشلا نجوع والناس وقفت معاه ولا اتكلمو في سكر ولا لحمه....ازاي بنوا الجيش تاني عشان يجيبو الارض اللي اتاخدت...ازاي كل واحد كان ليه دور وعليه واجب..مكنش الجيش بس...اقسم بالله اقسم بالله لو الفيسبوك ده كان موجود قبل 73 ماكنا فكرنا فالحرب من اساسه...
الانتماء وحب البلد دي والله ماليه علاقه بالسكر والزيت ولا ليه علاقه بالحكومه واسالوا التاريخ ياخي...
انزل اشارات المهندسين واسال السوريين اللي بيبيعو حلويات انت حاسس بايه وانت كنت كبير في بلدك وجيت واتغربت وواقف تبيع حلويات في اشارات المرور...بص لدموعه وانت تعرف انها مش بالحكومه ولا بالسكر والزيت...اسال متحدي الاعاقه اللي راحو الالعاب البارالمبيه وخدو ميداليات دهب واغلبهم حالهم علي ادهم..اسال ابطال رفع الاثقال اللي راحو الاولمبيات رفعوا علم مصر حسوا وقتها بايه يا اخي...اساله كنت بتدرب فين هيقولك في الشارع وصمم وربنا كرمه وهو حاله علي اده ومش لاقي لامؤاخذه ياكل...شوف العساكر اللي في سيناء واستشهدوا الفجر يا اخي ماتو ليه...هيقولك عشان بنحب البلد دي ولا بص لحكومه ولا لفساد محليات ولا لرشاوي ولا لدولار...
بتكسب قوت يومك وبتشتري عيش مدعم حتي لو فيه مسامير...بتاخد زيت وسكر مدعم حتي لو قليلين...بتركب مواصلات مدعمه حتي لو زحمه...بتتعلم ببلاش حتي لو التعليم مهبب....كبرنا فيها وهي كده واتعلمنا وهي كده...يبقي ده دورنا بقي نقف معاها...ده حتي اهالينا ربونا نبقي جدعان في وقت الشده يا اخي...متتخلاش عنها في الزنقه والمحنه ايا كان...متنطش من المركب او تغرقها بايدك...
انزل الجامعات الخاصه وشوف الطلبه العراقيين والليبين واليمنيين والسوريين واهو ربنا موسعها عليهم وجايين يتعلمو بفلوسهم وحالهم ميسور هيقولولك ايه..هيقولولك خد مني كل فلوسي وخليني بهدومي بس ارجع اعيش واتعلم في بلدي وانام علي سريري ...
احنا عايزين رحله ببلاش نسافر فيها مصراته ولا حلب ولا طرابلس ليبيا ... نقعد هناك كام ساعه...
احنا قبل ما بنطالب الحكومات بالتغيير...احنا غيرنا ايه في نفسنا...انزل شق التعبان في طره وبص عالعمال المصريين والعمال السوريين والبنجلاديش...شوف العامل المصري بيشتغل كام ساعه وبياخد كام وشوف التانيين بيعملو ايه...انزل محلات الكشري في اكتوبر وشوف اللي شغال فيهم مين...شوف صنايعية البلاط والسيراميك السوريين بيخلصو الشغل في اد ايه...شوف مصانع الغزل اللي فالعاشر اللي بعتت تجيب عماله من اندونيسيا وبنجلاديش عشان مش لاقي عماله مصريه....شوف سلوكياتنا في الشارع عامله ازاي...شوف الشتايم والتخوين اللي عالبكبورت اللي اسمه الفيسبوك اللي بقى عامل زي المبوله....
حاسبوا الاعلاميين بتوع دلوقتي وقولولهم انتو المفروض قدوه..اتعلموا من اعلاميين زمان...
حاسبوا الفنانين اللي كل واحد فيهم في وادي ومحدش بيعمل حاجه للبلد وسايبين نفسهم للسبكي ومحمد رمضان لحد ما بوظو جيل كامل ...
حاسبوا كل اللي بيخون و يتآمر...
نحاسب نفسنا غيرنا فنفسنا ايه يافندم وبعدين تعالي نحاسب الحكومه على تقصيرها وتباطؤها....
تعالوا نفوق شويه...تعالو نقول ان البلد دي والله ماتستاهلنا كلنا اصلا...عايزه حد يقدرها ويقدر ترابها اللي ضحى عشانه ناسها الحقيقيين ايام الانجليز والاحتلال...ايام 52 في الاسماعيليه قدام المحافظه لما الرجاله اللي بجد رفضوا يسلموا المحافظه للانجليز.....ايام عدوان 56 والكتف كان فالكتف...ايام 67 واحنا في ضهر ولادنا العساكر وبنقول شد الحزام على وسطك غيره مايفيدك...ايام 73 واحنا كنا مستعدين نقطع من لحمنا والارض ترجع...
فوقوا يا اخي...اقسم بالله ماتستاهلنا
البلد اللي ربنا كلم فيها سيدنا موسى...
البلد اللي ذكرت في القرآن بالامن والامان...
البلد اللي ابراهيم عليه السلام اتجوز منها....
البلد اللي دلوقتي اكتر ناس بتكرهها هما منها بردو...
الراجل اللي فالصوره ده هو مصر...يمكن مش لاقي ياكل ولا يلبس ... بس ماسك علم وعارف ان حبه لبلده وانتمائه ليها مالوش علاقه بكل ده...
الانتماء حاجه...والكره حاجه...والانتقاد حاجه...
اسف للاطاله .. كنت خدت قرار مكتبش في اي حاجه..بس الحقيقه مقدرتش "